Дойду таһымнаах күрэхтэһии түмүктүүр түһүмэҕэр III-с бочуоттаах миэстэни былдьаһыыга Москуба уонна Саха Сирин Таатта улууһун Тыараһа орто оскуолатын уолаттара күөн көрүстүлэр. Тыҥааһыннаах киирсии түмүгэр биһиги уолаттарбыт москвичтары 2:0 ахсаанынан кыайан өрөгөй үөрүүтүн биллилэр.
Таатта волейболистара, тириэнэр Дмитрий Попов салалтатынан дьаныардаахтык дьарыктанан, Уһук Илин эрэгийиэн аатын чиэстээхтик көмүскээтилэр.
Тыараһа оскуолатын дириэктэрэ Петр Полускин оскуолатын хамаандатын өйөөн, уолаттары кытта тэбис тэҥҥэ сылдьыһан, күүстээхтик ыалдьан өйөбүл буолла. Кини кыайыы түгэнин уһулбут видеота куйаар ситимигэр тарҕанан, Саха Сирин олохтоохторугар өрөгөй үөрүүтүн бэлэхтээтэ.
Санатан эттэххэ, аҕыйах хонугунан Таатта туонатыгар Күрэс төрүт көрүҥнэригэр «Манчаары оонньуулара» саҕаланыаҕа. Маныаха, волейболист уолаттар бу үрдүк таһымнаах күрэхтэһиигэ миэстэлэспиттэрэ биир дойдулаахтарын сүргэлэрин көтөҕөр.
Хаартыскалар П. Полускин түһэриитигэр
-
7
-
0
-
0
-
0
-
0
-
0
