ОДьКХ өҥөтүн тарыыба муҥутуур 9 бырыһыан үрдүөҕэ, онуоха тарыып үрдээһинин туһунан бүтэһиктээх быһаарыыны эрэгийиэн былаастара бэйэлэрэ быһаарыахтара. Маннык дойду Бырабыыталыстыбатын уурааҕа ахсынньы 1 күнүттэн күүһүгэр киириэҕэ.
Тарыып үрдээһинэ тымныы уонна итии ууга, электроэнергияҕа, ититиигэ, гааска уонна бөҕү таһыы иһин төлөбүрдэри таарыйыаҕа. Санаттахха, дойду Бырабыыталыстыбата ОДьКХ тарыыптарын 2023 сыл от ыйын 1 күнүнээҕи үрдээһинин бу дьыл ахсынньы 1 күнүгэр көһөрбүтэ. РФ Экэниэмикэҕэ сайдыытын министиэристибэтэ быһаарыытынан, дойду үрдүнэн тарыып үрдээһинэ ОДьКХ ситимин уонна инфраструктуратын сайыннарыыга, ону тэҥэ өҥөнү оҥоруу хаачыстыбата оннунан хааллар кыахтааҕын чопчулаатылар.
Оттон аныгыскы тарыып үрдээһинэ болдьоҕун быһыытынан, 2024 сыл от ыйын 1 күнүгэр күүтүллэр. Биэдэмистибэҕэ суоттуулларынан, ахсынньы 1 күнүттэн үс киһилээх ыал төлөбүрүн суумата ыйга ортотунан 324 солк. улаатыаҕа, 248 солк. — 2024 сыл от ыйын 1 күнүттэн уонна 221 солк. — 2025 сыл от ыйын 1 күнүттэн.
-
0
-
0
-
0
-
0
-
0
-
1
