Саха Өрөспүүбүлүкэтин олохтоохторо бу ыҥырыыга хаһааҥҥытааҕар даҕаны элбэх дьокутааттаахпыт, бары сүрүн бэлитиичэскэй баартыйалар фракцияларыгар, Судаарыстыбаннай Дуума тустаах кэмитиэттэригэр үлэлии-хамсыы сылдьаллар.
«Биир ньыгыл Арассыыйа» бэлитиичэскэй баартыйа чилиэнэ Галина Данчикова сайдыы хорук тымырын быһаарар Үп-харчы уонна нолуок кэмитиэтигэр үлэлиир, өрөспүүбүлүкэ бүддьүөтэ туруктаах, датаассыйа кэмигэр уонна толору көрүллэрин туһугар туруулаһар.
КПРФ бэлитиичэскэй баартыйаттан дьокутаат Петр Аммосов Тырааныспар уонна тырааныспар инфраструктуратын сайдыытын кэмитиэтин чилиэнэ буолан, Уһук Илиҥҥэ уонна Арассыыйа Аартыкатыгар суолу-ииһи, аэропортары, муосталары, ол иһигэр Өлүөнэ муостатын, тутуу боппуруоһугар туруулаһан үлэлэһэр.
«Сиэрдээх Арассыыйа -- Патриоттар – Кырдьык иһин» социалистическай бэлитиичэскэй баартыйа фракциятыгар икки дьокутааттаахпыт: Доруобуйа харыстабылын кэмитиэтин бэрэссэдээтэлин бастакы солбуйааччы Федот Тумусов, итиэннэ Экология, айылҕа ресурсаларын уонна тулалыыр эйгэ харыстабылын кэмитиэтин чилиэнэ Юрий Григорьев (Забайкальеттан талыллыбыта).
«Саҥа дьон» политическай баартыйаттан дьокутаат Сардаана Авксентьева бастаан Эрэгийиэннээҕи бэлиитикэ уонна олохтоох салайыныы кэмитиэтин бэрэссэдээтэлин солбуйааччынан үлэлээбитэ, соторутааҕыта Судаарыстыбаннай тутул уонна сокуону оҥоруу кэмитиэтигэр эмиэ бэрэссэдээтэли солбуйааччынан ананна. Итини дьокутаат таһаарыылаах үлэтин үрдүктүк сыаналаан, ордук эппиэттээх салааҕа таһаарыы быһыытынан сыаналыыр сиэрдээх.
– Саха Өрөспүүбүлүкэтин дьокутааттара бары бэйэлэрин фракцияларыгар ыйааһыннаах, сөптөөх этиилэри киллэрэр кыахтаах дьоһуннаах дьоннор, – диир Федот Тумусов. – Сотору-сотору мустан сүбэлэһэн, өрөспүүбүлүкэбитигэр хайдах көмөлөһөр туһунан санаабытын холбуубут. Быйыл олохтоох салайыныы, ойуур уонна ойуурга сыһыаннаһыы, бэйдиэ сылдьар ыттар боппуруостарыгар күүскэ үлэлээтибит, уопсай сүбэнэн үгүс этиилэри киллэрдибит, элбэх саҥа сокуоннар барылларын оҥордубут. Бүтүн Арассыыйа уонна Сахабыт сирин сайдыыларын туһугар ити курдук бииргэ үлэлии-хамсыы сылдьабыт, салгыы өссө даҕаны үлэлиэхпит.
-
1
-
0
-
0
-
0
-
0
-
0
