Издательский дом Редакция Подписка
Погода в Якутске: . 7 oC

Ил Дархан Айсен Николаев Ил Түмэҥҥэ туһаайан этиитин тула норуот дьокутааттара санааларын үллэстэллэр.

Ил Дархан Айсен Николаев Ил Түмэҥҥэ туһаайан этиитин тула норуот дьокутааттара санааларын үллэстэллэр.

Ил Түмэн Сир сыһыаннаһыыларыгар, айылҕа баайын уонна экологияҕа сис кэмитиэтин бэрэссэдээтэлэ Сахамин Афанасьев:
— Ил Дархан Айсен Николаев бэлиэтээбитинэн, 2022 сылга ойуур баһаарыттан бохсууга ылыллыбыт дьаһаллар көдьүүстэрэ биллэрдик үрдээтэ, баһаартан сэрэхтээх буолууга бэлэмнэнии тэрээһиннэрин үбүлээһин улаатта. Быйыл ойууру баһаарын бохсууга федеральнай бүддьүөттэн былааннаах үбүлээһин 5,5 төгүл улаатан 1,6 млрд солк., ону тэҥэ өрөспүүбүлүкэ өттүттэн ойууру баһаартан харыстыыр боломуочуйалары олоххо киллэриини үбүлээһин 2,4 төгүл улаатан, 912 мөл. солк. буолла. Ойуур баһаарын бохсор баһаарынай сулууспа үлэһиттэрин ахсаана икки төгүл, салгынынан кэтээн көрүү бириэмэтэ түөрт төгүл улаатта, ойууру баһаарыттан сэрэтэр уонна быыһыыр сулууспалар барыта 172 тиэхиньикэнэн хааччылыннылар.
Ойуур баһаара турар кэмигэр бэлэмнэниигэ, РФ Айылҕа харыстабылын министиэристибэтин уонна Ойуур хаһаайыстыбатын федеральнай агентствотын кытта холбоһуктаах улахан үлэ ыытылынна, ол түмүгэр ааспыт сыллардааҕар улахан хоромньута суох ааста.
Нэһилиэнньэлээх пууннары, инфраструктура эбийиэктэрин, ойуур баһаарыттан харыстыыр аналлаах быраап аахталарыгар уларытыылары киллэрии үлэтэ салҕанан барар.
Ахсынньы 13 күнүгэр Федерация Сэбиэтин киэҥ ыҥырыылаах мунньаҕар Саха Сирин парламенын көҕүлээһининэн, ойуур баһаарын бохсор кыраныысса кээмэйин көннөрүү көрүлүннэ. Билиҥҥи ирдэбилинэн, ньиэби уонна ньиэп бородууктатын харайар эбийиэктэр уонна ойуур кыраныыссатын икки ардылара 50 миэтэрэ тэйиччи. Ол иһин оҥорон таһаарар эбийиэктэр куттала суох буолууларын хааччыйар инниттэн кыраныыссаларын 50-тан 100 миэтэрэҕэ диэри тэйиччи буоларын курдук уонна минерализованнай балаһа иэнин 10-тан 30 миэтэрэҕэ диэри кэҥэтэргэ туруорустубут. Федерация Сэбиэтин мунньаҕын түмүгүнэн РФ Айылҕа харыстабылын министиэристибэтэ уонна Ойуур хаһаайыстыбатын федеральнай агентствота 123-с №-дээх ФС уонна Арассыыйа Бырабыыталыстыбатын 1479 №-дээх уурааҕар уларытыылары киллэрии туһунан боппуруоһу көрдүлэр.
Итини таһынан Ил Дархан халаан уутун утары дьаһаллары хааччыйар наадатын тоһоҕолоон бэлиэтээтэ. Федерация Сэбиэтигэр Саха Сирэ киллэрбит Өлүөнэ өрүс тардыытын чэбдигирдии тэрээһиннэрин Арассыыйа уутун эбийиэктэрин экологическай чэбдигирдии федеральнай бырайыагар киллэрэр туһунан этиитин өйөөтүлэр. Ол уу кутталлаах дьайыытыттан нэһилиэнньэлээх пууннары харыстыаҕа.
Бу бырайыакка канализационнай-ыраастыыр тутуулары, уу кытылларын ыраастааһын тэрээһиннэрин ыытыы, уу эбийиэгин түгэҕин дириҥэтии, биэрэк сиҥниитин тохтотуу,  уу анныгар сытар суудуналары хостооһун үлэлэрэ киириэхтэрэ.
Кэлэр 2023 сылы Ил Дархан Айсен Николаев Үлэ сылынан биллэрдэ, ол чэрчитинэн биһиги Саха Сирэ сайдарыгар, норуоппут олоҕун уйгута тупсарыгар, тулалыыр эйгэни харыстыырга үлэбитин күүһүрдүөхпүт.

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
Уопсастыба

Төлөпүөнтэн тутулуктаныы

Аныгы киһи төлөпүөнүн туппутунан утуйар уонна уһуктар, үлэбитин быһаарсабыт, онтон…
19.05.24 12:53