Манифестка сигэнэн, 1923 сыл муус устар ыйыгар Байаҕантай улууһун Уолбатыгар үрүҥ хамсааһынын салайсыбыт П. И. Оросин, А. И. Говоров, М. П. Слепцов-Отоороп Саха АССР тэриллибитинэн, сэбиэскэй былааһы ылыналларын биллэрбиттэрэ. Быһатын эттэххэ, икки утарыта турбут хамсааһын бэрэстэбиитэллэрэ Уолба сиригэр кэлэн туран тупсубуттара, бэйэ-бэйэлэригэр доҕордуу илиилэрин ууммуттара.
Бүгүн, сэтинньи 1 күнүгэр, нэһилиэкпитигэр бу Манифест (Тупсуу) туолбутун туоһулуур Мэҥэ бэлиэни туруоруу дьоро тэрээһинэ буолан ааста. Бу туһунан биһиги эрэдээксийэбитигэр Екатерина Рахлеева, Макар Хара аатынан Уолба модельнай библиотекатын сүрүн үлэһитэ иһитиннэрэр.
Мэҥэ бэлиэ арыллыытын үөрүүлээх чааһыгар Таатта улууһун аҕа баһылыга Айаал Семенович Бурцев, Ил Дархан сүбэһитэ, биир дойдулаахпыт Георгий Дмитриевич Никонов, “Тааттаавтодор” тэрилтэ директора Иван Иванович Бочонин, улуустааҕы Норуот Айымньытын Дьиэтин директора Гаврил Гаврильевич Вырдылин кыттыыны ыллылар.
Улууспут аҕа баһылыга сэтинньи ый Таатта улууһугар Былатыан Ойуунускай сырдык аатын үйэтитии ыйынан биллэриллэрин иһитиннэрдэ. Бочонин Иван Иванович Мэҥэ бэлиэ туруоруллубут сүрүн сыалын-соругун билиһиннэрдэ. Гаврил Гаврильевич Вырдылин Тупсуу Таатта Уолбатыгар буолбутун, ону үйэтитэр тоҕоостооҕун аан бастакынан тылы көтөхпүт киһинэн биир дойдулаахпыт, Саха сирин суруйааччыларын сойууһун салайааччыта Гаврил Гаврильевич Андросов буоларын бэлиэтээтэ. Үөрүүлээх тэрээһиҥҥэ Уолба орто оскуолатын Ил Ситим оҕо тэрилтэтин бэрэссэдээтэлэ Дьулус Боппосов эҕэрдэтин эттэ.
Тэрээһин Мэҥэ бэлиэҕэ сибэкки дьөрбөтүн ууруунан түмүктэннэ.
-
4
-
0
-
0
-
0
-
0
-
0
