Култуура уонна духуобунас киинин биир кэрэ-бэлиэ сирэ, тэбэр сүрэҕэ биллиилээх худуоһунньук Афанасий Мунхалов аатынан Хартыына галереята буолар. Манна Афанасий Петрович 147 үлэтэ хараллан турар, олортон кини айар үлэтин сырдатар экспозициялар оҥоһуллаллар. Ону таһынан, араас худуоһунньуктар уонна уран тарбахтаах норуот маастардарын быыстапкалара тиһигин быспакка ыытыллар, «Ай» норуодунай устуудьуйа үлэлиир.
«Ай» устуудьуйа үлэһиттэрэ «Мунхалов планетата» диэн аныгы ускуустуба арт-галереятын тэрийэр туһунан бырайыагы оҥороннор, 2021 сыллаахха 2 мөл 640 тыһ солк. суумалаах федеральнай граны ылбыттар.
Ол харчыга 1 мөл 500 тыһ солк. спонсордар көмөлөрүн эбэннэр, Хартыына галереятын аныгы сыыппара технологиятынан хааччыйан, саҥардан, байытан оҥорбуттарын туһунан "Ай" устуудьуйа сүрүннүүр исписэлииһэ Муосчут кыыһа Айылгы Пинигина кэпсээтэ.
Афанасий Петрович Мунхалов – РСФСР норуодунай худуоһунньуга, П.А. Ойуунускай аатынан Судаарыстыбаннай бириэмийэ лауреата, Арассыыйа Худуоһунньуктарын академиятын чилиэн-кэрэспэдьиэнэ, Арассыыйа Худуоһунньуктарын сойууһун чилиэнэ, Саха Өрөспүүбүлүкэтин Духуобунаһын академиятын академига, ССРС Үрдүкү Сэбиэтин VIII ыҥырыыга, Саха АССР Үрдүкү Сэбиэтин IX ыҥырыыга дьокутаата.
-
4
-
0
-
0
-
0
-
0
-
1
