Издательский дом Редакция Подписка
Погода в Якутске: . -26 oC

Арассыыйа уонна Белоруссия судаарыстыбаларын сибээһэ кэҥиир уонна бөҕөргүүр. Эрэгийиэннэр бииргэ үлэлээһиннэрэ араас хабааннаах cөбүлэһиилэр чэрчилэринэн ыытыллар. 

Арассыыйа уонна Белоруссия судаарыстыбаларын сибээһэ кэҥиир уонна бөҕөргүүр. Эрэгийиэннэр бииргэ үлэлээһиннэрэ араас хабааннаах cөбүлэһиилэр чэрчилэринэн ыытыллар. 

Холобур, Белоруссия уобаластарын, оройуоннарын, куораттарын уонна  Арассыыйа субъектарын, муниципальнай тэриллиилэрин икки ардыларыгар 300-тэн тахса дуогабар түһэрсиллибит. Итинэн сибээстээн, Ил Түмэн дэлэгээссийэтэ Белоруссияҕа баран кэллэ. Бу оробуочай сырыы сахалартан бастакы Сэбиэскэй Сойуус Дьоруойа Федор Кузьмич Попов көмүллэн сытар Гомельскай уобалаһын дьокутааттарын Сэбиэтин ыҥырыытынан, итиэннэ тохсус төгүлүн ыытыллар Эрэгийиэннэр форумнарын чэрчитинэн тэрилиннэ.

Икки парламент Сөбүлэҥ түһэристэ

Эһиил Саха АССР тэриллибэтэ 100 сылынан, итиэннэ Гродно куоракка РФ Федеральнай Мунньаҕын Федерацияҕа Сэбиэтэ уонна Белоруссия Национальнай Мунньаҕын Өрөспүүбүлүкэтээҕи Сэбиэтэ тэрийэр Эрэгийиэннэр IX форумнара ыытылларынан, Ил Түмэн бэрэссэдээтэлэ Алексей Еремеев уонна Гомельскай Сэбиэт бэрэссэдээтэлэ Екатерина Зенкевич 2022 сылга бииргэ үлэлэһэр туһунан Сөбүлэҥҥэ илии баттастылар.

20211202182914 KVA 9816

Ол сиэригэр-туомугар Ил Түмэн бүд­дьүөккэ, үпкэ, нолуок уонна сыана бэлиитикэтигэр, бас билии уонна приватизация боппуруостарыгар сис кэмитиэтин бэрэссэдээтэлэ Юрий Николаев, тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин, норуот дьокутаата Юрий Баишев, Мэҥэ Хаҥалас улууһун баһылыга Николай Старостин, улуус дьокутааттарын оройуоннааҕы Сэбиэтин бэрэссэдээтэлэ Павел Сазонов, анараа өттүттэн Гомельскай уобаластааҕы Сэбиэтин бэрэссэдээ­тэлин солбу­йааччы Олег Иванцов, исполком экэ­ниэмикэҕэ кэмитиэтин тас экэнэмиичэскэй сибээстэргэ управлениетын начаалынньыга, экэниэмикэҕэ, бүддьүөккэ, үпкэ уонна хомунаалынай бас билиигэ бастайааннай хамыыһыйа бэрэссэдээтэлэ Антонина Ежова, социальнай эйгэни сайыннарыыга бастайаан­най хамыыһыйа бэрэссэдээтэлэ Олег Ядренцев, бырамыысыланнаска, тутууга, тырааныспарга, сибээскэ уонна ОДьКХ-ҕа бастайааннай хамыыһыйа бэрэссэдээтэлэ Дмитрий Згурскай, аграрнай боппуруостарга, экологияҕа, Чернобыль АЭС содулун туоратыы кыһалҕаларыгар бастайааннай хамыыһыйа бэрэссэдээтэлэ Александр Матарас, мандакка, сокуоҥҥа, олохтоох уонна бэйэни салайы­ныыга бастайааннай хамыыһыйа бэрэссэдээ­тэлэ Андрей Кривоносов уо.д.а. кыттыыны ыллылар.

