Петр Петрович идэни талыыга туһуламмыт "Инникигэ көрүү'' төгүрүк остуолга тыл эттэ. Итиэннэ кытыыны ыллылар Абый улууһун нэһилиэнньэ дьарыктаах буолуутун киинин дириэктэрэ Татьяна Межова, Арассыыйа Ис дьыала Министиэристибэтин Абыйдааҕы салаатын начаалынньыгын солбуйааччы Мария Давыдова.
Петр Чехордун үрдүкү кылаастар оҕолоругар ,,На вахту 14" бырайыак сыалын-соругун туһунан кэпсээтэ. Ол эбэтэр хайдах бу бырайыак чэрчитинэн үрдүк хамнастаах, олоххо бигэ туруктаах дьон буолан тахсыахтарын быһаарда.
- Биллэрин курдук, билигин биһиги өрөспүүбүкэбитигэр икки эрэ баһыйар үрдүк дохуоттаах үлэ эйгэтэ баар, ол IТ уонна бырамыысыланнас, - диэн бэлиэтээтэ Петр Петрович. Кини оҕолору ыарахаттартан чаҕыйбакка, туруоруммут сыалларын ситиһэллэригэр ыҥырда.
Абый улууһун нэһилиэнньэ дьарыктаах буолуутун киинин дириэктэрэ Татьяна Межова ыччат идэни талыытыгар көмөлөөх судаарыстыбаннай өҥөлөр бу киин нөҥүө оҥоһуллаларын туһунан сырдатта. ИДьМ Абыйдааҕы салаатын начаалынньыгын собуйааччы Мария Давыдова өссө биир тутаах суолталаах, үрдүк эппиэттээх идэ туһунан билиһиннэрдэ. Полиция үлэһитэ хайдах буолуохтааҕын, бу идэни баһылыырга ханнык ирдэбиллэр баалларын уонна полиция үлэтин-хамнаһын сүрүн хайысхаларын сиһилии ырытта. ИДьМ уорганнарыгар сулууспаҕа талылларга үөрэх-билии таһымыгар, сиэр-майгы, дьыалабыай хаачыстыбаҕар уонна доруобуйаҥ туругар улахан болҕомто уурулларын чорботон эттэ.
Дириэктэр Владислав Окороков гимназияҕа идэни талыыга ыытыллар үлэ туһунан кэпсээтэ. Үөрэнээччилэригэр инники идэлэрин дьиҥнээхтик санааларын ууран, толкуйданан талалларыгар сүбэлээтэ, мантан кинилэр олохторо, алтыһар дьонноро уонна дохуоттарын таһыма тутулуктааҕын ыйда.
-
3
-
0
-
0
-
0
-
0
-
0
