Томпо оройуонун баһылыга Яков Степанов этэринэн, ааспыт 2019 сыллаахха дьокутааттар кэлэ сырыттахтарына толоруллубут боротокуол пууннара үксэ олоххо киирбиттэр, аҕыйах эрэ боппуруос быһаарыллыбакка турар эбит. Ол курдук, Новай сэлиэнньэтигэр тутуллуохтаах 80 миэстэлээх оскуола болдьоҕун чугаһатан биэрэргэ көрдөстө. Билигин үөрэнэ сылдьар дьиэлэрэ хаарбах туруктаах. Халаан уутугар былдьана сылдьыбыт буолан, бастакы этээһигэр оҕо дьарыктанар усулуобуйата суох. Онон иккис мэндиэмэҥҥэ эрэ бары симиллэн үөрэнэллэр.Кириэс Халдьаайыга амбулатория, спорт саалатын, Хаандыгаҕа Култуура дьиэтин тутууга үбүлээһин боппуруоһугар көмөлөһөллөрүгэр эттэ.
Норуодунай дьокутаат Яков Ефимов Мэҥэ Алдан уонна Кириэс Халдьаайы бөһүөлэктэригэр олохтоох бачыымы көҕүлүүр бырагырааманан икки хочуолунай тутуллубут да, ОДьКХ өттүттэн көстүбүт харгыстартан сылтаан, билиҥҥэ диэри үлэлии иликтэрин бэлиэтээтэ.
Оройуон бэрэстэбиитэллэрэ муниципальнай тэриллиилэргэ бүддьүөтү тыырыыны саҥа ньыманан ааҕарга эттилэр. Быйыл Үп министиэристибэтин кытта үлэлэһэн, сарбыллыбыт сорох үптэрин 9 нэһилиэккэ төнүннэрбиттэр. Маныаха спикер Петр Гоголев бүддьүөт харчытын муниципальнай тэриллиилэргэ тыырыы, нолуок, сыана, приватизация боппуруостарынан кулун тутар 16 күнүгэр Ньурбаҕа уонна кулун тутар 25 күнүгэр Чурапчыга мунньахтар буолалларын, онно этиилэрин бэлэмнээн киллэрэллэригэр сүбэлээтэ.
Дэлэгээссийэ улуус киин балыыһатыгар сылдьан, кэлэктииби кытта көрүстэ. COVID-19 дьаҥы утары үлэлээбит медиктэри наҕараадалаатылар.
Инфекционист быраас Елена Павловаҕа Ил Түмэн Бэрэссэдээтэлин Махтал суругун Петр Васильевич туттарда.
Судаарыстыбаннай Мунньах доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтин бэрэссэдээтэлэ Владимир Чичигинаров кэмитиэт Бочуоттаах грамоталарын анестезиолог-реаниматолог Николай Никоновка, врач-фтизиатр Анна Ущницкаяҕа, кылаабынай сиэстэрэ Светлана Чикачеваҕа, ыстаарсай сиэстэрэлэр Римма Неустроеваҕа, Валентина Лелинаҕа, сиэстэрэ Екатерина Ильинаҕа, Оксана Руденкоҕа үөрүүлээх быһыыга-майгыга туттарда.
Сотору улууска КТ аппараата, көһө сылдьар флюорограф тэрил кэлэрин улуус баһылыга кэпсээтэ. Петр Гоголев медперсоналга барыларыгар махтанан туран, доруобуйа харыстабылын бастакы сүһүөх тэрилтэлэрин модернизациялааһын саҥа Конституциянан бигэргэммитин, ол иһин бу эйгэҕэ сайдыы күүскэ барыахтааҕын эттэ.
Ил Түмэн пресс-сулууспатын матырыйаалынан
-
0
-
0
-
0
-
0
-
0
-
0