KVA 0687

Спикер Алексей Еремеев Саха сирин бырамыысыланнай уонна инвестиционнай кыах­тарын туһунан иһитиннэриини оҥороругар, Хоту дойду бырамыысыланнаһыгар уонна тыа хаһаайыстыбатыгар Белоруссия тиэхиньикэтэ олус наадалааҕын бэлиэтээтэ. Алексей Ильич этэринэн, бу Сөбүлэҥ биһиги өрөспүүбүлүкэбит уонна Гомельскай уобалас судаарыстыбаннай бүддьүөттэрин сокуонунан сүрүннүүргэ үчүгэй төрүөт буолуоҕа. «Экэнэмиичэскэй, култуурунай, научнай ситиммит өссө бөҕөргүүрүгэр олук ууруллар», – диэтэ Алексей Еремеев. Кини парламентарий-кэллиэгэлэрин Саха сиригэр ыһыахха ыҥырда.

Гомельскай уобалас Сэбиэтин бэрэссэдээтэлэ Екатерина Зинкевич маннык Сөбүлэҥнэри түһэрсии судаарыстыбаннай былаас уорганнарын үлэлэрин быраактыкатыгар бигэтик киирбитин эттэ:

– Арассыыйа эрэгийиэннэрин кытта бииргэ үлэлээһиигэ Гомельскай уобалас исполкома 22, дьокутааттарын Сэбиэтэ 9 араас өрүттээх Сөбүлэҥи түһэрсибиттэрэ. Саха Өрөспүүбүлүкэтин аатыттан 2012 сыллаахха оччотооҕу вице-бэрэсидьиэҥҥит Дмитрий Глушко илии баттаспыта.

Гомельскай уобалас Белоруссия 1/5 чааһын ылар. Нэһи­лиэнньэтин ахсаана 1 мөл. 400 тыһ. киһи. Дойду оҥорон таһаарар бородууксуйатын (ВВП) 10 бырыһыана манна оҥоһуллар. Сэбиэппитигэр 2018 сыллаахха барыта 60 дьокутаат талыллыбытыттан, күн бүгүн 51-рэ үлэлии сылдьар. Араас хайысхаларынан биэс бастайааннай хамыыһыйа тэриллибитэ.

Парламентарийдар хардарыта үлэлэрин билиһиннэрэн кэпсээтилэр, уопут атастас­тылар, сэҥээрэр ыйытыыларыгар хоруйдаатылар, бииргэ үлэлэһии былаанын торумнаатылар.

Санаттахха, 2013 с. олунньу 14 күнүгэр эргиэн-экэнэмиичэскэй, научнай-тиэхиньии­чэскэй, социальнай уонна култуурунай эйгэлэргэ бииргэ үлэлэһэр туһунан Сөбүлэҥҥэ СӨ Бырабыыталыстыбата уонна Беларусь Өрөспүүбүлүкэтин Гроднай уобалаһын ситэриилээх кэмитиэтэ илии баттаспыттара.

 Оробуочай көрсүһүү чэрчитинэн Гомель уобаластааҕы Сэбиэтин дьокутааттарын уонна бастайааннай хамыыһыйаларын кытта кэккэ көрсүһүүлэр ыытылынныллар. Бу түһэрсиллибит Сөбүлэҥ сокуону оҥорорго уонна дьокутааттар үлэлэрин уопутун кэҥэтэргэ, Арассыыйа уонна Белоруссия сокуоннарыгар сөп түбэһэн үлэлииллэрин ситиһэргэ, бэрэстэбиитэллээх уорганнар икки ардыларыгар сибээһи бөҕөргөтөргө, нуорма-быраап аахталарын уон­на олор бырайыактарын аналитическай, методическай матыры­йаал­ларын хардарыта атастаһарга сыалланар.

Гомельскай уобалас Сэбиэтин кытта Сөбүлэҥ Ил Түмэн атын судаарыс­тыба бэрэстэбиитэллээх уорганын кытта түһэрсибит иккис улахан докумуона буолар. Ити иннинэ Соҕуруу Кэриэйэ Кёнсанбук-до провинциятын парламенын кытта бииргэ үлэлэһэр туһунан Меморандум 2019 с. бэс ыйын 29 күнүгэр баттаммыта.

