Уопсастыба

Люция Степановна – ССРС култууратын туйгуна, Арассыыйа анал профессиональнай үөрэхтээһинин бочуоттаах үлэһитэ, култуура, ускуустуба эйгэтигэр киллэрбит кылаатын иһин Г.В. Свиридов аатынан мэтээл квалера, Учууталлар учууталлара, Саха Өрөспүүбүлүкэтин норуотун маастара, «Саха Өрөспүүбүлүкэтигэр норуот уус-уран оҥоһуктарыгар кылаатын иһин», Ил Дархан «Дьиэ кэргэн килбиэнэ», Таатта улууһун «Төрөппүт ытык эрэлэ», «Орто Амма уонна Амма нэһилиэктэрин сайдыытыгар кылаатын иһин» бэлиэлэрдээх, Орто Амма нэһилиэгин бочуоттаах олохтооҕо.

Галерея саалатын толору учуутал уонна үөрэнээччилэрин хартыыналара, мас оҥоһуктара, куукулалар, хаартыскалар турдулар. Араас сылларга үөрэппит, үтүөҕэ-кэрэҕэ уһуйбут үөрэнээччилэрэ: Арассыыйа Худуоһунньуктарын сойууһун чилиэнэ, билиҥҥи кэм бастыҥ худуоһунньуга Иннокентий Корякин, Саха сирин Куукула оҥорооччуларын сойууһун чилиэнэ, өрөспүүбүлүкэтээҕи “Бал кукол. Снежная долина” күрэхтэһии үс төгүллээх дипломана Саргылаана Слепцова, Харбалаахтааҕы оҕо ускуустубатын оскуолатын уһуйааччыта Лидия Карпова кыттыыны ыллылар.

Люция Степановна үөрэппит оҕолорун ааттара өрөспүүбүлүкэҕэ эрэ буолбакка, Арассыыйа, омук сирин үрдүнэн кытта биллэр. Ол курдук, Иннокентий Корякин, Николай Огонеров – Арассыыйа таһымнаах биллэр худуоһунньуктар, Лидия Карпова – элбэх оҕону кэрэ эйгэтигэр уһуйар талааннаах педагог, Мухарям Федоров – Италия Виченца куоракка тиийэ үөрэммит ювелир, Альберт Иванов – мас ууһа, Юрий Дарбасов – «Ректайм» тэрилтэ салайааччыта, Иван Малышев – Тааттатааҕы норуот тыйаатырын сүрүн худуоһунньуга, Саргылаана Слепцова – сэдэх идэлээх куукула оҥорооччу, Эдуард Кривошапкин, Василий Тистяхов -- мас уустара, о.д.а. талан ылбыт идэлэринэн  айымньылаахтык үлэлии-хамсыы сылдьаллар. Бу буоларэбээт  учуутал ситиһиитэ, өр сыллаах үлэтин сыралаах үлэтин түмүгэ! 

Быйыл улуу убайбыт Былатыан Ойуунускай төрөөбүтэ 130 сылыгар анаан Люция Степановна Дьөһөгөй оҕотун кылыттан-сиэлиттэн таҥан, Былатыан мэтириэтин оҥорбута быыстапка сүрүн үлэтинэн буолла.

Бу иннинэ Кыайыы 70 сылыгар улуу сирдьит Иосиф Сталин мэтириэтин Харбалаах бөһүөлэгин эбэлэрин “Далбар эбээлэр” түмсүүлэрэ Люция Степановна салалтатынан оҥорбуттара. Бу үлэтин иһин Люция Степановна Саха сиринээҕи КПРФ салаатыттан Иосиф Сталин төрөөбүтэ 140 сылынан мэтээлинэн бэлиэтэммитэ.

Учуутал, уһуйааччы Л.С.Кривошапкнаны улуус дьаһалтата, Орто Амма нэһилиэк дьаһалтата, улуустааҕы Норуот айымньытын дьиэтэ, Таатта улууһун үөрэҕириитин салаата, Харбалаахтааҕы үөрэх ситимэ, Харбалаахтааҕы оҕо ускуустубатын оскуолата, “Далбар эбээлэр” түмсүү, бииргэ үөрэммиттэрэ, аймахтара эҕэрдэлээтилэр.

Быыстапканы Харбалаахтааҕы оҕо ускуустубатын оскуолатын художественнай кылааһын оҕолорун уруһуйдара (препод. Л.П.Карпова) ситэрэн биэрдэ. Д.А. Петров аатынан Ытык Күөл 2 №-дээх орто оскуолатын 2 “Б” кылааһын үөрэнээччилэрэ Былатыан Ойуунускай «Крым» хоһоонун аахпыта, Аким Федоров ыллаабыта тэрээһин ис хоһоонун байытта.