Издательский дом Редакция Подписка
Погода в Якутске: . 10 oC

Сарсыарда 9 чаас саҕана Дьааҥы куорат баһылыга Михаил Садовников төлөпүөнүнэн эрийдэ. Бүгүн 160 ынах сүөһү кыстаан турар хотонугар, ону тэҥэ 1000-тан тахса куурусса тутуллан турар миэстэтигэр сылдьыахтаахпыт.

Сарсыарда 9 чаас саҕана Дьааҥы куорат баһылыга Михаил Садовников төлөпүөнүнэн эрийдэ. Бүгүн 160 ынах сүөһү кыстаан турар хотонугар, ону тэҥэ 1000-тан тахса куурусса тутуллан турар миэстэтигэр сылдьыахтаахпыт.

bddec178 a597 4aa2 8a03 1f580ba40914

Тымныы чыпчаала бэлиэтэммит сирэ, бэйэтин соругун толору эппиэттииргэ дылы, таһырдьа -52 кыраадыс тымныы. Өр гыммакка сылдьыахтаах сирбитигэр кэллибит. 2013 сыллаахха тутуллубут хотон иһигэр киирбиппит, ыанньыксыттар уонна субан сүөһү көрөөччүлэр үлэлэрин үмүрүтэн эрэр эбиттэр. Хотоҥҥо 167 ынах сүөһү кыстаан, ол иһигэр 100-кэ ыанар ынах турар эбит. Ыанньыксыттар Раиса Старостина, Зоя Потапова билиҥҥитэ 50-нуу ынаҕы ыы сылдьаллар. Зоя Иннокентьевна хас биирдии ынаҕын ааттаан, майгытын-сигилитин хайгыыр, киһи курдук кэпсэтэр. «Быйыл халаан уута хотоммут аллараа өттүгэр тиийэ ылбыта. Инньэ гынан арыый сөрүүн диэххэ сөп.

Билиҥҥитэ кэлэр сылга тиийэр оттоохпут. Былырыын атыыр оҕус ылыммыппыт. Инники ынахтар сиэмэнэн буоһанар этилэр. Оннук ньыма ордук дии саныыбын. Ынахтар биир ый иһигэр бары төрөөн, үрүҥ илгэ хото ыанара. Арай биир итэҕэһэ, ньирэйдэр кыраларыгар иринньэх соҕус буолар эбиттэр. Ол эрэн үчүгэйдик, кыһамньылаахтык көрдөххө тута төлөһүйэллэр. Көрөргүт курдук, сүөһү сааҕын илиибитинэн таһаарабыт. Онно анал киһи үлэлиир. Манна диэн эттэххэ, көрдөһүүлээхпит. Ити саах таһаарар таачыкабыт алдьанара бэрт. Күннэтэ отуччата кырынар буоллаҕа. Хайа да бэйэлээх таачыка оннугу тулуйбат ини. Кытаатан ити туһунан тиэрдээриҥ дуу. Кэпэрэтииптэн сырыы ахсын көрдөһөр олуона баҕайы курдук. Салаайааччыбыт Екатерина Алексеевна Портнягина туох баарынан көмөлөһөр, өйүүр. Хас сырыы ахсын ытамньыйар, этинэр сатамньыта суох, ол иһин ити эйиэхэ этэбин», - үлэ киһитэ Зоя Иннокентьевна хайдах баарынан, кыһалҕа кыһарыйыытын этэр.

77d6b9f4 ec04 4606 92ff 1d3ae2d1e68b

Куурусса сымыыта 25 солк.

c2a13dd4 4596 45bd 95ad 19b21711bfb0

Салгыы торбостор турар сирдэригэр аастыбыт. Торбосчут Мария Соловьева: «Торбосторбут, көрөргүт курдук, үчүгэйдик тураллар. Күҥҥэ иккитэ аһатабыт, уулатабыт. Сорох торбостор сайын төрөөбүт буолан, арыый кыралар. Сайын күөххэ таҕыстахтарына ситиһиэхтэрэ. Төрөөбүт ньирэйи нэдиэлэ буолан баран ийэтиттэн араарабыт. Уопсай «дьыссаакка» көрөбүт», - диэн, чахчы, ис сүрэҕиттэн ылсан үлэлиир киһи быһыытынан сэһэргиир.