Оҥорон таһаарар эбийиэктэргэ

Оробуочай сырыы бастакы күнүгэр Ил Түмэн дьокутааттара Гомельскай уобалас технопааркатыгар уонна кондитерскай фаб­рикатыгар сырыттылар.

Сэбиэскэй кэмҥэ кинескоп оҥорор собуот оннугар тутуллубут «Коралл» технопаарка быйыл сайын үлэҕэ киирбит. «Агентство развития и содействия инвестициям» өрөспүүбүлүкэтээҕи унитарнай сервиснэй тэрилтэ филиала эбит.

KVA 0672

Технопаарканы тэрийбит соруктара – дьоҕус инновационнай тэрилтэлэри сайын­нараары, стартаптары өйөөрү, НИОКР түмүктэрин коммерциялааһыны түргэтэ­тээри, аан дойду ырыынагар күрэстэһэр кыахтаах технологиялары, табаардары уонна өҥөлөрү оҥороору. Үчүгэйэ диэн, резиденнэригэр хостору, саалалары чэпчэки сыанаҕа уларсаллар эбит. Ол иһин коворкинг-кииҥҥэ аныгы технологиялары туһанан, кэмпириэнсийэлэри ыыталлар, араас үөрэхтэри, стартаптары сайыннарар өҥөлөрү оҥороллор эбит. Бу технопаарка үөрэх тэрилтэлэрин уонна бырамыысыланнай хампаанньалары кытта бииргэ үлэлэһэр. Резиденнэр тэрилтэлэр сакаастарынан оҥорон таһаарыы кыһалҕаларын быһаараллар.

«Иннопарк» оҕо киинигэр экскурсия­ны дириэктэр Наталья Олейник ыытта. Манна оҕолор араас хайысханан дьарыктаналлар: роботехникаҕа, көмпүүтэри бырагыраамалааһыҥҥа, көмпүүтэр графикатын оҥорууга, 3D моделированиеҕа, о.д.а. куруһуоктарга сылдьыан баҕалаах баһаам эбит.

KVA 0518

Парламентарийдар технопааркалары судаарыстыба төһө өйүүрүн, технопаарка уонна «Иннопарк» хайдах бииргэ үлэлэһэллэрин, саҥа резиденнэри тардар ньымаларын сэҥээрэн ыйыттылар. Бастатан туран, Ил Түмэн бэрэссэдээтэлэ Алексей Еремеев саха айтишниктара аан дойду таһымыгар аатырбыттарын, ону тэҥэ Уһук Илин уокурукка  өрөспүүбүлүкэ IT салааҕа лиидэр буоларын туһунан кэпсээтэ. Норуот дьокутааттара технопаарка матырыйаалынай базата сөҕүмэр үчүгэйин, үрдүк таһымнаах каадырдарынан хааччыллыылаахтарын хайҕаатылар.

Итини сэргэ «Белгос­пищепром» концерҥҥа киирэр «Спартак» ААО СП кондитерскай фабрика үлэтин-хамнаһын кытта билистилэр. Саха сирин ыалдьыттарыгар хас да сыахха оҥорон таһаарыы бырассыастарын көр­дөрдүлэр. Генеральнай дириэктэр Олег Жидков фабрикатын сайдар стратегията бородууксуйа ассортименын хаҥатыыга уонна хаачыстыбатын үрдэтиигэ көрөрүн эттэ. Бородууксуйалара тас дойдуларга тахсар эбит,  чуолаан Кытай уонна Монголия ырыынагар хамаҕатык барарын бэлиэтээтилэр.

KVA 0168

Белоруссия өрөспүүбүлүкэтигэр мин­ньигэһи уонна полуфабрикаттары оҥорон таһаарар фабрикалартан «Спартак» биир бөдөҥнөрө буолар. Эмтиир-чэбдигирдэр дьайыылаах бородууксуйаны киллэрэн туран, кондитерскай оҥоһук 350-тан тахса көрүҥүн манна оҥороллор. Фабрика 1924 с. тэриллибит. Күн бүгүн бисквитнэй, карамельнай, вафельнай, кэмпиэт-сакалаат сыахтара дохуоттаахтык үлэлииллэр.

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением