Уопсастыба

Салаа салайааччыта Тамара Дмитриевна  Попова үлэтин туһунан маннык сэһэргээтэ:

–  Харысхал сиэккэтэ  дроннартан көмүскээн, анал байыаннай дьайыыга сылдьар уолаттарбыт олохторун элбэхтэ быыһаата, быыһыыр даҕаны. Бастаан биирдии байыаска  анаан баайарбыт, оттон билигин чахчы туһалааҕын билэн, байыаннай тиэхиньикэҕэ анаан эмиэ сакаастыыллар, онон наһаа элбэх сайаапка киирэр. Сиэккэни өрөр матырыйаалы салайааччыларбыт Марина Иннокентьевна уонна Сергей Ефимович Васильевтар Санкт-Петербуртан, фабрикаҕа сакаастаан аҕалтараллар. Матырыйаалынан хааччыйыыга Дьааҥы уонна Бүлүү улуустарын баһылыктара улахан көмөнү оҥороллор. 

Волонтердар «Боевые шелкопряды Якутии» уопсастыбаннай хамсааһыннарыгар өрөспүүбүлүкэ араас улуустарыттан: Дьааҥыттан, Усуйаанаттан, Миирнэйтэн, Ньурбаттан, Сунтаартан, Өлөөнтөн, киин уонна илин эҥээр улуустартан итиэннэ Дьокуускай куораттан төрүттээх ийэлэр, эбэлэр бэйэлэрин баҕаларынан түмсэннэр, «дойдубут, оҕолорбут тустара» диэн биир санаанан салайтаран, харысхал сиэккэтиттэн саҕалаан кылтан араас оҥоһуктары, эмтээх оттору хомуйан, хатаран, наардаан, дойду көмүскэлигэр сылдьар уолаттарга ыыталлар. Дьиэлэригэр үлэлиир волонтердар элбэхтэр. Кинилэртэн биирдэстэрэ бу хамсааһыны биир бастакынан өйөөбүт, кылынан өрүү идэтин баһылаабыт, Дьааҥыттан төрүттээх Мария  Лукинична Стручкова буолар. Биһиги соторутааҕыта Мария Лукинична дьиэтигэр олорон ыыппыт кылынан өрүүгэ маастар-кылааһыгар тиийэ сырыттыбыт.

Биһигини сырдык, ыраас хааннаах Далбар Хотун мичээрдээбитинэн үөрэ көрүстэ, тута толору астаах-үөллээх остуолугар ыҥырда. Кылынан өрүүгэ үөрэнэ кэлбит волонтердар биир соруктарынан Мария Лукиничнаҕа байыастарга көмөтүн иһин, Москуба куораттан, «Бэс Чагда» санаторийын дириэктэрэ ыыппыт Махтал суругун туттарыы буолла.           

            
– Баҕар, дьон кылынан өрүүнү судургу баҕайы курдук саныыллара буолуо. Үлэтэ элбэх. Аны туран, кылгас-уһун диэн араараҕын. Хас да утаҕынан баайарга элбэх бириэмэ барар. Мин былырыыҥҥыттан дьиэбэр олорон өрөбүн. Куорат таһыттан сылдьарга ыраах, ол иһин. Кылынан хааччыйаллар, билэр -билбэт да дьонум аҕалан биэрэллэр. Бу кэм устата төһөлөөх элбэх миэтэрэ кылынан өрөн уолаттарбар ыыппыппын билбэппин даҕаны. Ыксал буоллаҕына, түүннэри да өрөн ыытабын. Туһалаатын эрэ диэн. Саллааттар бэйэлэрэ сакаастаан эмиэ кэлэн ылаллар. Төлөпүөнүнэн билсэ олоробун. Бааһыран-эчэйэн госпиталга сытар уолаттар ыарыыбытын мүлүрүтэр, наһаа туһалыыр диэн этэллэр. Онон, кыаҕым баарынан оҕолорбор туһалаатарбын ханнык диэн күн аайы үлэлиибин. Уоппускаҕа кэллэхтэринэ, эбэһээт сылдьан ааһаллар. Онон оҕолорбор махталым улахан, -- диэн холку куолаһынан кэпсии-кэпсии, Мария Лукинична тус-туспа иһиттэринэн наардаан укпут кылларыттан сыыйан ыла-ыла, хайдах кылгас кыллары сөпкө холбоон ситиини өрөрүн көрдөрөн киирэн барда.

Бары тула олорон, кини кэпсиирин болҕомтолоохтук иһиттибит. Отут миэтэрэҕэ  тиийэ өрбүт ситии быаларын мунньан, госпитальга сытар уолаттарга ыыталыыр эбит. Бу күннэргэ Тамара Дмитриевна Москубаттан кэллэ, кини Мария Лукинична кэһиитин илдьэн туттарбыт.  Ону истэн Мария Лукинична күнүстэри -түүннэри утуйарын умнан саллааттарга анаан оҥорбут эмтээх, алгыстаах  ситиилэрэ  тиийбитин истэн олус үөрдэ.

– Өрө олорон ону-маны барытын саныыбын эрээри, саамай улахан баҕа санаам: бу уолаттарбын харыстыыр ситиилэрим ыарыыларын мүлүрүтэн, санааларын сырдатан, күүстэригэр күүс эбиэхтин диэн, -- соҕотох кыыһын сүтэрэн олох араас ыарахаттарын көрүстэр даҕаны, ону барытын тулуйан, дьоҥҥо үтүөнү оҥорор күүстээх санаалаах, 69-с хаарын ууларбыт  Мария Лукинична кэпсээнин түмүктээтэ.

Хаартыскаҕа ааптар түһэриитэ.