e73c7939 9873 4a74 bfab 03deb8c4a598

Кууруссалар уопсай хотону кытта сыста, анал сиргэ тутуллан тураллар эбит. Билиҥҥитэ 1200 куурусса сырдык уоттаах хос иһигэр көҥүл сылдьаллар. Ол эрэн, киһи соһуйуоҕа, муоста ырааһа сөхтөрдө. Төһө да көҥүл сырытталлар, тахсар сирдэрэ анал эбит. Бу кууруссалары былырыын «Агростартап» бырагыраамаҕа кыттан, Татьяна Михайлова пиэрмэр быһыытынан ылбыт эбит. Көрөөччүнэн Илья Горохов үлэлиир. «Тутаах үлэһиппит. Ис сүрэҕиттэн ылсан туран үлэлиир», -  диэн бииргэ үлэлиир дьоно хайгыы кэпсииллэр. Күн ахсын 500-кэ тиийэ сымыыты хомуйаллар эбит. Өссө, Дьааҥыга кэлээри, аэропортка дьон үксэ сымыыт тутуурдаах сылдьалларын бэлиэтии көрбүтүм. «Кэлэргэр бэйэҥ да көрдүҥ ини, дьон сымыыт илдьэ кэлэллэрин. Хас биирдии киһи иккилии лотуогу ыйааһынын төлөөбөккө аҕалыан сөп. Биир сымыыт манна 25-30 солк. тэҥ. Биһиги биир сымыыты 25 солк. атыылыыбыт. Куурусса иитэргэ дьиэ сырдыга олус улахан оруолу ылар. Дьиэ бороҥуй буоллаҕына, үчүгэйдик сымыыттаабат буолан хаалаллар. Астара уотурба. Ону таһынан балык, араас битэмииннэри астарыгар эбэбит», – көрөөччү Ылдьаа кэпсиир.

Чахчы да элбэх сымыыт тахсар эбит. Үлэһиттэр биэдэрэнэн сымыыты хомуйаллар. Онтуларын аны ыраас уунан сууйан, туһааннаах хааларга харайаллар. Бу Аартыка сиригэр маннык түргэнник ситэр кыыллары тутар экэнэмиичэскэй уонна доруобуйа да өттүнэн барыстаах, туһалаах салаа буоларын, манна үлэлии-хамсыы сылдьар дьоннор бэйэлэринэн туоһулууллар.

«Баҕар, бэйэбит да буруйдаахпыт буолуо»...

Хотону, кууруссалар турар сирдэрин көрөн баран сынньанар хоско олорон астына сэһэргэстибит. Үлэһиттэр биир хомойоллоро, эдэр ыччат тыа хаһаайыстыбатыгар улаханнык сыстыбат буолбутун бэлиэтииллэр. «Баҕар, бэйэбит да буруйдаахпыт эбитэ дуу. Оҕолорбутун, ыччаттарбытын хайдах эмэ гынан, тыа хаһаайыстыбатын курдук ыарахан үлэҕэ сыһыарбатахпыт. Оччолорго, хотоҥҥо үлэ барыһа, кэскилэ суох салаа курдук этэ. Туох да көмө, өйөбүл, ол туһунан кэпсэтии да суох кэмнэрэ этилэр. Билигин, үөһэттэн өйөбүл баар кэмигэр үчүгэйдик ылсан үлэлээтэххэ барыстаах салаа буолла», - диэн кэпсэтиибит быыһыгар санааларын эттилэр.

Сороҕор, киин улуустарга нэһилиэктэргэ сырыттахха сүөһү, сылгы ахсаана аччыы турарын туһунан элбэх кэпсэтиилэр тахсааччылар. Ардыгар, маннык кэпсэтиилэргэ ыччат тыа хаһаайыстыбатыгар сыстыбат буолбутун буруйдуур да курдук саҥалар иһиллээччилэр. Онтон ыччат иннигэр эппиэтинэһи ылынан, буруйдаах курдук саҥаны хаһан да истибэтэҕим. Баҕар, бу төһөнөн ыраах олорор буоллахха, кыһалҕаны, уустугу бэйэҕинэн тэҥнээн, сыаналаан көрөргүттэн буолаарай? Туох да диэбит иһин, эппиэтинэһи ылыныы улахан сорук.

 

  • 4
  • 1
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
Уопсастыба

Киин көмөлөһөр

«Берегиня» дьиэ кэргэҥҥэ оҕону иитиигэ көмөлөһөр киин Дьиэ кэргэҥҥэ элбэх өҥөнү оҥорор…
23.05.24 15:28