Уопсастыба

Ил Дархан былааны билиһиннэриигэ ирбэт тоҥҥо турар өрөспүүбүлүкэ киин куората кэлин чыҥха уларыйда, национальнай бырайыактар көмөлөрүнэн суол-иис, социальнай эбийиэктэр тутуллаллар, дьону хаарбах дьиэ оннугар саҥа олорор дьиэлэргэ көһөрүү ыытыллар, общественнай туоналар тэриллэллэр диэн саҕалаата.
Маастар-былаан дойду Бэрэсидьиэнэ Владимир Путин уһук илиҥҥи куораттар сайдыыларыгар туһуламмыт чопчу быһаарыларын уонна Саха Өрөспүүбүлүкэтин Бырабыыталастыбата Москуба Генбылаанын Үнүстүүтүнүүн, ДОМ.РФ-ныын кыттыгас үлэлээһиннэрин түмүгэр оҥоһуллубута. Ону кытта, улахан өйөбүлү РФ Бэрэсэдьиэнин Уһук Илиҥҥэ бастайааннай бэрэстэбиитэлэ Юрий Трутнев, РФ Уһук Илин уонна аартыка сайдыытыгар миниистирэ Алексей Чекунков оҥорбуттарын бэлиэтиэххэ наада.
Суолталаах докумуон 2023 сыл балаҕан ыйыгар Арассыыйа Бэрэсидьиэнин өйөбүлүн ылан, салгыы Дьокуускай агломерациятын 2030 сыллаахха диэри социальнай-экэнэмиичэскэй сайдыытын былаана бигэргэммитэ.
"Маастар-былаан тирэх эбийиэгинэн 14 км. усталаах Өлүөнэ муостатын тутууну түмүктээһин буолар. Вантовай муоста бэйэтин уһуна 4,6 км. тахса уонна ирбэт тоҥҥо аан дойдуга суох тутуунан биллиэҕэ. Муоста дойду илин өттүгэр тырааныспар көрүдүөрдэрин сүрүн ситимнэринэн уонна Дьокуускай 4 үйэлээх устуоруйатыгар хаһан да тутуллубатах баараҕай тутуунан буолуоҕа", -диэн өрөспүүбүлүкэ Ил Дархана муостабыт тутулларын өссө төгүл бигэргэттэ.
Айсен Сергеевич куорат экэниэмикэтин сайдыытыгар салгыы креативнай индустрия ураты суолаталаныаҕа, онуоха айар үлэҕэ аныгылыы инфраструктураны тэрийиэхпит- толору циклаах, элбэх функциялаах киинэ павильонун, муусука Үрдүкү оскуолатын саҥа кампуһун, эпос уонна ускуустуба Аартыкатааҕы киинин диэтэ. Ону тэҥэ, эко систиэмэни саҥаттан бөҕөргөтүүгэ, каадырынан хааччыйыыга болҕомто уурулларын уонна былааннартан - Үрдүк үөрэх кыһаларын кампустарын тутуу, Аан дойдутааҕы мамонт киинин уонна Бүттүүн Арассыыйатааҕы сиэмэлэр криохранилещаларын, арҕаа дойдулар сааҥсыйаларын кэмигэр аһылыгынан хааччыйыы куттала суох буолуохтааҕын тэрийии туһунан билиһиннэрдэ.

"Билигин биһиги Уһук Илиҥҥэ IT-өҥөтүн экспортааһын 90 % хааччыйабыт. Салгыы бу салаа уопсайынан экэниэмикэҕэ киллэрэр чааһын, технология өртүнэн сүбэринитиэппит уонна дойду оборуоната бөҕөргүүрүгэр киллэрэр кылаатын улаатыннарыахпыт. Дьокуускай IT-паарката 100 резидени уонна өрөспүүбүлүкэ 30-тан тахса IT-оскуолатын түмэр. Глобальнай технологическай хампаанньалар баар буолуулара, IT -өҥөнү оҥорооччулар ахсаааннарын хас да бүк улаатыннарыы- биһиги сорукпут. Билигин айар индустрия эйгэтигэр баар соруктары "Үлэ кыбартаала" Креативнай кластер толорор", -диэтэ Айсен Николаев.
Ону кытта, Дьокуускайга Саха Сиригэр олорор элбэх омуктар култуураларын тэҥэ, хатыламмат айылҕабытын көрдөрөргө туһулаан туризмы сайыннарыы барарын санатта.

Дьокуускай аэропордун норуоттар икки ардыларынааҕы терминалын саҥардыы, гостиница комплекстарын тутуу, култуура тэрээһиннэрин, ол иһигэр Туймаада Ыһыаҕын, "Кыһын Саха Сириттэн саҕаланар" бэстиибэли сайыннарыы былааннанар. Саха Сирин снайпердарын албан аатаах үтүө үгэстэрин салҕаан, снайпердар хамсааһыннарын түмэлин бырайыактара киириэҕэ.
Өр сылларга мунньуллубут инфраструктура кыһалҕаларын быһаарыы, куорат эйгэтин саҥа хаачыстыбатын ситиһии Дьокуускай куорат маастар-былаанын ис хоһоонунан буолуохтара. Ол курдук, хаарбах дьиэлэри суох оҥоруу, саҥа микрооройуоннары, ирбэт тоҥҥо аан бастакы аквапарканы тутуу, куорат киин болуоссатын саҥардыы үлэтэ уонна Сайсары күөл, Өлүөнэ кытылларын тупсаран оҥоруу киирэллэр.

"Бу бырайыактартан сороҕо "Азия оҕолоро" норуоттар икки ардыларынааҕы VIII успуорт оонньууларын көрсө олоххо киириэхтэрэ. Онно 3 тыһ. кэриҥэ кыттааччы кэлиэҕэ уонна успуорт, доҕордоһуу, эйэ бырааһынньыгынан буолуоҕа.
Маастар-былааны олоххо киллэрэммит, Дьокуускай 2030 сыллаахха Уһук Илин аныгы креативнай киининэн биллиэҕэ. Биһиги бары таптыыр киин куораппыт-Дьокуускай ирбэт тоҥҥо аан дойду бастыҥ куората буолуоҕа диэн бүк эрэнэбит.
2022 сыллаахха дойдубут бэрэсидьиэнэ Владимир Путин быһаарыытынан Дьокуускайга Үлэ Албан аатын Куората үрдүк аата иҥэриллибитэ. Бүгүн, биһиги дойдубут сарсыҥҥы кэскилин туһугар туруулаһар кэмигэр, Дьокуускай куруук, устуоруйатын тухары, патриот, дьулуурдаах, эр санаалаах, Аҕа дойдуга бэриниилээх куоратынан буолар!"-диэн Айсен Николаев маастар-былааны билиһиннэриитин түмүктээтэ.
Быыстапка кэмигэр Дьокуускай маастар-былаанын билиһиннэрэр пленарнай мунньахха Госдуума бэрэссэдээтэлин солбуйааччы Ирина Яровая,Госдуума Уһук Илин уонна Аартыка сайдыыытыгар кэмитиэтин бэрэссэдээтэлэ Николай Харитонов, РФ Уһук Илин уонна Аартыка сайдыытыгар миниистирэ Алексей Чекунков, Уһук Илин уокуругун губернатордара кытыннылар диэн СӨ Ил Дарханын уонна Быраабыталыстыбатын пресс-сулууспата биллэрэр.

Хаартыскалар куйаар ситимиттэн ылылыннылар.