Бу ньымабын аннараатах анал байыаннай дьайыыга туһанан эрэллэрин эмиэ ситимҥэ көрбүтүм. Манна калашников ботуруонун буларга, контейнердарбын иитэргэ уонна анал ытар сиргэ ытан чинчийэрбэр олус улахан уустуктары, харгыстары көрсүбүтүм. Военкомҥа көмөлөһүҥ диэн икки төгүл киирэ сылдьыбытым, Айти-паркаҕа сылдьыбытым да туһа тахсыбатаҕа. Арай Арассыыйа Дьоруойа Александр Колесов «Сулус» диэн стрельбищаҕа салайааччы үһү диэни истэммин, киниэхэ тахсан, кини өйөбүлүнэн дьэ ытан көрбүппүт.
Ахсынньы ыйга Донецкайтан Сиэгэн диэн позывнойдаах, антидроннай буулдьалары оҥорбут буойун уопускаҕа кэлбит үһү диэни истибитим уонна анаан көрсүбүтүм, билсибитим. Оскуолабар аҕалан улахан кылаас уолаттарын кытары көрсүһүннэрбитим. Сиэгэн хайдах саҕалаабытын, сэриигэ дроннар олус элбэх сүтүгү оҥороллорун кэпсээбитэ. Хорсун буоларга, булугас өйдөөх сатабыллаах киһи хайа да ыарахаттарга кыайыылаах тахсарын туһунан умсугутуулаахтык сэһэргээбитэ. Уопуската бүтэн арҕаа Донецкайга кыргыһыы толоонугар аттаныан иннинэ, учууталлыыр оскуолабар 8 «в» саха кылааһын үөрэнээччилэригэр, үлэ уруогар ыҥыраммын маастар-кылаас көрдөрбүтэ. Оҕолор олус сэргээбиттэрэ. Маннык хорсун, сатабыллаах саха боотура бэйэтинэн, оҥорбут, айбыт дрону утары ытар ньыматын (технологиятын) сөхпүттэрэ.
Дьэ ити курдук Кэбээйи Сиэгэн Күөлүн хорсун-хоодуот боотура Уйбаан Бугаев-Сиэгэн разведка отделениятын командира, өстөөх аатырбыт 39 нүөмэрдээх үрдэлигэр баар тирэх пуунун, Алибан диэн позывнойдаах доҕорунуун үс хонукка көмүскүүр сорудахтара, уон икки күҥҥэ диэри уһаан, өстөөҕү утары иккиэйэҕин кыргыспыттарын, өлөр өлүүнү хорсуннук көрсөн турууласпыттарын туһунан кэпсээбитин бары долгуйа истибиппит. Сиэгэн позывнойа төрөөбүт дойдутун Сиэгэн Күөл аатын сүгэр. Ону сэргэ сиэгэн диэн кыыл үөр бөрөҕө да, эһэҕэ да бэриммэт олус харса суох кыыл буоларын билэбит. Сиэгэн ол курдук саха чулуу, хоту дойду хоһуун боотура эһэтин Лэгэнтэй, Аҕа дойду сэриитин хорсун буойунун курдук, фашизм адьырҕа өстөөхтөрүттэн дойдутун көмүскүү арҕаа сэрии толоонугар аттанна. Анал байыаннай дьайыы хорсун байыаһыгар Сиэгэҥҥэ “саалаахтан самныма, охтоохтон охтума” диэн алгыс тылларын аныыбыт.
Сиэгэн уонна мин оҥорбут антидроннай ньымабыт анал байыаннай дьайыыга билигин киэҥник туттуллан, тэнийэн элбэх байыастар үрүҥ тыыннарын өллөйдүү сылдьалларыттан үөрэбит. Бу ньымабытын Саха сирин дьоно оҥорон саҕалаабыттарын бигэргэтэр туһуттан, өрөспүүбүлүкэ салалтата, Михайлова Евгения Исаевна сорудаҕынан, Донбаска “Бары бииргэ Кыайыы туһугар” Хотугулуу-Илиҥҥи көмө уонна өйөбүл фондатын салайааччыта Георгий Куркутов салалтатынан, патент оҥорторорго ылсан үлэлэһэ сылдьаллар.
Василий Гоголев-Уйулҕан
-
2
-
1
-
0
-
0
-
0
-
0
