Саха маастардарын сатабылларын пуорум бары ыалдьыттара уонна кыттыылаахтара бэркэ биһирээтилэр, сөҕө-махтайа көрдүлэр. Ил Дархан: «Бу дэҥҥэ көстөр култуурунай бырайыак. Искусство дьиҥнээх айымньыта», - диэн сыаналаата.
Саха Сирин улахан каартата бүтүннүү илиинэн быысапкаламмыт. Кинини бырайыак идиэйэтиттэн саҕалаан, «Сомоҕолоһуу» айар бөлөх олоххо киллэрбит. Айар бөлөҕү өрөспүүбүлүкэ норуот маастара, РФ уопсай үөрэхтээһинин бочуоттаах үлэһитэ Людмила Петровна Жиркова салайар. Састаабыгар СӨ култууратын үтүөлээх үлэһитэ Ульяна Егоровна Миронова, СӨ үөрэхтээһинин туйгуна, Дьокуускай к. 33 № технология уонна ИЗО учууталларын методическай түмсүүлэрин салайааччыта Нюргуяна Викторовна Игнатьева, СӨ үтүөлээх архитектора, архитектура уонна куораты тутуу уобалаһыгар РФ Бэрэсидьиэнин бириэмийэтин лауреата Сергей Васильевич Миронов бааллар.
Сыл устата кэриэтэ салҕанан барбыт норуот маастардарын улахан үлэлэрэ түмүктэннэ. Ол түмүгэр уратытынан уонна толоруутунан суос-соҕотох уус-уран оҥоһук - Саха Өрөспүүбүлүкэтин быысапкаламмыт улахан каартата баар буолла. Арассыыйа норуоттарын култуурунай нэһилиэстибэтин Сыла түмүктэнэригэр бэртээхэй событие.
-
1
-
0
-
0
-
0
-
0
-
0
