Уопсастыба

Пуорумҥа Ил Түмэн дьокутааттара Александр Подголов, Виктор Губарев, Александр Колесов, Антонина Григорьева, Николай Бугаев, Виталий Чикачев уонна Дмитрий Паньков кытыннылар. Мунньахха Аҕа дойду Улуу сэриитин устуоруйатын уларыта тутуу сытыы боппуруостара, неофашизмы утары охсуһуу уонна устуоруйаҕа кырдьыгы көмүскээһин үлэтин тэрийии таарылыннылар. Кыттыылаахтар араас тиэмэлэргэ тыл эттилэр: «Арҕаа дойду цивилизациятыгар фашизм уонна нацизм төрүөтэ», «Аныгы Арассыыйаҕа сэбиэскэй норуот геноцидын устуоруйата», «Фашизм аныгы либерализм үрдүкү түһүмэҕэ», «Украинскай нацизм: тус трагедияны ылыныы»,  о.д.а. Ил Дархан Айсен Николаев пуорум фашизм идеологиятын кытта охсуһуу идиэйэлэрин тула саха норуотун түмпүтүн бэлиэтээтэ. Кини 1945 сыллаахха ыам ыйыгар киһи утары идеологиятынан фашизмы кыайбыт кэминэн ааттаата.

Ил Түмэн  бэрэссэдээтэлин солбуйааччы – байыаннай сулууспалаахтар, байыаннай дьайыы бэтэрээннэрин, патриотическай иитии уонна уопсастыбаннай тэрилтэлэр боппуруостарыгар сис кэмититэт бэрэссэдээтэлэ Александр Подголов эҕэрдэ тылыгар фашизмы утары охсуһууга бу тэрээһин саҥа олук ууруу буолуохтааҕын эттэ.

«Биһиги өрөспүүбүлүкэбитигэр саха киһитин олоҕор көмөлөһөр саҥа нуормалыыр-быраап аахталара оҥоһуллалларын туһугар үлэлиэхпит. Саха Сиригэр 135 омук олорор. Доҕордоһуу, норуоттар төрүт култуураларын, үгэстэрин ытыктааһын – бу нацизмы, фашизмы, ксенофобияны утары охсуһуу. Онон, биһиги кыайыахпыт!», - диэн норуот дьокутаата иһитиннэрдэ. Бар дьоҥҥо Арассыыйа Дьоруойа, Ил Түмэн  дьокутаата Александр Колесов байыастар уонна кинилэр аймахтарын ааттарыттан Кыайыы туһугар үлэлиир-хамсыыр Саха Сирин бары олохтоохторугар махталын тиэртэ.

Тэрээһин кэннэ Ил Түмэн Култуураҕа уонна маассабай информацияҕа сис кэмитиэтин бэрэссэдээтэлэ Виктор Губарев фашизм утары түмсэргэ, дойду иһигэр баар кыһалҕалары бииргэ быһаарарга, бары эйэлээх күүстэр холбоһуохтарыгар ыҥырда.

I-кы өрөспүүбүлүкэтээҕи фашизмы утары пуорум кыттыылаахтара дойду, эрэгийиэннэр, муниципалитеттар биир идеологическай фронун радикальнай хааччыйыытын күүһүрдэргэ, устуоруйа кырдьыгын көмүскүүргэ, албыны, устуоруйаны уларыта тутууну утары охсуһар үлэни көҕүлүүргэ, нэһилиэнньэ үөрэхтээһинин бырагырааматын көдьүүһүн үрдэтэргэ, дойду төрүт култуурунай суверенитетыгар киинэ, ойуулук, анимация, кинигэ кыһатын, култуура, ускуустуба бары көрүҥнэрин, креативнай индустрия салааларын сайыннарарга, арҕаа дойдулар национальнай ньымаларын уонна социальнай технологияларын тохторго юридическай үлэни күүһүрдэргэ түмүккэ кэллилэр уонна өрөсөлүүссүйэ ылыннылар.

Арассыыйа уопсастыбатын уонна норуоттарын цивилизациялаах сыаннастарын бөҕөргөтүүгэ, сайыннарыыга уонна чөлүгэр түһэриигэ национальнай бырагыраамалары оҥорорго, фашизмы утары Сэбиэти тэрийэргэ, анал байыаннай дьайыы кыттыылаахтар социальнай ыстаатыстарын уонна аан дойдутааҕы өйөбүллэрин үрдэтиигэ улахан быһаарыы ылылынна.