Ил Түмэн дьокутаата Павел Ксенофонтов-Ойуур Байбал сахалыы тиэрмини оҥорууга тылбаас суолтатын, тылбаас үлэтэ сокуонунан хааччыллыытын туһунан кэпсээтэ. Кини этэринэн, тиэрминнэри сааһылааһын уонна саҥа киирэр тиэрминнэри сокуон быһыытынан бигэргэтии үлэтэ ыытыллыахтаах. Ол туһугар Тылы үөрэтэр, харыстыыр, сайыннарар киин иһинэн тиэрмин хамыыһыйата үлэлиэхтээх.
Норуот дьокутаата бэлиэтииринэн, Тыллар тустарынан сокуон ылыллыбыта 30 сыл ааста эрээри, бу сокуон тутуһулларын ким да ирдээбэт. Куорат иһинээҕи сурук-бичик улахан аҥаара нууччалыы. Онон Тыллар тустарынан сокуон күүскэ үлэлиирин ситиһиэхтээхпит.
Павел Валерьевич этэринэн, 2018 сыллаахха VI ыҥырыылаах дьокутааттар сокуоннары икки тылынан тэҥҥэ киллэрэргэ сорук туруоруммуттара. Быйыл ол сорук быһаарылынна. 2023 сыл тохсунньутуттан саҕалаан Ил Түмэҥҥэ сокуон барыта икки тылынан – нууччалыы уонна сахалыы киирэр. Бу барыл олоххо киирэригэр 5 600 тыһ. солк. көрүлүннэ.
Ил Түмэн документационнай управлениетын референэ Ирина Гаврильева сокуон сахалыы тылбааһыгар үлэлэһэ сылдьар. Кини бу үлэтигэр тиэрмин өттүгэр кыһалҕалар баалларын эттэ. Ол курдук, Ил Түмэҥҥэ 20 тахса сыл устата олоххо киирэн туттулла сылдьар итиэннэ тылбааска үөскээбит саҥа тиэрминнэр түмүллэн суут-сокуон эйгэтигэр үлэлиир тылбаасчыттарга анаан методическай босуобуйа быһыытынан тахсыахтаахтар.
Кэпсэтии түһүлгэтин түмүгүнэн резолюция ылылынна. Саха Өрөспүүбүлүкэтин Ил Түмэнигэр 4 этии туһаайылынна:
- нууччалыыттан сахалыыга, сахалыыттан нууччалыыга судаарыстыба иһинээҕи тылбааһынан, саха тылын судаарыстыбаннай ыстаатыһын өйүүр үлэ быһыытынан, дьарыктанар дьон үлэлиир бырааптарын көмүскүүргэ көмөлөөх Саха Өрөспүүбүлүкэтин сокуону оҥорор аактарын бэлэмнээһин;
- сокуон аннынааҕы аактар Саха Өрөспүүбүлүкэтин судаарыстыбаннай тылларыгар тылбаастарын Саха Өрөспүүбүлүкэтин Бырабыыталыстыбатын, Саха Өрөспүүбүлүкэтин Ил Түмэнин аһаҕас судаарыстыбаннай интэриниэт саайтарыгар тоҕоостоох кэмигэр таһааран нэһилиэнньэҕэ көрдөрүү;
- нууччалыы-сахалыы, сахалыы-нууччаалыы тута тылбааһы төрөөбүт тылы олоххо киллэрэр быраап быһыытынан туттууну кэҥэтии;
- бу тылбаас бырайыактарын олоххо киллэриини көҕүлээһин: а) Саха Өрөспүүбүлүкэтин Бырабыыталыстыбатын, Саха Өрөспүүбүлүкэтин Ил Түмэнин аһаҕас судаарыстыбаннай интэриниэт саайтарыгар тиэрмин, номенклатура бэлиэтин, дьыала истиилин сомоҕо ситимин (клише) нууччалыы-сахалыы электроннай тылдьытын оҥоруу уонна таһаарыы; б) Саха Өрөспүүбүлүкэтин национальнай бибилэтиэкэтин саайдыгар уус-уран тылбаас холобурдарын электроннай хомуурун оҥоруу.
-
1
-
0
-
0
-
0
-
0
-
0
