Ол курдук Бүлүү куоратын олохтооҕо Максимова Мария Васильевна ыам ыйын 6 күнүттэн түмэл быыстапкалыыр саалатыгар ≪Уруйдуубут Улуу Кыайыыны≫ диэн ааттаах улахан быыстапканы туруорда.
Быыстапка сүрүн сыала 1941-1945 сс. Аҕа дойдуну көмүскүүр Улуу сэриини эдэр ыччаттарга билиһиннэрии буолар. Бу сэрии бүтүн Россия олохтоохторун барыларын таарыйбыта. Оннооҕор кытыы сытар Саха Сирин дьонугар улахан хоромньуну, иэдээни аҕалбыта. Саха Сириттэн 62 тыһыынчаттан ордук киһи сэриигэ барбытыттан улахан аҥара төннүбэтэҕэ. Ол иһигэр Бүлүү улууһуттан 2 тыһыынча киһи фроҥҥа ыҥырыллан барбыта. Кинилэр ортолоругар Мария Васильевна аймахтара эмиэ бааллара. Кини дьонун хаартыскаларын сүрдээҕин харыстаан, бу күҥҥэ диэри барыларын чөкөччү тутан илдьэ сылдьара кэрэхсэтэр.
Итинник саҕалаан кини сэрии тиэмэтигэр араас хайысхалаах мунньубут саамай улахан колекциятынан значоктар буолаллар: Кыайыы күнэ, үбүлүөйдээх сыллара, Дьоруой куораттар, аармыйа араас хайысхалара, техникалара, дьоруойдар уонна сэриигэ сылдьыбыт артыыстар значоктара. Бу 2 тыһыынча кэриҥэ значок көстүүтэ үчүгэй буоллун диэн тус-туспа рамкаламмыта киһини сөхтөрөр уонна умсугутар.
Быыстапкаҕа олус кичэллээхтик оҥоһуллубут урукку уонна билиҥҥи паапкалар бааллар. Олор истэригэр эмиэ араас тиэмэлээх мааркалар, кэнбиэрдэр, открыткалар, хартыыналар угуллубуттар.
Бу быыстапка биир саамай болҕомтону тардар киэргэлинэн сэрии кэнниттэн кэлбит саллаат чымадаана буолла. Ол иһигэр баар саллаат арахсыспат маллара: ньуоскута, флягата, кура, курууската. Итини сэргэ киһи хараҕар быраҕыллар малларынан араас сылга тахсыбыт остуол киэргэллэрэ буолаллар. Олор бары да кэриэтэ ≪ Кыайыы≫ уордьана ойуулаахтар. Итилэри кытта ойуулаах тэриэлкэлэр, чааскылар сэргэстэспиттэр.
Оҕолор, уолаттар кэлэн бу быыстапканы эмиэ сэргээн көрөллөрүгэр анаан оонньуурдар бааллар. Ол курдук таҥка, сөмөлүөт, бэстилиэт, байыаннай массыына, остуолга биир үрдэли барытын ылбыттар. Мантан да элбэх араас барыта баар, ону киһи бэйэтэ кэлэн сирийэ көрдөҕүнэ эрэ сатанар курдук. Улуу Кыайыы 80 сыла сыл устата барар, онон бу быыстапка өссө ханна эмит туруоҕа диэн эрэнэбит.
Мария Васильевна олус баай коллекциялаах, мээнэ киһи маннык дьаныһан туран дьарыктаммат. Коллекциятын көрөн олорон өссө туох тиийбэтин, салгыы тугу булуохтааҕын билэр. Билигин Аҕа дойду Улуу сэриитин туһунан кинигэлэри мунньан эрэр, ол кинигэтэ үксэ саха дьоно сэриигэ сыһыанын билиһиннэрэ туруохтара диэн бигэ эрэллээх.
Мария Васильевнаҕа кэрэхсэбиллээх быыстапкатын иһин барҕа махталбытын тиэрдэбит. Коллекцияҥ күн-түүн эбиллэ турдун, тус бэйэҕэр доруобуйаны уонна дьолу баҕарабыт. Инникитин да араас коллекцияҥ дьон биһирэбилин ыла турдун!
Оксана Кычкина, СӨ үөрэҕириитин туйгуна, Учууталлар учууталлара, кыраайы үөрэтээччи, үлэ бэтэрээнэ.
-
0
-
0
-
0
-
0
-
0
-
0
