Уопсастыба

«...улуус дьаһалтатын үлэһиттэрэ, нэһилиэк баһылыктара, сахалыы сиэринэн көрүстүлэр. Алгыс сиэрин-туомун алгысчыт Иван Иванов толордо. Кини алгыстаах тыл тиийэрин инниттэн, «оннуук-оннуок» диэн бигэргэттэрэн, бары үтүөнү баҕарда, ыраастаата, харысхал туруорда. Ол кэннэ эҕэрдэ тылы улуус баһылыгын бастакы солбуйааччы Руслан Захаров эттэ уонна аан дойду омуктарыгар сытыы биилээҕинэн аатырар, харысхал быһыытынан биллэр, тимир ууһа, быһахчыт Иннокентий Татаринов оҥорбут быһаҕын бэлэх уунна. Салгыы тылы нэһилиэк баһылыктарын ааттарыттан Таатта нэһилиэгин баһылыга Егор Павлов ылла.

Долгутуулаах түгэн кэнниттэн, харда тылы Айаал Семенович эттэ. Кини «Эр киһи төрөөбүт дойдутун көмүскүүргэ айыллан төрүүр. Ийэ дойдум иннигэр ытык иэспин биир дойдулаахтарбын кытта баҕа өттүнэн көмүскээн кэллим. Өрөспүүбүлүкэбитин биир ньыгыл хамаанда олохтообутун курдук, сыл аҥаара эһиги салайыыгытынан улууспут үлэтэ-хамнаһа тохтообокко, олус таһаарыылаахтык салаллан кэллэ», - диэн махталын биллэрдэ... », - Вера Канаева «Таатта» хаһыат ТГ-ханаалыгар суруйар.

Бу күн баһылык Айаал Бурцев улуус бастакы сүбэ мунньаҕын ыытта. Маныаха, сүбэ мунньах сытыы боппуруоһунан туттар уу хаачыстыбатын мөлтөҕө буолла. Бэрэбиэркэ түмүгүнэн Ытык Күөл уута нуормаҕа ырааҕынан эппиэттээбэтин туһунан СӨ Роспотребнадзор Тааттатааҕы салаатын салайааччыта Елена Тарасова иһитиннэрдэ. Маны туораттар инниттэн тустаах миэрэлэр ылыллыбыттар. Таатта нэһилиэгин баһылыга Егор Павлов сүүрүгүрдэ сытар Хадаайы үрэхтэн ууну ыларга этии киллэрдэ.

Улуустааҕы тыа хаһаайыстыбатын салаатын салайааччыта Гаврил Кычкин бүгүҥҥү күҥҥэ улуус үрдүнэн 1786 ынах сүөһү төрөөбүтүн, кулун ахсаана 186-ҕа тэҥнэспитин, итиэннэ үүт туттарыытыгар улуус үрдүнэн 195 тонна үүт квитанцияламмыт иһитиннэрдэ. Таатталар кыстыкка отторо тиийэн атын улуустартан атыыласпатахтар, сүөһүлэрэ этэҥҥэ күөххэ үктэнэн эрэллэр.

Улуус сүбэ мунньаҕын сүрүн боппуруоһунан Күрэс төрүт көрүҥнэригэр «Манчаары оонньууларын» бэлэмэ буолла. Улуус күрэхтэһээччилэрэ путевкалары ылыыга ситиһиилэрин, кинилэр аһылыктарын, эрчиллиилэрин быһаарыы, о.д.а. бэлэмнэнии үлэтэ көрүлүннэ, «Манчаары оонньуулара» пуондаҕа киирбит үп отчуоттанна. Баһылык спортуправленияҕа тутулла турар успуорт комплексын улуустааҕы успуорт федерацияларын күүһүнэн ыраастааһыны тэрийэргэ сорудахтаата.

Муус устар 30 күнүгэр Айаал Бурцев Манчаары оонньууларын тэрийэр хамыыһыйалар үлэлэрин, ситэ быһаарылла илик боппуруостары билсээри эппиэттээх үлэһиттэри мунньан кэпсэттэ. Улуустааҕы успуорт управлениетын салайааччы Андрей Сидоров бэлиэтээбитинэн, Таатта күрэхтэһээччилэрэ сэттэ сүүмэрдиир тургутууларга ситиһиилээхтик кыттан путевкалары ылбыттар, аны түөрт сүүмэрдээһин хаалбыт. Улуус күрэхтэһиилэргэ бэлэмэ сөбүгэр, чиэстээхтик кыттарга эрэллээх.

Улуустааҕы норуот айымньытын дьиэтин дириэктэрэ Гаврил Вырдылин култуурунай тэрээһиннэри бэлэмниир үлэ хаамыытын отчуоттаата. От ыйын 7 күнүттэн 12 күнүгэр диэри уопсайа 54 култуура тэрээһинэ ыытыллыахтаах. Оонньуулар аһыллыыларыгар икки тыһыынчаттан тахса киһи кыттыахтаах. Оонньууларга бэлэмнэнии былаан быһыытынан бары өттүн учуоттанан, ымпыга-чымпыга быһаарыллан үлэ тиһигин быспакка ыытыллар.

Бу күн Айаал Бурцев Былатыан Ойуунускай аатынан норуодунай тыйаатырга нэһилиэнньэни кытта көрүстэ. «Сатабыл» оҕо айымньытын дьиэтин үлэһиттэрэ Айаал Семеновиһы дойдутугар этэҥҥэ эргиллэн кэлбитинэн эҕэрдэлээн туран, Таатта уола хайаан да талах курдаах буолуохтаах диэн «Дьайааччы курун» бэлэхтээтилэр. Салгыы олохтоохтор долгутар ыйытыыларын баһылыктарыгар биэрэн сөптөөх хоруйдары иһиттилэр.

Санатан эттэххэ, Таатта улууһун баһылыга Айаал Бурцев былырыын алтынньыга бэйэтин баҕатынан контракт түһэрсэн Анал байыаннай дьайыыга барбыта. Саха Сириттэн баҕа өттүлэринэн АБДь-га өссө үс улуус баһылыга, Кэбээйиттэн Иван Левин, Муоматтан Дмитрий Аммосов уонна Аллараа Халыматтан Валерий Сентяков барбыттара. Онуоха, бу күннэргэ иһитиннэрэр-биллэрэр эйгэҕэ Кэбээйи улууһун баһылыга, БАРС-2 этэрээт хамандыыра Иван Левин этэрээтин кытта Украина сэбилиниилээх күүһүн кимэн киириитин тохтоппутун туһунан тарҕаммыта.

Хаартыскалар "Таатта" хаһыат ТГ-ханаалыттан