Саха Өрөспүүбүлүкэтигэр урбаанньыттар бырааптарын көмүскээһиҥҥэ боломуочунай Альбина Кычкина 2022 сыллааҕы үлэтин туһунан дакылааты иһитиннэрдэ.
Ол курдук, урбаанньыттар бырааптарын уонна сокуоннай интэриэстэрин көмүскүүр сыалтан кинилэр үҥсүүлэрин уонна туруорсууларын дьүүллэһэр, итиэннэ бырааптарын чөлүгэр түһэриигэ үлэ ыытылынна.
Ону кытта публичнай боломуочуйалаах уорганнар уонна сололоох дьоннор урбаан субъектарын бырааптарын уонна сокуоннай интэриэстэрин тутуһалларын хонтуруоллааһыны олохтуурга административнай баттааһын аччыырыгар үлэ оҥоһулунна, этиилэр киллэрилиннилэр.
Альбина Кычкина бэлиэтээбитинэн, хомуурданан РФ Сэбилэниилээх Күүстэрин кэккэтигэр киирбит үлэһиттэрин өйөөн Саха сирин урбаанньыттар сомоҕо күүс буоллулар. Экэниэмикэ эйгэтигэр дьарык көҥүлэ, урбаан дьыалатыгар көҥүлү туһанар быраап сокуонунан көмүскэнэрэ өссө күүһүрүөхтээх.
Дакылаат кэнниттэн норуот дьокутааттара Альбина Кычкинаҕа ыйытыылары биэрдилэр.
Павел Ксенофонтов судаарыстыбаннай тыллары сайыннарыыга ыытыллар үлэ туһунан сураста уонна арыгы бородууксуйатын оҥорон таһаарар урбаанньыттар оҥоһуктарын сахалыы ааттыылларын сөбүлүү көрбөтүн эттэ. Итини сэргэ норуот дьокутаата оннук урбаанньыттарга сурук суруйа сылдьыбытыгар, «итинник ньыманан өрөспүүбүлүкэбитин аатырдабыт» диэн хоруй кэлбит эбит.
Альбина Кычкина төрөөбүт тылы сайыннарар үлэни биһириирин уонна муниципальнай тэриллиилэргэ буолар көрсүһүүлэр үксүгэр саха тылынан ыытыллалларын биллэрдэ.
Любовь Явловская Арктика улуустарын урбаанньыттарыгар туох кыһалҕалар үөскүүллэрин ыйытта.
Боломуочунай урбаанньыттар көрсөр сүрүн кыһалҕалары ыйда:
- суол-иис уустуга;
- социальнай суолталаах аска-үөлгэ сыана үрдүгэ;
- электроннай илии баттааһыны ыларга Дьокуускайга кэлэр наада;
- нотариустар тиийбэттэрэ.
Альбина Кычкина иһитиннэрбитинэн, ити кыһалҕалары быһаарарга Арктика оройуоннарынан урбаанньыттары кытта үлэ ыытыллар.
Ил Түмэн урбааҥҥа, туризмҥа уонна инфраструктураны сайыннарыыга сис кэмитиэтин бэрэссэдээтэлэ Игорь Григорьев эппитинэн, бу дакылаат 2023 сыл муус устар 6 күнүгэр кэмитиэт мунньаҕар көрүллүбүтэ. Уураах бырайыага ылыныллан биир санаанан биһирэммитэ. Игорь Григорьев Саха Өрөспүүбүлүкэтигэр урбаанньыттар бырааптарын көмүскүүр боломуочунай 2022 сыллааҕы үлэтин туһунан дакылааты ылынарга көрдөстө.
Мария Христофорова пандемия уустук кэмигэр өрөспүүбүлүкэҕэ урбаанньыттарга көмөлөһөр миэрэлэр ылыллыбыттарыгар Альбина Кычкина улахан оруоллааҕын бэлиэтээтэ. Кини «Деловая Россия» уонна «Опора России» урбаанньыттар уопсастыбаларын кытта үлэлэһэрин кэрэхсиир. Норуот дьокутаата дакылаат сахалыы тылбаастанан тахсыбытыгар хайҕалын, убаастабылын уонна махталын биллэрдэ.
Павел Ксенофонтов 2023 сыл түмүгүнэн дакылаатыгар Альбина Егоровна «Тыл бэлиитикэтин өйүүргэ Боломуочунайынан туох үлэ оҥоһуллубутун туһунан» салааны оҥороругар этии киллэрдэ. Норуот дьокутаата ити үлэҕэ көмөлөһөргө бэлэмин биллэрдэ.
Виктор Федоров пандемия кэмигэр Альбина Егоровна үлэтин үрдүктүк сыаналаата уонна тулхайдыйбат санаалааҕын бэлиэтээн эттэ. Кини урбаанньыттар бырааптарын көмүскүүр Боломуочунай киллэрбит этиилэрин ырытта.
- Боломуочунайга сокуону киллэрэргэ көҕүлүүр быраабы биэрии. Виктор Федоров бу этии олоххо киирэрэин саарбахтаата, ол иһин парылаамаҥҥа урбаанньыттар интэриэстэрин туруорсар урбаанньыт дьокутааттары таһаарарга сүбэлээтэ;
- административнай быраабы кэһии туһунан РФ кодексыгар урбаанньыттар бырааптарын көмүскүүр Боломуочунай үлэтигэр мэһэйдээһин туһунан ыстатыйаны киллэрии;
- атыы киинин иэнин быһаарыы. Ол аата, тэрилтэ иэнэ төһө эрэ кыбадыраат миэтэрэттэн улааттаҕына, атыы киинэ диэн буолар, онтон кырата – маҕаһыын;
- социальнай суолталаах табаардар муҥутуур үрдээбит сыаналарын чуолкайдыыр наада.
Норуот дьокутааттара куоластааһын түмүгүнэн уурааҕы ылыннылар.
-
0
-
0
-
0
-
0
-
0
-
0
