Олоҥхону Сергей Афанасьевич Ньурба тыйаатырыгар үлэлии сылдьан, Иван Васильев оҕонньор тылыттан суруйбут. Ону хаттаан тилиннэрэн, саха народнай суруйааччыта Сайа сурукка түһэрбитин талааннаах режиссер Сергей Потапов туруорда.
С.А.Зверев аатынан саха национальнай үҥкүүтүн тыйаатырын артыыстара үҥкүүнэн хамсанан дьүһүйдүлэр. Сунтаар талааннаах олоҥхоһуттара, култуура исписэлиистэрэ Айсен Федоров, Туйаара Алексеева ыллаан-туойан уонна олоҥхолоон, үҥкүүһүттэр хамсаныыларыгар оруобуна олук олорсон толорбуттара, интэриэһи тарта.
Кыыс Кыыдааны Саина Винокурова толору арыйда. Хореографиятын балетмейстрдар Кия Софронеева, Эдуард Жирков туруордулар. Либреттоны Анна Аммосова, ырыа-тойук тылын Кыыл Уолун айымньыларыгар олоҕуран Сайа хомоҕойдук суруйбутун өссө бигэргэтэн бэлиэтиибин.
Сунтаар көрөөччүлэрэ саалаҕа толору мустан көрдүлэр. Улуус баһылыга А.В. Григорьев режиссер Сергей Потаповка, суруйааччы Сайаҕа, тыйаатыр артыыстарыгар көрөөччүлэр ааттарыттан махтанна. Онон С.А.Зверев-Кыыл Уола урукку өттүгэр норуокка биллибэтэх олоҥхото 125 сыллаах үбүлүөйүгэр үрдүк таһымнаахтык сыанаҕа туруоруллан, сыалын ситтэ.
Хаартыскаҕа ааптар түһэриитэ
-
9
-
0
-
0
-
0
-
0
-
0
