Издательский дом Редакция Подписка
Погода в Якутске: . -29 oC

Эһигини Ил Түмэн наукаҕа, үөрэхтээһиҥҥэ, култуураҕа, маассабай иһитиннэрэр сириэстибэлэргэ, итиэннэ уопсастыбаннай тэрилтэлэр дьыалаларыгар сис кэмитиэтин уонна тус бэйэм ааппыттан салаллан кэлбит саҥа 2022 сылынан итиитик-истиҥник эҕэрдэлиибин!

Эһигини Ил Түмэн наукаҕа, үөрэхтээһиҥҥэ, култуураҕа, маассабай иһитиннэрэр сириэстибэлэргэ, итиэннэ уопсастыбаннай тэрилтэлэр дьыалаларыгар сис кэмитиэтин уонна тус бэйэм ааппыттан салаллан кэлбит саҥа 2022 сылынан итиитик-истиҥник эҕэрдэлиибин!

Саҥа дьылы көрсө, үлэ-хамнас түмүктэрин таһаарар уонна үүнэр сыл соруктарын туруорар үтүөкэн үгэс баар. Ааһан эрэр сыл биһигини чугас дьоммутун, аймахтарбытын уонна кэллиэгэлэрбитин харыстыырга, түмсүүлээх буоларга, итиэннэ ханнык баҕарар ыарахаттартан толлубат эр санааланарга үөрэттэ.

2021 сыл Арассыыйаҕа Наука уонна технология сылынан биллэриллэн, наука эйгэтигэр инновационнай көҕүлээһини өйүүргэ улахан болҕомто уурулунна. «Саха Өрөспүүбүлүкэтин 2020-2024 сс. научнай-технологическай сайдыыта» судаарыстыбаннай бырагыраама чэрчитинэн, өрөспүүбүлүкэ социальнай-экономическай сайдыытыгар чорботуллар соруктары наука өттүнэн арыаллааһыҥҥа, научнай каадырдары өйөөһүҥҥэ, аан дойду таһымнаах научнай-үөрэтэр тиһиги сайыннарарга көдьүүстээх ситими тэрийиигэ анаммыт дьаһаллар ыытылыннылар. 

Ааһан эрэр сыл биир бэлиэ түгэнинэн Арктика сэбиэтигэр Арассыыйа бэрэссэдээтэлинэн анаммыта буолар. «Арассыыйа федерациятын Арктикатааҕы зонатын социальнай-экономическай сайдыыта» судаарыстыбаннай федеральнай бырагыраамаҕа «Арктика оҕолоро» диэн хос бырагырааманы киллэрии – биһиги дьоһун ситиһиибит. Бу хос бырагыраама чэрчитинэн, Арктика улуустарын оҕолоро дойду бастыҥ санаторийдарыгар-профилакторийдарыгар сынньанар, доруобуйаларын бөҕөргөтөр, төрөөбүт тылларын саҥа үөрэх кинигэлэринэн үөрэтэр, итиэннэ Бүтүн Арассыыйатааҕы куонкурустарга, күрэхтэһиилэргэ кыттар кыахтаныахтара.

Өрөспүүбүлүкэҕэ биллэриллибит Доруобуйа сылынан «Оскуолатааҕы медицина» бырайыагы ырытан оҥорууга уонна олоххо киллэриигэ элбэх үлэни  ыыттыбыт. Ааспыт сылларга курдук, ордук болҕомто ханна олороллоруттан тутулуга суох оҕолорго хаачыстыбалаах үөрэхтээһини тэрийиигэ ананна. Хос бырагыраама биир сүрүн соругунан киинтэн ыраах сытар, суола-ииһэ суол кытыы нэһилиэктэргэ аныгы ирдэбилгэ эппиэттиир саҥа оскуолалары тутуу буолар.

Үөрэхтээһин үрдүк хаачыстыбалаах буолуута, бастатан туран, педагогтартан улахан тутулуктаах. 2020 сылга ыытыллара былааннанар өрөспүүбүлүкэ учууталларын уонна иитэр-үөрэтэр уопсастыбаннаһын сийиэһин көрсө, учуутал аатын үрдэтиигэ итиэннэ педагогтары өйөөһүн чопчу дьаһалларын олоххо киллэриигэ туһаайыллыбыт «Педагог статуһун туһунан» Саха Өрөспүүбүлүкэтин сокуонун барылын ырытан оҥордубут.

Тохсунньу 1 күнүттэн Холбоһуктаах Нациялар Тэрилтэлэринэн биллэриллибит Төрүт омуктар тылларын аан дойдутааҕы уон сылыгар (2022-2032) үктэниэхпит. Глобализация усулуобуйатын учуоттаан, олох бары эйгэтигэр төрөөбүт тылы харыстааһыҥҥа уонна сайыннарыыга анаммыт дьаһаллары күүһүрдүөхпүт.

2022 сылы Ил Дархан Айсен Николаев Ийэ сылынан биллэрбитин улахан үөрүүнэн уонна өрө көтөҕөллүүнэн көрүстүбүт. Кэҥэтэн өйдөөтөххө, бу – Ийэ сыла, Ийэ тыл сыла, Ийэ дойду сыла. Элбэх омуктаах Саха Өрөспүүбүлүкэтин хас биирдии олохтооҕо өрөспүүбүлукэ чэлгийэ сайдарын туһугар бэйэтин кылаатын киллэрсэр.

Саҥа 2022 сылга бары баҕа санаалар туолуохтара, туруоруллубут соруктар ситиһиллиэхтэрэ диэн ис сүрэхпиттэн эрэнэбин. Барыгытыгар чэгиэн-чэбдик доруобуйаны, ситиһиини, или-эйэни уонна этэҥҥэ буолууну баҕарабын!

Истиҥ эҕэрдэни кытары эһиги Феодосия Габышеваҕыт

  • 1
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением