Олохтоохтор аатырыттан куорат мэриятыгар уонна дьокутааттарга ыҥырыы сурук:
"Биһиги - Мииринэй, Араассыыйа олохтоохторо, 2023 сыллааҕы Саҥа дьыл бырааһынньыктааҕы салют ытыытыгар, бырааһынньыгы тэрийиигэ уонна бэлиэтииргэ үгүөрү үбү-харчыны ороскуоттаабаккытыгар көрдөһөбүт.
Куорат бастыҥ киэргэлэ - куорат архитектурата, болуоссаттара, уулуссалара буолаллар. Куораппыт сөптөөхтүк сырдатыллан турар, эбии иллюминациялаах, араас өҥнөөх уоту-күөһү мээнэ холбуур наадата суох. Суолтан-иистэн, дьиэ сарайыттан хаар, муус ыраастаннаҕына сөп.
Билигин хас биирдиибит хамнаһыттан туттаран, байыастарга атах таҥаһын, бронежилет, рация, дрон, о.д.а. атыылаһарга көмө аныыр.
Салюкка, сыаналаах саҥа харыйаҕа анаммыт үбү-харчыны кэмчилээҥҥит, биһигини үөрдүҥ, санаабытын уоскутуҥ.
Дойду үгүс эрэгийиннэригэр билигин эдэр огдообо ахсаана элбээтэ... Аҕаларын сүтэрбит оҕолор, 20-чэ саастаах уолаттары сүтэрбит төрөппүт элбэх. Бу дьоҥҥо харахтарыгар көрөрбүтүгэр кыбыстабыт. Соҕуруу уобаластарга дэлби тэптэриилэр буола тураллар, биир дойдулаахтарбыт олохторун олук уураллар.
Маннык сэрии кэмигэр бырааһынньык көр-күлүү тэрээһиннэрэ тохтотуллуохтаах!
Биһиги Арассыыйа, Саха Сирэ, Мииринэй үрдүк ааттарын сүгэбит - Арассыыйа гражданнарабыт. Бары күүһү, көмөнү байыастарга! Маннык быһаарыыны Казань ылыммыта! Мииринэй эмиэ ылыныахтаах!".
Санаттахха, Өрөспүүбүлүкэҕэ былааннаммыт Саҥа дьыллааҕы бырааһынньыктар оҕолорго тохтотуллубаттар, ол иһигэр "Ил Дархан Елката" диэн «Быһа кэпсэтии» биэрии кэмигэр, көрөөччү ыйытыгар, Ил Дархан Айсен Николаев хоруйдаабыта. Маны таһынан, тэрилтэлэргэ корпоративтары тэрийиини тохтоторго сүбэлээбитэ.
-Билигин биһиги дойдубут анал байыаннай дьайыыга кыттар. Манан сибээстээн, корпоративтары тэрийэр сыыһа дии саныыбын. Бары күүспүтүн байыастарга, көмөҕө ыытыахха наада, - диэн аҕа баһылык туһаайан эппитэ.
-
1
-
0
-
0
-
0
-
0
-
0
