Уопсастыба

Биһиги нэһилиэкпитигэр олохтоох сэбиэт бэрэссэдээтэлинэн, баһылыгынан үлэлии сылдьыбыт, «Гражданскай килбиэн» бэлиэ хаһаайката, муниципальнай сулууспа туйгуна, Таатта улууһун, Орто Амма нэһилиэгин бочуоттаах олохтооҕо Евдокия Трофимовна Протопопова бүгүн 80 үбүлүөйдээх сааһын туолла. 

Евдокия Трофимовна 1945 сыллаахха кулун тутар 8 күнүгэр Ленскэй оройуонугар, Ньүүйэ нэһилиэгэр төрөөбүтэ. Таатта Харбалааҕар 1970 с. үлэлии кэлбитэ. Бастаан кулуупка уус-уран салайааччынан үлэлээбитэ. Дьону кытары түргэнник биир тылы булар, тэрийэр талааннаах эдэр исписэлииһи бэлиэтии көрөн, оройуон салалтата кулууп дириэктэринэн анаабыта. Дьэ ити кэмтэн ыла Евдокия Трофимовна үлэ үөһүгэр түспүтэ. Сопхуос Харбалаахтааҕы отделениетыгар биригэдьииринэн, 1977 – 1996 сс. Орто Амма олотоох сэбиэтин сэкиритээринэн, бэрэссэдээтэлинэн,1996 – 2001 сс. буоста начаалынньыгынан, 2001 – 2006 сс. нэһилиэк дьаһалтатын баһылыгынан, 2006 – 2010 сс. баһылыгы солбуйааччынан үлэлээбитэ.

Евдокия Трофимовна 65 сааһыгар диэри үлэлээбитэ. Таһаарыылаах, өр сыллаах үлэтэ «Саха Өрөспүүбүлүкэтин муниципальнай сулууспатын сүрүн сүбэһитэ» разрядынан 2004 с. бэлиэтэммитэ.

Үлэҕэ үөрэппит аҕам саастаах салайааччыларыгар Евдокия Трофимовна куруук махтанар, кинилэри холобур оҥостор. Орто Амма олохтоох сэбиэтин бэрэссэдээтэллэринэн үтүө суобастаахтык үлэлээн-хамсаан ааспыт күүстээх санаалаах кэрэ аҥардары: Прасковья Егоровна Табунанованы, Татьяна Акимовна Кириллинаны күндүтүк саныыр уонна кинилэр үлэлэрин салгыы үлэлээбитинэн астынар.

Евдокия Трофимовна дэлэгээтинэн талыллан, Дьахталлар өрөспүүбүлүкэтээҕи X сийиэстэригэр уонна Олохтоох салайыныы уорганнарын III сийиэстэригэр кыттыыны ылбыта. Үлэлээбит-хамсаабыт кэмигэр ирдэбиллээх, туруоруммут сыалын ситиһэр салайааччы быһыытынан нэһилиэк, улуус олохтоохторун  ытыктабылын ылбыта, эдэр салайааччыларга мэлдьи күүс-көмө, өйөбүл буолара, буолар даҕаны. 

Тапталлаах кэргэнинээн Виктор Васильевичтыын ыал буолан олорбуттара 50 сыллаах Кыһыл көмүс урууларын былырыын бэлиэтээбиттэрэ. Тапталлаах кэргэн, истиҥ ийэ, эйэҕэс эбэ, хос эбэ Далбар Хотун Евдокия Трофимовнаҕа чэгиэн туругу, этэҥҥэ буолууну баҕарабыт.