Тэрээһиҥҥэ төрөппүттэр, художественнай гимнастика федерацията хайдах курдук түмсүбүттэрэ, улахан кыргыттар кыра иитиллээччилэри сиэтэ сылдьаллара, үгүс спонсор өйөөбүтэ киин салайааччыта Мария Александрова таһаарыылаах үлэтин түмүгэ буолар. Октябрьскай нэһилиэк дьаһалтата хас да анал бириис олохтоото.
Сезону сабар маннык бэлиэ түгэҥҥэ улуус баһылыгын солбуйааччыта, федерация салайааччыта Валерия Владимирова баһылык, федерация аатыттан махтал суруктары туттарда. Төрөппүттэр тренердэргэ, федерацияҕа эмиэ махтанан сибэкки туттаран долгуттулар.
Турнир ытык ыалдьыттара, судьуйалара СӨ сборнайын тус бырагыраамаҕа старшай тренерэ Виолетта Никифорова, РФ спордун маастара, ДВФО чемпиона, дойду призера, СӨ сборнайын тренерэ Кристина Ксенофонтова от ыйын 14-19 күннэригэр улуус гимнасткаларыгар үөрэтэр дьарык ыыппыттара.
Турнирга барыта 15 потокка 75 оҕо кытынна. Үһүттэн 11-12 саастарыгар тиийэ оҕолор бааллар. Бу тэтимнээхтик сайдар спорт биир саамай кырасыабай көрүҥэр нэһилиэкпит талааннаах оҕолоро дьарыктаналларыттан үөрэбит.
Бокс кэннэ Ньурбаттан, Антоновкаттан Олимпиадаҕа аны художественнай гимнастика тиийээрэй. Ситиһиилэри баҕарабыт!
Октябрьскай нэһилиэк пресс-киинэ
-
0
-
0
-
0
-
0
-
0
-
0
