Форум дьылабыай бырагыраамата 2 күн барыаҕа. Бастакы пленарнай мунньах “РФ Аартыкатыгар судаарыстыбаннай бэлиитикэ уһулуччу соруктара” диэн тиэмэнэн арылынна. Бу түһүлгэҕэ былаас, биисинэс, уопсастыбаннас уонна билим бэрэстэбиитэллэрэ Аартыка сайдыытын дьүүллэһэллэр. Мунньаҕы полярниктар ассоциацияларын бэрэсэдьиэнэ, Аартыкаҕа уонна Антаартыкаҕа Арассыыйа Бэрэсэдьиэнин бэрэстэбиитэлэ Артур Чилингаров салайан ыытар.
Форум икки күнэ Аартыка сайдыытыгар эрэгийиэннэр оруолларыгар ананыаҕа.
Уопсайа икки күннээх түһүлгэҕэ 28 дьылабыай тэрээһин былааннанар. Бу көрсүһүүлэргэ РФ Аартыкатын 2035 сылга диэри сайдыытын сүрүн оҥкуллара бэлиэтэниэхтэрэ.
Эрдэ суруйбуппут курдук, бу форумҥа Ил Түмэнтэн дьоһун дэлэгээссийэ кытта сылдьар. Ол курдук, Ил Түмэн вице-спикерэ Виктора Губарев салайааччылаах дэлэгээссийэҕэ киирдилэр: наукаҕа, үөрэхтээһиҥҥэ, култуураҕа, иһитиннэриилэри киэҥник тарҕатар сириэстибэлэргэ уонна уопсастыбаннай тэрилтэлэр дьыалаларыгар сис кэмитиэт бэрэссэдээтэлэ Феодосия Габышева, аҕыйах ахсааннаах төрүт норуоттар боппуруостарыгар уонна Аартыка дьыалаларыгар сис кэмитиэт бэрэссэдээтэлэ Елена Голомарева.
Норуот дьокутаата Виктор Губарев ахсынньы 11 күнүгэр буолар “Аартыканы айан суолунан хааччыйыы: авиация уонна суол-иис сайдыыта” сиэссийэҕэ Аартыкаҕа айанныыр суол-иис мөлтөҕүн, салгынынан уонна сиринэн сырыы күчүмэҕэйдэрин кэпсиэхтээх. Кини өссө Хотугу форум эрэгийиэннээҕи координатордарын кэмитиэтин мунньаҕар кыттыахтаах.
Елена Голомарева “РФ Аартыкатыгар кыыл-сүөл бары көрүҥнэрин харыстааһын уонна айылҕа уһулуччу харыстанар сирдэрин сайыннарыы” сиэссийэҕэ “Саха сирин төрүт омуктарын олорор түөлбэлэрин уонна төрүт олохторун харыстааһыҥҥа бырааптарын тутуһуу” диэн дакылааты ааҕар. Ону таһынан “Аартыкаҕа сир баайын хостооһун: тутаах тэрилтэлэргэ туох көмөлтө оҥоһуллухтааҕый” диэн түһүлгэҕэ намчы айылҕалаах Аартыкаҕа күн-түүн кэҥиир-тэнийэр бырамыысыланнас төрүт олохтоох омуктар бултуур-алтыыр сирдэригэр дьайыытын, онтон кинилэр туох көмүскэллээхтэрин, хайдах бырааптарын күөмчүлэппэттэрин туһунан тыл этиэҕэ.
Ыспыраапка:
“Аартыка: бүгүҥҥүтэ уонна кэскилэ” форум – бу Аартыка кыһалҕаларын, хайдах ону быһаарар, сайыннарар туһунан аһаҕастык кэпсэтэр уопсастыбаннай былаһаакка. Манна хотугу сир олоҕун-дьаһаҕын сэҥээрэр, интэриэһиргиир дьон түмсэн, уопут атастаһаллар, санааларын үллэстэллэр.
Форум түмүгүнэн кыттааччылар эрэгийиэн сайдыытыгар аналлаах резолюцияны ылыныахтаахтар.
-
0
-
0
-
0
-
0
-
0
-
0
