От ыйын 9 күнүгэр Бүлүү куоратыгар ыытыллыбыт Балыксыт күнүн тэрээһинэ, олохтоох дьаһалта, куорат сэбиэтин дьокутааттара уонна Бүлүү улууһун айылҕа харыстабылын инспекциятын көҕүлээһиннэринэн, биллиилээх кыраайы үѳрэтээччи, Үлэ Дьоруойа П.Х. Староватов төрөөбүтэ 150 сылыгар ананна.
Улуустааҕы айылҕа харыстабылын инспекцията иhитиннэрэринэн, Бүлүү куорат мусуойун аннынааҕы биэрэккэ буолбут күрэххэ алта саастаах оҕоттон саҕалаан, барыта 53 киһи күөгүлээhин араас көрүҥнэригэр кытынна.
Балыксыттар күрэхтэрэ алгыhынан, тэрийэр хамыыһыйа эҕэрдэ тылынан саҕаланна. Бүлүү улууһун айылҕа харыстабылын судаарыстыбаннай инспекциятын салайааччыта Алексей Евсеев күрэх сыалын-соругун быһаарда.
Балаһыанньа быһыытынан биэс араас номинациянан балыксыттар үлэлэрин дьүүллүүр хамыыһыйа сыаналаата. Ити күн Бүлүү өрүс кумахтаах биэрэгиттэн күөгүһүттэр борохойу, тэҥэлини, кыһыл хараҕы, күстэҕи, алыһары, хаахынайы, бэл, сыа балыгы күөгүлээн ыллылар.
Хамыыһыйа маннык күрэхтэһиини сылын аайы ыытарга быһаарда.
-
0
-
0
-
0
-
0
-
0
-
0
