Бу улахан экологическай аахсыйа Арассыыйа Федерациятын Тутууга министиэристибэтин көҕүлээһиинэн тэриллэр. Дойду бары эрэгийиэннэрин куораттарыгар, нэһилиэнньэлээх пууннарыгар тэрилтэлэр кэлэктииптэрэ, уопсастыбаннас кыттыылаах ырааһырдыы үлэтэ ыытыллар. Быйыл үгэс буолбут субуотунньук Аҕа дойду Улуу сэриитигэр Кыайыы 80 сылыгар ананна. Маннык дьаһал олорор сирбит-уоппут ыраас, тупсаҕай уонна куттала суох буоларыгар бэйэ кылаатын киллэрэргэ итиэннэ үтүө дьыаланы оҥорорго туһаайыллар.
Дьокуускайга муус устар 25 күнүттэн куораттааҕы субуотунньуктар тэриллэн ыытыллаллар. Куорат управаларын уонна бары тэрилтэлэрин үлэһиттэрэ ыраастааһыҥҥа көхтөөхтүк, кытталлар. Дьокуускай куорат дьаһалтата бэйэтин саайтыгар иһитиннэрбитинэн, ыам ыйын 7 күнүгэр куоракка барыта 185 субуотунньук ыытыллыбыт, онно 5730-тан тахса киһи, 437 тэрилтэ кыттыбыттар. Киин куорат олохтоохторун күүстэринэн уонна кыһамньыларынан, 5 710 куул бөх-сах хомуллубут, 237 кубометрдаах бөх полигоҥҥа таһыллыбыт. Ону таһынан, 55 угуйук конструкцията көтүрүллүбүт. Күн бүгүн куоракка ырааһырдыы үлэтэ салҕанар.
Бу субуотунньуктарга норуот дьокутааттара, парламент аппараатын үлэһиттэрэ көхтөөхтүк кытыннылар. Ол курдук, ыам ыйын 7 күнүгэр Ил Түмэн кэлэктиибэ парламент дьиэтин таһынааҕы территорияҕа уонна Ярославскай уулуссаттан Октябрьскай уулуссаҕа диэри учаастакка кыһын устата мунньуллубут бөҕү-саҕы хомуйдулар.
Ыам ыйдааҕы бырааһынньыктар иннилэригэр Дьокуускай куорат Дууматын дьокутааттара, үлэһиттэрэ бэрэссэдээтэл Альберт Семенов салалтатынан Сайсары уокуругар, кырасдааныскай сэрии дьоруойа Кеша Алексеев аатынан уулуссаны, Ийэ искибиэрин уонна Сайсары күөлүн кытылын ыраастаабыттара.
– Биһиги кэлэктииппит үгэс быһыытынан, сыл ахсын субуотунньуктарга көхтөөхтүк кыттар. Дьокуускай куорат сиригэр-уотугар маннык дьаһаллары ыытар улахан суолталаах. Уһун кыһын кэнниттэн искибиэрдэр, пааркалар, уопсастыбаннай сирдэр ыраастааһыны ордук эрэйэллэр. Киин куорат олохтоохторун төрөөбүт-үөскээбит куораппытыгар, тулалыыр эйгэбитигэр харыстабыллаахтык сыһыаннаһарга ыҥырабын, – диэн Альберт Семенов куорат Дууматын саайтыгар суруйда.
Ыам ыйын 18 күнүгэр, «Мусору.Нет» экологическай көҕүлээһин кыттыылаахтара «Рсбор.Якт» бырайыак көҕүлээччилэрин кытары плоггинг-субуотунньугу тэрийэллэр. Тапталлаах Туймаадабыт хочото ыраас буоларыгар, сир симэҕинэн чэлгийэригэр баҕарар дьону онно кыттарга ыҥыраллар, өрөбүл сарсыарда 10 чаастан Доҕордоһуу болуоссатыгар мустарга этэллэр.
Антонина НЕУСТРОЕВА
Хаартыскалар: iltumen.ru, yktgorduma.ru, yakutskcity.ru
-
2
-
0
-
0
-
0
-
0
-
0
