Доруобуйа

Артем Ксенофонтов, биригээдэ салайааччыта: - Ил Дархан Айсен Сергеевич көҕүлээһининэн 13 Арктика улуустарыгар тоҕоостоох медицинскай көмөнү оҥоруу үлэтэ олунньу ый саҥатыттан ыытылла турар. Билиҥҥитэ түөрт улууска алта быраастар биригээдэлэрэ хас биирдии нэһилиэк дьонун-сэргэтин доруобуйатын туругун көрө, кэтии сылдьаллар.

Биһиги биригээдэбит Уус Дьааҥы улууһугар олунньу 6 күнүттэн үлэлии сылдьабыт. Бастаан Нижнеянскай нэһилиэктэн саҕалаан,  Уус Дьааҥы сэлиэнньэтигэр уонна билигин Тумат нэһилиэгэр кэлэн, дьонун-сэргэтин доруобуйатын туругун көрө сылдьабыт. Биригээдэбитигэр терапевт, педиатр, уролог-хирург, акушер-гинеколог, невролог, эндокринолог, кардиолог, УЗИ быраастара бааллар.

Маннык үөс сиртэн ыраах сытар, сырыы-айан өттүнэн уустуктардаах нэһилиэнньэлээх пууннарга сылдьан, олохтоохтор бүттүүн доруобуйаларын көрдөрүнэллэригэр дьулуһабыт. Олохтоохтортон, бастатан туран онкомаркер, гепатит, гормон, саахар, холестерин, иик уонна хойууларын анаалыстарын ылабыт. Онтон салгыы кэлбит дьон бары исписэлиистэргэ сылдьар, бэйэлэрин туруктарын көрдөрүнэр кыахтаахтар.

Быраастар анаалыс уонна көрдөрүү түмүгүнэн учуокка ылыллыбыт дьоңңо телемедицина, интэриниэт нөҥүө диспансернай кэтээһини оҥоробут. Инникитин өссө туспа стоматологическай биригээдэлэр тэриллэн, улахан уонна оҕо дьону эмтии кэлиэхтэрэ.

Бүгүҥҥү туругунан Уус Дьааҥы улууһун үс нэһилиэгэр барыта 300-тэн тахса киһи көрдөрдө.

Бу бырайыакка, нэһилиэнньэ чөл туруктаах буоларын туһугар, өрөспүүбүлүкэбит Ил Дархана, салалтата, олохтоох бэйэни салайыныы уорганнара, ону таһынан тустаах министиэристибэлэр  биир өйгө-санааҕа кэлэн үлэлии-хамсыы сылдьаллар. Холобур, хайа да дьыл кэмигэр сырыы-айан өттүнэн уустуктардаах Юкагир сэлиэнньэтигэр улуус дьаһалтата (баһылык Г.Н. Федоров), СӨ доруобуйа харыстабылыгар, тырааныспарга министиэристибэтэ, "Полярные Авиалинии" көтөр хампаанньа бииргэ үлэлэһэн, бу сэлиэнньэҕэ вертолетунан олохтоохтор доруобуйаларын көрө-истэ барыахтаахпыт.

Андрей Петров, Уус Дьааҥы олохтооҕо, биэнсийэлээх: - Мин 1987 с. Уус Дьааҥы сэлиэнньэтигэр учууталынан ананан кэлбитим. Онтон ыла биэнсийэҕэ тахсыахпар диэри начаалынай кылаас, математика учууталынан, кэлин дириэктэринэн үлэлээбитим. Билигин биэнсийэлээхпин. Сааһым да ыраатан, сылдьарга, кэлэргэ-барарга ыарахаттары көрсөбүн. Быраастар маннык кэлиилэрэ сүрдээх үчүгэй дии саныыбын. Биһиэхэ ас-таҥас, сырыы-айан өттүнэн уустуктардаах сиргэ аҥардас биэнсийэҕэ эрэ олорор дьон доруобуйабытын кэлэн көрөн-истэн бараллара олус туһалаах. Маннык үлэни тэрийбит, сүрүннээбит дьоҥҥо уонна быраастарга махталбыт муҥура суох, - диэн бэйэтин санаатын үллэһиннэ.

Михаил Слепцов, биэнсийэлээх, Тумат нэһилиэгин олохтооҕо: - Уопсай турукпун көрдөрө кэллим. Өскөтүн куоракка баран көрдөрөр буоллахпына, аҥардас Уус Куйгаҕа тиийэрбэр айаммар 5 тыһ. солк., онтон Куйгаттан Дьокуускайга дылы 30-тан тахса тыһ. солк. ороскуотурабын. Бу аҥардас биир эрэ өттүгэр айаммыт сыаната. Кэлэ-бара 70-ча тыһ. солк. Өссө буурҕа-тыал түстэҕинэ сырыы хас да күн устата тохтуурун эбэн кэбис. Саастаах киһиэхэ маннык сырыы сыанан-арыынан аҕаабата чуолкай. Ол иһин быраастар биригээдэлэрэ кэлбитэ абыраллаах.  Анал медицинскэй испэсэлиистэр элбэхтэрэ ордук үөрдэр, - диэн астына сэһэргээтэ.

Быраастар биригээдэлэрэ сылдьыбыт нэһилиэктэригэр өрүү итинник махтал тыллаах дьон элбэх. Холобур, Уус Дьааҥы сэлиэнньэтигэр биригээдэ түүн 12 чааска диэри дьону көрбүтэ. Киэһэ тоҕус саҕана биригээдэ салайааччытыттан Артем Михайловичтан "дьону хас диэки көрөн бүтэҕит" диэн ыйыппыппар: "Көрдөрөр дьон бүтүөхтэригэр дылы", — диэн мас-таас курдук эппитэ.

Үлэҕэ бэриниилээх, дьон иннигэр толору эппиэтинэһи сүгэр киһи, бука, итинник эрэ эппиэттиэн сөп. Түүн үөһүн саҕана үлэ түмүктэнэн, быраастар тѳhѳ да сылайдаллар, оңорбут үлэлэриттэн астына быhыытыйан, тэриллэрин массыынаҕа тиэйэн, салгыы айаҥҥа туруннулар...