Бэс ыйын 6 күнүгэр Судьуйа кэллиэгийэтэ кыттыылаах мунньаҕы улуус баһылыгын бастакы солбуйааччыта Руслан Захаров ыытта. Сүбэ мунньахха XXII төгүлүн ыытыллар "Манчаары оонньулара" кылаабынай судьуйата Николай Цыпандин, солбуйааччылара Сергей Бандеров, Ариан Тарасов, үлэлиир бөлөххө киирбит Адаптивнай физическэй култуура уонна успуорт өрөспүүбүлүкэтээҕи киинин дириэктэрэ Ньургун Иванов, програмнай-методическай салаа салайааччыта Михаил Ершов уонна успуорт көрүҥнэринэн судьуйалара Иван Сивцев, Дмитрий Саввинов, Иннокентий Максимов кыттыыны ыллылар.
Мунньахха икки сүрүн боппуруоһу көрдүлэр. Ол курдук, күрэхтэһээччилэри түһэрэр уонна күрэстэр ыытыллар эбийиэктэрин тула кэпсэттилэр.
Мунньах кыттыылаахтарын бастакы бөлөҕө Оонньуулар ыытыллар сүрүн успуорт тутууларын, о.э. А.Е. Турнин аатынан успуорт комплексын, А.Е. Мординов аатынан лиссиэй былаһааккатын, "Дьулуруйар Ньургун Боотур" аатынан стадиону, ипподрому кэрийэн көрдө. Онтон иккис бөлөх күрэхтэһээччилэр түһэр, аһыыр сирдэринэн сылдьан, успуорт көрүҥнэригэр төһө эппиэттиирин быһаарда, ирдэбилгэ сөп түбэһэрин чопчулаата. Бу үлэ түмүгэр ох саанан ытыы күрэһин ыытыллар миэстэтэ быһаарылынна.
Оонньуулары тэрийэр кэмитиэт ОДьХХ, РЭС уонна үөрэх салаатын исписэлиистэрин кытта мунньахтаата. Бу мунньахха уунан хааччыйыы уонна уот ситимигэр холбонуу сүрүн кыһалҕалара чопчуланнылар.
Оонньуулар буолаллара чугаһаатар-чугаһыыр, үлэ тэтимирэр.
Иһитиннэрии уонна хаартыска: https://t.me/mrtatta
-
0
-
0
-
0
-
0
-
0
-
0
