Издательский дом Редакция Подписка
Погода в Якутске: . -12 oC

Балаҕан ыйын 18 күнүгэр Саха Өрөспүүбүлүкэтин норуотун хаһаайыстыбатын үтүөлээх үлэһитигэр, судаарыстыбаннай диэйэтэл, учуонай Айаал Степановка анаан Мэҥэ Хаҥалас улууһун Хара нэһилиэгэр бүүс-пааматынньыгы арыйдылар.

Балаҕан ыйын 18 күнүгэр Саха Өрөспүүбүлүкэтин норуотун хаһаайыстыбатын үтүөлээх үлэһитигэр, судаарыстыбаннай диэйэтэл, учуонай Айаал Степановка анаан Мэҥэ Хаҥалас улууһун Хара нэһилиэгэр бүүс-пааматынньыгы арыйдылар.

Айаал Степанов Саха сирэ сайдыытыгар улахан өҥөлөөҕүн бэлиэтээн, сыаналаан, билинэн туран, кини сырдык аатын үйэтитэр сыаллаах бырабыытыластыба анал хамыыһыйата тэриллибит. Былааннаах тэрээһиннэр чэрчилэринэн төрөөбүт, үөрэммит төрүт түөлбэтигэр улуус дьаһалтатын көмөтүнэн күһүҥҥү сылаас күннэри баттаһа өйдөбүнньүк пааматтынньык туруорулунна. Тэрээһиҥҥэ Айаал Степанов төрөппүттэрэ, кэргэнэ, дойдутун дьоно, өрөспүүбүлүкэ уопсастыбаннаһа уонна СӨ тыатын хаһаайыстыбатын министиэристибэтиттэн кэллиэгэлэрэ кыттыыны ыллылар.

e22c478a-cc00-400a-b7c6-e36bbce7ab14_1.jpg

Бэлиэ тэрээһин арыллыытыгар норуот дьокутаата, Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин кыттыыны ылла. Кини үөлээннээҕин, чугастык алтыспыт доҕорун туһунан маннык ахтар.

Айаал Иванович олохтон соһуччу барбыта олус хомолтолоох этэ. Биһиги бары биир көлүөнэ дьоммут. Элбэхтэ алтыспыт, улууспут туһугар сүбэбитин-амабытын холбоон, айымньылаахтык үлэлээбит кэмнэрдээхпит. Кини тыа дьонун кыһалҕатын кимнээҕэр да үчүгэйдик өйдүүрэ. Олохторун чэпчэтэргэ, күүс-көмө буоларга кыһаллара. Тыа сирин сайдыытыгар, ордук тыа хаһаайыстыбатыгар өйөбүл кэҥииригэр, саҥа ньымалар тобуллалларыгар чахчы элбэҕи оҥорбут киһи буолар.

Дьокутаат кэпсииринэн, Айаал Степанов эдэр эрдэҕиттэн салайар үлэҕэ тыыппалааҕа, эппиэтинэстээҕэ. Ол да иһин буолуо өрөспүүбүлүкэ салайааччылара Михаил Николаев, салгыы Вячеслав Штыров, ол кэннэ Егор Борисов бэлиэтии көрөн, эппиэтинэстээх дуоһунастарга анаабыттара. 2000-2012 сылларга бэрэсидьиэн уонна бырабыыталыстыба дьаһалтатын салайааччытын солбуйааччынан, тыа хаһаайыстыбатын салаатын миниистиринэн, бырабыытылыстыба бэрэссэдээтэлин солбуйааччынан үлэлээбитэ. Кэнники сылларга, күн сириттэн туоруор диэри, тыа хаһаайыстыбатын чинчийэр научнай институту сүрдээх ситиһиилээхтик салайбыта, кэллэктииби күүскэ түмпүтэ.

«Кини салайар үлэнэн дьарыктамматаҕа да буоллар, тыа хаһаайыстыбатын хайысхатыгар учуонай быыһытынан өссө улахан, дириҥ суолу хаалларыа этэ дии саныыбын. Фундаментальнай билим хайысхатыгар сүрдээх сыстыгас киһинэн билинэбин. Ол туһунан бэйэтигэр да этэр этим. «Саха бастыҥ үөрэхтээҕэ, саха интэлигиэнэ, туйгун ыччата» диэн тыллары иһиттэхпинэ куруук харахпар Айаал Степанов чаҕылхай уобараһа көстөр. Ис иһиттэн үрдүк култууралаах, көнө майгылаах, киһи киэнэ килбиэннээҕэ этэ. Олус сэмэй буолара. Элбэҕи саҥарбата. Ол эрэн үгүстүк үлэлиирэ, суруйара, толкуйдуура», – диэн үтүө тылларынан ахтар үөлээннээҕэ Андрей Находкин.

Кини төһө даҕаны куоракка олорон салайар үлэҕэ сырыттар, дууһатынан, өйүнэн-санаатынан дьиҥ чахчы патриот, тыа киһитэ диэн билинэллэр биир дойдулаахтара. Эдэр сааһыгар эппиэтинэһи ылынан салайар үлэнэн, билим боппуруостарынан утумнаахтык уонна дьоһуннаахтык дьарыктаммыт үтүө холобура, олоҕун остуоруйата, тэлэн хаалларбыт ыллыктара саха ыччатыгар, саҥа көлүөнэ интеллигенцияҕа, сирдьит буолар аналлаахтар. «Айаал Степанов курдук чулуу ыччаттар инникитин даҕаны үүнэн-сайдан тахсыахтара» диэн баҕа санааларын этэллэр мэҥэ дьоно.

5bcddc79-9856-48e5-9f25-7580fa7be88e.jpg

a99af2c4-5607-4d06-9a7d-31a7066d352d_1.jpg

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением