Уопсастыба

Оҕо барахсан улаатан ыраах сиргэ үөрэнэ барар, дойдутугар ытык иэһин толоро аармыйаҕа сулууспалыыр кэмигэр, ийэ барахсан хайдахтаах долгуйара буолуой? Оттон саамай иһирэх таптал тылларын ыраах сылдьар оҕо ийэтигэр хайдах тиэрдиэй? Ханнык даҕаны электроннай, телефонунан сибээс сурукка тиһиллибит, чуумпуга суруллубут тыллары ийэ сүрэҕэр сатаан тиэрдибэттэрэ чахчы. Онон бүгүн «Ил Түмэн» издательскай дьиэ уонна “Почта России” АУо федеральнай почта сулууспатын Саха сиринээҕи управлениета Ийэ сылын чэрчитинэн, “Ийээ, мин эйигин таптыыбын!” диэн аахсыйаны саҕалаабыта кинилэргэ ордук чугас буолара саарбахтаммат.

Аахсыйа дойдубут тэбэр сүрэҕэр – Москуба куоракка саҕаламмыта мээнэҕэ буолбатах: киэҥ Арассыыйа судаарыстыбатын хас биирдии олохтооҕор Москуба куорат күндү, хас биирдиибит тэбэр сүрэҕэр – ийэбит!

Аахсыйаны саҕалыыр тэрээһин Москубаҕа бүгүн, олунньу 25 күнүгэр, Арассыыйа Федерациятыгар Саха Өрөспүүбүлүкэтин Бастайааннай бэрэстэбиитэлэстибэтигэр ыытылынна. Бу олус истиҥ, хас биирдии киһиэхэ чугас аахсыйа тэрийээччитэ “Ил Түмэн” издательскай дьиэ салайааччыта, Ил Түмэн дьокутаата Мария Христофорова кэпсэтиини саҕалыырыгар маннык эттэ:

-- Быйылгы сыл биһиги өрөспүүбүлүкэбитигэр ураты сыл. Ол курдук, Саха АССР төрүттэммитэ 100 сыла, Дьокуускай куорат 390 сыла, итиэннэ Ил Дархан Айсен Николаев көҕүлээһининэн, Ийэ сыла биллэрилиннэ. Бу аахсыйа чэрчитинэн, ийэлэргитигэр истиҥ-иһирэх тыллардаах суруктары суруйаҥҥыт ыытыаххыт. Маныаха мин партнердарбытыгар: “Почта России” федеральнай почта сулууспатыгар, “КОЛМАР” чох хостуур хампаанньаҕа уонна Мииринэй куорат типографиятыгар махталбын тиэрдэбин. Аахсыйаны Дьахталлар аан дойдутааҕы күннэрин иннинэ саҕалаатыбыт, уонна сэтинньигэ, Ийэ күнүгэр, түмүктүөхпүт. Ахсынньыга хас сурук ыытыллыбыт түмүгүн таһаарыахпыт. Билигин дойду үрдүнэн буола турар быһыы-майгы барыбытын долгутар. Ордук аармыйаҕа сулууспалыы сылдьар уолаттар ийэлэрин долгутара, кинилэр сүрэхтэрин ытырыктатара саарбахтаммат. 

Саха Өрөспүүбүлүкэтин Бастайааннаай бэрэстэбиитэлин солбуйааччы Юрий Кравцов кини эмиэ аккырыыкка туппутун, ону бүгүн толорон күндү киһитигэр сурук ыытарын эттэ. Ийэ сылыгар илиинэн суруллубут аккырыыкка ордук өйдөбүнньүк буоларын, маннык истиҥ тыллардаах суругу тутар икки төгүл минньигэһин эттэ. Бү үтүө саҕалааһын Уһук Илин устудьуоннарын, саллааттарын таһынан, бүтүн дойду, тас дойду ыччаттарын хабарыгар баҕа санаатын тириэртэ.

Видеокэмпириэнсийэ киэбинэн ыытыллыбыт үөрүүлээх тэрээһиҥҥэ араас куоракка үөрэнэ сылдьар саха устудьуоннара холбонон, аахсыйаны сэҥээрбиттэрин, олус астыммыттарын эттилэр. Москуба куоракка Саха сириттэн сылдьар устудьуоннар түмсүүлэрин лиидэрэ Артем Инхеев: “Дойду хантан саҕаланарый? Дьиэ кэргэнтэн. Дьиэ кэргэн -- ийэттэн”, -- диэн туран, биир дойдулаах ыччаттар тэрээһини өйүүллэрин эттэ.

Новосибирскай, Екатеринбург уонна Владивосток куораттарга үөрэнэр саха ыччаттарын түмсүүлэрин салайааччылар истиҥ-иһирэх махтал тылларын этэн тураннар, хас биирдиилэрэ ийэлэригэр суруктары суруйарга бэлэмнэрин биллэрдилэр.

Мария Христофорова устудьуоннарга үөрэхтэригэр ситиһиини баҕарда. Аахсыйаны өйөөн, үөрэнэр кыһаларын таһыгар хаартыскаҕа түһэллэригэр, хас биирдии Саха сирин устудьуона, саллаата кыттарыгар ыҥырда.

Санатан эттэххэ, аахсыйа чэрчитинэн киин куораттар уонна Сибиир үрдүк, орто үөрэҕин кыһаларын устудьуоннара, Саха сириттэн Уһук Илин федеральнай уокурук байыаннай чаастарыгар сулууспалыы сылдьар саллаат уолаттар ийэлэригэр дьэрэкээн аккырыыккаларга истиҥ тылларын, тапталларын билинэн ыытыахтара. Аккырыыккалары «Ил Түмэн» издательскэй дьиэ дизайнердара сахалыы уонна нууччалыы тылынан оҥордулар.

Аахсыйа ийэҕэ тапталы уонна ытыктабылы биллэрэр, эдэр дьоҥҥо дьиэ кэргэн оруолун күүһүрдэр, устудьуоннар уонна саллааттар социальнай актыыбынастарын өрө көтөҕөр сыаллаах. Саллааттарга уонна устудьуоннарга аккырыыккалары «Почта России» АУо тиэрдиэҕэ, кинилэргэ Уһук Илин федеральнай уокурукка Саха Өрөспүүбүлүкэтин Бастайааннай бэрэстэбиитэлэстибэтэ көмөлөһүөҕэ. Аахсыйаҕа кыттарга «Тапталлаах ийэбэр» эбэтэр «Любимой маме» аккырыыкканы илиинэн толорор ирдэнэр. Маныаха сурук тиийиэхтээх аадырыһа, анаммыт киһитин аата-суола суруллар. Итиэннэ ийэҕэ анаан саамай истиҥ, долгутар баҕа санаа суруллар.