Уопсастыба

Бэҕэһээ, ыам ыйын 29 күнүгэр, өрөспүүбүлүкэ Төрүт Сокуонун сэбиэтин бэрэссэдээтэлэ Петр Гоголев, Бэтэрээннэр өрөспүүбүлүкэтээҕи сэбиэттэрин бэрэссэдээтэлин солбуйааччы Никита Ноев киэн туттар биир дойдулаахпыт юридическай наука дуоктора Михаил Михайлович Федоров төрөөбүтэ 105 сылын көрсөр тэрээһиннэр чэрчилэринэн кэлэ сырыттылар.

Бэтэрээннэр өрөспүүбүлүкэтээҕи сэбиэттэрин бэрэссэдээтэлин солбуйааччы Никита Ноев сарсыарда 9 ч. улуус баһылыгын социальнай боппуруостарга собуйааччы Святослав Сунхалыровы, улуустааҕы бэтэрээннэр сэбиэттэрин президиумун чилиэннэрин кытта «Албан Аат” түмэлгэ көрүстэ.

-- Улуустааҕы бэтэрээннэр уопсастыбаннай хамсааһыннара үгүс үлэни ыытар. Ытык дьоммут үлэлээн ааспыт, үлэлии сылдьар олохторун үйэтитэр, сырдатар, бэлиэтиир иэстээхпит. Ытык киһибит, өрөспүүбүлүкэ сокуон өттүнэн туруктаах буолуутугар сүҥкэн кылааты киллэрсибит Михаил Федоров аатын үйэтитиигэ үлэ барар. Кини үбүлүөйдээх сааһынан улууска анал хамыыһыйа тэриллэн, сыл устата ыытыллар үлэ хаамыыта аттарыллан турар. Үйэтитии үлэтэ сэбиэскэй оскуола үөрэҕинэн барарын бэлиэтиибин, ол курдук, Ийэ дойдуга бэриниилээх буолуу, наставничество курдук күүстээх хамсааһын үөрэх, сатабыл быһыытынан, оскуола үөрэнээччитэ, ыччат, аҕам саастаахтар бииргэ үлэлээһиннэринэн барар, -- диэтэ баһылыгы солбуйааччы Святослав Сунхалыров.

-- Бэтэрээннэр улуус дьаһалтатын өттүттэн өйөбүллэнэн, далааһыннаахтык үлэлииргэ бэлэммит. Улуус үрдүнэн интириэстэринэн 280 түмсүү баарыттан, 78-һа саастаах дьон түмсүүлэрэ буолар. Үйэтитии үлэтин чорбото тутан үлэлиибит, -- диэтэ бэтэрээннэр улуустааҕы сэбиэттэрин бэрэссэдээтэлэ Маргарита Попова.

-- Бэтэрээннэр көлүөнэни ситимниир, олоҕу кыайыылаах үлэлэринэн көрдөрбүт, көрдөрөр дьоммут. Үлэбит эһиилги Кыайыы 80 сылыгар ананыаҕа, бу үлэҕэ таатталар ытык киһигит Михаил Федоров аата тэҥинэн ааттаныаҕа. Михаил Михайловичка ананар тэрээһиннэр улуус таһымынан эрэ буолбакка, өрөспүүбүлүкэ таһымнаах ыытыллыахтара. Бэтэрээннэр хамсааһыннара уопсастыбаннай үлэ. Ол эрээри, улуускут дьаһалтата, алта нэһилиэктэргит баһылыктара өйөөн, өйдөөн хамнас төлүүллэр. Бу бачыым өрөспүүбүлүкэҕэ холобур буолар, -- диэтэ Никита Ноев. 

Бэтэрээннэр өрөспүүбүлүкэтээҕи сэбиэттэрин аатыттан улуус Ытык сүбэтин салайбыт Егор Ючюгяевка Махтал суругу туттарда. Көрсүһүү кэнниттэн Ворошиловтар бачыымнарынан оҥоһуллубут Кыайыыны уһансыбыт сэрии, тыыл бэтэрээннэрин стелаларын көрө, Даккы сиригэр сырытта. Стела оҥоһуллуутун туһунан Даккыттан төрүттээх улуус бастыҥ уопсастыбанньыга Алексей Уваров сырдатта.

Күнүс Төрүт сокуон сэбиэтин бэрэссэдээтэлэ Петр Гоголев кыттыылаах көрсүһүү П.А.Ойуунускай аатынан Судаарыстыбаннас түмэлигэр буолла. Көрсүһүүгэ ХИФУ доцена Александр Ким-Кимэн, Бэтэрээннэр өрөспүүбүлүкэтээҕи сэбиэттэрин бэрэссэдээтэлин солбуйааччы Никита Ноев, улуус дьокутааттарын мунньаҕын бэрэссэдээтэлэ Петр Максимов, Октябрьскай нэһилиэк баһылыга Андрей Семенов, бэтэрээннэр улуустааҕы сэбиэттэрин бэрэссэдээтэлэ Маргарита Попова, “Утум” түмсүүттэн Варвара Решетникова, Полина Кычкина, түмэл үлэһиттэрэ уонна М.М.Федоров төрөппүт кыыһа Ольга Максимова, аймаҕа Марфа Обоюкина кыттыыны ыллылар. Кэпсэтии сүрүннээн Кыайыы 80, Михаил Федоров 105 сылларын бэлиэтээһин тула барда.

Эбиэттэн киэһэ улуус баһылыга Айаал Бурцев, улуус дьокутааттарын мунньаҕын бэрэссэдээтэлэ Петр Максимов уонна ыалдьыттарбыт Алампа аатынан Ытык Күөл 1 №-дээх орто оскуола үөрэнээччилэрин, учууталларын кытта көрүстүлэр. Түмүккэ, балаҕан ыйын 1 күнүгэр оскуолаҕа профильнай юридическай кылааһыгар 21 оҕо талыллан киирбитин, онно Төрүт сокуон сэбиэтин кэмитиэтэ, Ил Түмэн, ХИФУ юридическай факультета көмө оҥорорго бэлэмнэрин биллэрдилэр. Таатта улууһун дьокутааттарын мунньаҕын бэрэссэдээтэлэ Петр Максимов бу кылааска Аҕа дойду сэриитин кыттыылааҕа, бэрэпиэссэр М.М.Федоров аатын иҥэрэргэ этии киллэрдэ.

Дьоһун олоҕу олорон ааспыт, Уус Алдаҥҥа, Алдаҥҥа прокурорунан, ССКП обкуомун инструкторынан, ССКП КК иһинэн үрдүкү партийнай оскуоланы бүтэриэҕиттэн өрөспүүбүлүкэ прокурорун түбүктээх үлэтигэр, юридическай билими сайыннарыыга олоҕун анаабыт, юридическай билим дуоктарын туһунан кинигэлэри кыыһа Ольга Максимова, ХИФУ доцена Александр Ким-Кимэн оскуола, түмэл бибилэтиэкэлэригэр бэлэхтээтилэр.

Албан ааттаах биир дойдулаахпыт үлэтэ, олоҕо төрөөбүт Тааттатыгар ааттанар, ааттана туруоҕа.