Бу күннэргэ Үөһээ Бүлүү улууһугар Маҥааска, Кырыкыйга, Боотулуу Көтөрдөөөҕөр оптика утаҕын тардыы барар. Бүлүү өрүс уҥуоргу нэһилиэктэригэр утаҕы тиэртилэр да, өрүс уҥа биэрэгэр сытар улуус кииниттэн ыраах баар нэһилиэктэргэ (Быракааҥҥа тиийэ) оптика утаҕын тардыахтара.
Билигин Үөһээ Бүлүү кииниттэн 120 км ыраах сытар Боотулуу нэһилиэгиттэн оптика утаҕын 80-ча нэһилиэнньэлээх Көтөрдөөх учаастагар утаҕы тардыы бара турар. Бу туһунан Боотулуу баһылыга Александр Поскачин: “Соторутааҕыта тирэх баҕаналарын туруорбуттара. Кабеллэрин ыам ыйын 1 күнүгэр аҕалан сүөкээн, билигин тарда сылдьаллар. Улуус салалтата «Ростелеком” ПАУо-ны кытта дуогабардаһан, улуус бүддьүөтүттэн эбии үп-харчы көрөн бу үлэлэр ыытылла тураллар. Үлэ кыраапыкыттан кыра хаалыы баар да буоллар, аны күһүҥҥэ диэри ыраах сытар нэһилиэктэр бары түргэн интэриниэккэ холбонуохтаахтар», - диэн кэпсээтэ.
Бу үлэҕэ олохтоох дьон эмиэ кытталлар. Норуоттар доҕордоһуулара уонна Үлэ Албан аатын III степеннээх уордьаннарын кавалера, Үөһээ Бүлүү улууһун аатырбыт тырактарыыһа, 72-с хаарын уулларбыт Николай Максимов уолаттарын кытта оптика утаҕын тардар биригээдэҕэ көмөлөһө сылдьаллар.
-
0
-
0
-
0
-
0
-
0
-
0
