“Саха сирэ уонна Забайкалье – Уһук Илиҥҥи макро-эрэгийиэни үөскэтэллэр. Бу макро-эрэгийиэн олоҕо-дьаһаҕа Российскай Федерация судаарыстыбаннай бэлиитикэтигэр, сокуону оҥоруутугар көстүөхтээх. Онон бары күүһү-күдэҕи түмэ тардан, федеральнай сокуоннарга уонна федеральнай сокуоннар көннөрүүлэрин бырайыактарыгар бэйэбит этиилэрбитин киллэрэргэ дьулуһуохтаахпыт. Социальнай эйгэҕэ да буоллун, доруобуйа харыстабылыгар, билимҥэ уонна култуураҕа да буоллун, урбаан бигэ туруктаах сайдыытыгар да буоллун, барытыгар быһаччы кыттыһыахтаахпыт”.
Ол туһунан СӨ “Ил Түмэн” Судаарыстыбаннай Мунньаҕын бэрэссэдээтэлэ Петр Гоголев “Уһук Илин уонна Забайкалье” парламентскай түмсүү уочарата суох уопсай мунньаҕар эттэ. Мунньах быһа холбонуу көмөтүнэн от ыйын 22 күнүгэр буолан ааста. Кыттааччылар саҥардыллыбыт Төрүт сокуоҥҥа олоҕуран оҥоһуллуохтаах сокуоннар тула кэпсэттилэр, этиилэрин киллэрдилэр. Мунньаҕы парламентскай түмсүү бэрэссэдээтэлэ Александр Ролик салайан ыытта.
Мунньах кэмигэр эрэгийиэннэр парламеннарын спикердара бэйэлэрин санааларын эттилэр.
– От ыйын 4 күнүттэн саҥардыллыбыт Төрүт сокуонунан олорон саҕалаатыбыт. РФ Бэрэсидьиэнэ Владимир Путин Арассыыйа 2030 сылга диэри сайдыытын чопчулуур национальнай тосхоллорун туһунан ыйааҕа таҕыста. Онон бүтүн дойду үрдүнэн саҥа соруктар турдулар. Ону ситиһэргэ, бастатан туран, федерация уонна эрэгийиэннэр таһымнарыгар сокуоннары саҥардыллыбыт Төрүт сокуоҥҥа сөп түбэһиннэрэр үлэ-хамнас саҕаланна, – диэн Ил Түмэн бэрэссэдээтэлэ Петр Гоголев иһитиннэрдэ.
Петр Васильевич Ил Түмэн сокуону оҥоруу, уларытыы бары хайысхаларынан үлэтин саҕалаабытын кэпсээтэ.
Парламентарий СӨ Ил Дархана Айсен Николаев сокуоннары уларытыыга, этиилэри хомуйууга үлэлиир бөлөҕү тэрийбитин иһитиннэрдэ. Үлэлиир бөлөх састаабыгар толорор былаас, суут, прокуратура үлэһиттэрэ уонна Ил Түмэн дьокутааттара киирбиттэр.
От ыйын 17 күнүгэр үлэлиир бөлөх бастакы мунньаҕа тэриллэн, үлэ былаана бигэргэммит. Онон от ыйыттан саҕалаан сэтинньигэ диэри олох-дьаһах бары хайысхаларын үс аҥы арааран сокуоннары көннөрүү, уларытыы үлэтэ-хамнаһа былааннаммыт: судаарыстыбаны салайыы уонна олохтоох бэйэни салайыы; бастакы социальнай эйгэ (доруобуйа харыстабыла, дьиэ кэргэн, социальнай өйөбүллэр) уонна иккис социальнай эйгэ (үөрэҕирии, билим, урбаан, гражданскай уопсастыба).
Спикер саҥардыллыбыт Төрүт сокуоҥҥа киирбит федеральнай бэрээдэктээһиҥҥэ уонна саҥа өйдөбүллэргэ болҕомтотун уурда. “Биһиги үлэбитигэр эспиэрдэри кытыннарабыт. Ол курдук билиҥҥитэ сис кэмитиэттэр бэрэссэдээтэллэрэ эспиэрдэри кытта федеральнай сир-уот уонна аһаҕас былааһы тэрийии курдук уустук боппуруостарга эспиэрдэри кытта сүбэлэһэ сылдьаллар. Күһүҥҥү сессияҕа федеральнай сокуоннар бырайыактарын суһаллык көрүөхпүт уонна Ил Түмэн мунньахтарын кыраапыгар уларытыылары киллэрэн үлэлээн барыахпыт”, – диэн Петр Гоголев кэпсээтэ.
Парламентарий доруобуйа харыстабылын хайысхатынан элбэх этиилэр киирбиттэрин бэлиэтээтэ. Бастатан туран, доруобуйаҕа уонна киһи олоҕор кутталлаах үлэлэри толорор мэдиссиинэ, фармацевтика уонна да атын доруобуйа харыстабылын үлэһиттэригэр булгуччу страховкалааһыны оҥорор туһунан сокуон киирэрэ наадалааҕын эттэ. “Күн бүгүн доруобуйа харыстабылын үлэһиттэрин страховкатын тэрилтэлэрэ эбэтэр бэйэлэрэ уйуналлар”, – диэн сөптөөхтүк санатта. Ону таһынан саҥа сокуон оҥорон эбэтэр эрдэтээҕи сокуоҥҥа саҥа эбии пуун киллэрэн эмчиттэр ыалдьар түгэннэригэр, доруобуйаларын чөлүгэр түһэрэр ороскуоттарын сабар төлөбүрдэри оҥорор саҥа сокуон көрүллүөн сөптөөҕүн эттэ.
Иккиһинэн спикер Уһук Илиҥҥи эрэгийиэннэр сиринэн тырааныспар кыайан тиийбэт нэһилиэнньэлээх пууннарыгар, 323 №-дээх федеральнай сокуоҥҥа билиҥҥитэ ыйыллыбакка сылдьар санитарнай авиация көмөтүнэн былааннаммыт мэдиссиинэ көмөтүн оҥорор туһунан туспа сокуон наадатын ыйда. Ону сэргэ көһө сылдьар мэдиссиинэ биригээдэлэринэн көмөнү оҥоруу туһунан эмиэ саҥа сокуон оҥорор уолдьаспытын эттэ.
Ити курдук, Петр Гоголев социальнай эйгэҕэ сыһыаннаах Ил Түмэн этиилэрин кытта билиһиннэрдэ.
Петр Васильевич бэйэтил тыл этиитин түмүктээри туран, мунньаҕы ыыппыт Александр Ивановичка махтанна уонна аныгыскы сырыыга эспиэрдэри ыҥыран мунньахтыахха диэн этии киллэрдэ.
Мунньах кэмигэр бары эрэгийиэннэр парламеннара бэйэлэрин уопуттарын кэпсээтилэр уонна туох этиилээхтэрин билиһиннэрдилэр.
Ил Түмэн пресс-сулууспатын матырыйаалынан.
-
0
-
0
-
0
-
0
-
0
-
0
