Олохтоох бибилэтиэкэ сүрүн сыалынан-соругунан нэһилиэккэ баар түмсүүлэри ситимнээн, ыкса сибээстээхтик үлэлиир. Бу маннык үлэни тэрийии, нэһилиэк олоҕор-дьаһаҕар үтүө түмүктэрдээх буолар. «Күбэйэ» эбээлэр түмсүүлэрин өр сылларга Власьева Ксения Самсоновна, Кривошапкина Наталья Александровна айымньылаахтык салайан үлэлээбиттэрэ. Билигин Котоконова Надежда Васильевна салайар. «Иэйэхсит» уонна «Тымтык» түмсүүлэри Михайлова Нина Никитична салайан үлэлэтэр. Бибилиэтиэкэ биир сүрүн үлэтинэн оскуола оҕолорун, эдэр ыччаты хабан үлэлиир. Ол курдук оскуола оҕолоро уонна ыччаттар бибилэтиэкэҕэ сылдьан элбэхтик ааҕан, билсэн, билиилэрин–көрүүлэрин хаҥатталлар.
Биир сонун үлэнэн сыл устата 100 киһи үлэҕэ, олоххо санаатын суруйуохтааҕыттан 86 киһи суруйбут, 14 киһи суруйара хаалбыт. Ороһу нэһилиэгэ тэриллибитэ 120 сылыгар аналлаах “Ороһу оҕо сааһым дойдута” кинигэ сүрэхтэннэ. Бу кинигэҕэ Ороһу урукку, билиҥҥи олоҕун кэрэһэлиир элбэх ахтыылар бэчээттэннилэр. Маны таһынан "Күбэйэ" түмсүү “Эбээ үөрэҕэ” диэн 3 кинигэни таһаартарбыт.
Быйыл нэһилиэк баһылыга, СӨ норуотун хаһаайыстыбатын үтүөлээх үлэһитэ Анатолий Антонов уонна “Күбэйэ” түмсүү көҕүлээһиннэринэн, өрөспүүбүлүкэҕэ биллэр урбаанньыттар Дария, Алексей Скобелевтар Ороһу нэһилиэгэр саха балаҕанын тутуугар бэйэлэрин үптэрин-харчыларын бэлэх уунан, дьон-сэргэ махталын ылыан ылаллар. Билигин саха балаҕаныгар олохтоох бибилэтиэкэ уонна түмсүүлэр айар киэһэлэри, истиҥ көрсүһүүлэри тэрийэллэр, олохтоох нэһилиэнньэни сэргэхситэллэр.
- 1
- 0
- 0
- 0
- 0
- 0