Иннокентий Васильевич эдэр сааһыгар хапсаҕайдаһан оройуон күрэхтэригэр элбэхтик бастаабыта. Өрөспүүбүлүкэ күүстээх бэтэрээн тустууктарын, Саха АССР хапсаҕайга маастардарын Выбор Быкалыровы, Уйбаан Григорьевы оройуон ыһыаҕар кыайталаан турар.
Уолаттара Аскалон уонна Александр, аҕаларын утумнаан успуордунан дьарыктаналлар, хапсаҕайга успуорт маастардара. Аскалон, маны тэҥэ, ССРС көҥүл тустууга маастара. Спартак улуус күүстээх мадьыныта.
Уола Александр Иннокентьевич Нам нэһилиэгэр үһүс болдьоҕор баһылыгынан үлэлиир. Бу кэм устата нэһилиэк биллэ тубуста. Социальнай эбийиэктэр, ол иһигэр оскуола, уһуйаан, тыа сирин биир кэлим сайыннарыы бырагыраамматынан 2 кыбартыыралаах дьиэ тутулунна, уулуссаны сырдатар уот ситимэ тардылынна. Федеральнай хаарбах дьиэттэн көһөрүү бырагыраамматынан 16 кыбартыыралаах сабыс саҥа таас дьиэ үлэҕэ киирдэ. Саҥа тутуллубут элбэх оҕо оонньуур, успуорт былаһааккалара, стадион ыччаты түмэ тардар буоллулар. Сотору кэминэн култуура киинэ үлэҕэ киирэрин олохтоохтор күүтэллэр.
Иннокентий Кардашевскай 2022 сылга оҕолорун, сиэннэрин, хос сиэннэрин үөрүүлэригэр уйдаран 90 сааһын бэлиэтээбитэ.
Билигин, 91-с хаарыгар үктэммит ытык кырдьаҕас “Верхоян” диэн атын миинэн айылҕаҕа сылдьарын сөбүлүүр.
Бүгүн мин кинилиин көрсөн, кэпсэтэн, кырдьаҕас киһи алгыһын ыллым.
Үөһээ Бүлүү улууһун Балаҕаннаах нэһилиэгин баһылыга Степан Дмитриев
Ыам ыйын 16 күнэ 2023 сыл.
-
0
-
0
-
0
-
0
-
0
-
0
