Бастыҥ ааты эр дьоҥҥо алта, кэрэ аҥаардарга сэттэ хамаанда былдьаста.
Спортсменнар бары олус бэлэмнээх кэлэн, кырасыабай тыҥааһыннаах оонньууну көрдөрдүлэр. Россия спордун үтүөлээх маастара Алена Дмитриева бэйэтин оонньуутунан хамаандатын көҕүлүүрүүн астына бэлиэтиэххэ сөп. Атын да хамаандаларга спорт маастардара төһүү күүс буоланнар, инники күөҥҥэ тахсыахтарын таҕыстылар.
Икки күннээх сытыы киирсиилэр кэннилэриттэн:
Кэрэ аҥаардарга Нам бастакы, Сунтаар иккис, Чурапчы үһүс миэстэ буолла.
Эр дьоҥҥо Амма бастакы, Үөһээ Бүлүү иккис, Дьокуускай үһүс миэстэни ылла.
Кыайыылаахтарга, бастыҥ оонньооччуларга сүрүн бириистэри таһынан Гаврил Текеянов дьиэ кэргэнэ, чугас дьоно-сэргэтэ, уруулара-аймахтара, доҕотторо, биир дойдулаахтара, бииргэ үлэлээбит Ис дьыала отделын сотрудниктара спонсордар олохтообут сыаналаах бириистэринэн наҕараадаланнылар.
Горнай хамаанда пьедестал үктэлин көтүттэ. Ол эрэн, инники сыллардааҕар спортсменнарбыт оонньуута эбиллибит диэн бэлиэтиир наадалаах. Бэрт кыранан хаалабыт. Кэлэр өттүгэр элбэх үлэ күүтэр. Кылаабынайа дьоммут харахтарыгар уот баар. Түмсүүлээхтэр, кыайыыга дьулуурдаахтар. Өссө күүскэ дьарыктанан, инники күөҥҥэ тахсарга дьулуһуохтара, ситиһиэхтэрэ диэн эрэнэбит.
Күрэхтэһии кылаабынай судьуйата, СӨ сүүмэрдэммит хамаандатын тренерэ Константин Гаврильев горнайдар доруобуйаларын хааччахтаах дьон спордун өйөөн, усулуобуйа олохтоон, чемпионат бэркэ барда, улахан көмөнү оҥордулар диэн махтанна. Өссө сүбэлэһэн, Бэрдьигэстээххэ Саха сирин сүрүн хамаандата сүүмэрдиир дьарыктары ааһарын үөрэтэн көрүөххэ баар этэ диэн баҕа санаалаах.
Маннык улахан күрэхтэһии үрдүк таһымҥа ыытылларыгар улуус, Одуну нэһилиэгин салалтата улахан болҕомто ууран, биир дойдулаахтарын аатын үйэтитэн, Ил Дархан Граанын ылары ситиһэн, спонсордар итэҕэллэрин ылан спорт бырааһынньыгын бэлэхтээбитэ хайҕаллаах, махталлаах дьыала буолар.
Вячеслав Алексеев, Горнай.
"Үлэ күүһэ" хаһыат хаартыскалара.
-
0
-
0
-
0
-
0
-
0
-
0
