Сахабыт сиригэр быйылгы Оонньуулар от ыйын 7 күнүгэр диэри буолаллар. Бэлэмнэнии үлэтэ киэҥ далааһыннаахтык ыытылынна. Тапталлаах киин куораппыт – дьоллоох Дьокуускай, сахалыы сиэринэн, ыраахтан кэлбит ыалдьыттары күн-түүн суунан-тараанан, киэргэйэн тупсан көрүстэ.
Киэһэ 20.00 чаастан «Саха» НКИХ, «Якутия 24”, “Матч ТВ”, “Мамонт” телеханаалларынан быһа эпииргэ көһүннэ уонна «Тэтим» араадьыйаҕа таҕыста. Үөрүүлээх тэрээһин үс омук тылынан тэриллэн ыытылынна: нууччалыы, сахалыы уонна эбэҥкилии. Оонньуу аһыллыытын сценарийа саха төрүт үгэстэригэр олоҕурбут.
Тэрээһин Оонньуулар спортсменнарын уонна судьуйаларын параадыттан саҕаланна. Параады оонньуу кылаабынай судьуйата, успуорт үтүөлээх маастара, Казахстан үтүөлээх тириэньэрэ Мерей Акшалов салайан ыытта. Стадион устун аан дойду 24 дойдутуттан уонна Арассыыйа биэс уокуруктарыттан хамаандалар үөрүүлээх быһыыга-майгыга аастылар. Үгэс быһыытынан параады Саха сирин сүүмэрдэммит хамаандата түмүктээтэ. Күрэхтэһии кыттыылаахтарын дойду Бэрэсидьиэнэ Владимир Путин аатыттан Арассыыйа успуордун миниистирэ Михаил Дегтярев эҕэрдэлээтэ.
Тэрээһин официальнай чааһын кэнниттэн Ил Дархан Айсен Николаев «Азия оҕолоро» норуоттар икки ардыларынааҕы успуорт Оонньуулары аһыллыбытынан иһитиннэрдэ. Ил Дархан оонньуулар өрөспүүбүлүкэлэҕэ эрэ буолбакка, бүтүн дойду үрдүнэн ураты суолталаахтарын ыйда. Ону таһынан кини өрөспүүбүлүкэ бастакы Бэрэсидьиэнэ Михаил Николаев оҕо-ыччат успуордун сайдыытыгар сүҥкэн кылаатын бэлиэтээтэ. VIII Азия оҕолоро» норуоттар икки ардыларынааҕы спортивнай оонньууларын уотун «Азия оҕолоро» оонньуу кыайыылааҕа, Арассыыйа алта төгүллээх чөмпүйүөнэ, Европа чөмпүйэнээтин үс төгүллээх кыайыылааҕа, Олимпийскай оонньуулар боруонса призердара, успуорт үтүөлээх маастара Георгий Балакшин уматта.
Аһыллыы сиэрин-туомун тэрээһинигэр Саха Сирин сүүрбэттэн тахса улууһуттан улахан дьону киллэрэн туран, 4 тыһ. кэриҥэ киһи кыттыыны ылла. Оонньуулар аһыллыыларыгар стадиоҥҥа эстафета уота күлүбүрүү умайда!
-
0
-
0
-
0
-
0
-
0
-
0
