Уопсастыба

Тэрээһин иннинэ хартыына галереятыгар “Үйэлэри ситимниир мэҥэ тутуулар” диэн Норуот искусствотын уонна култууратын үйэлээх баайын сылыгар анаммыт Саха Өрөспүүбүлүкэтин култуура уонна история эбийиэктэрин харыстыыр департаменын быыстапката арылынна.
Улуус баһылыга М.М. Соров тыл этэригэр ааспыт сыл үлэ бары хайысхаларыгар үгүс ситиһии олохтоммутун сырдатта. Ол курдук, Ийэ сылыгар элбэх үлэ барбытын, улууска 188 оҕо төрөөбүтүн, ыаллар Ийэ хапытаалын туһаммыттарын, Норуот искусствотын уонна култууратын үйэлээх баайын сылыгар анаан араас хайысхалаах үлэ ыытыллыбытын эттэ. Үүммүт Үлэ сылыгар үлэ майаактарыгар, талан ылбыт идэлэритигэр бэриниилээх буолуу холобурун көрдөрбүт дьоннорго улуус дьаһалтатын, үлэһит норуот аатыттан сүгүрүйэрин, махтанарын биллэрдэ. Өрөспүүбүлүкэҕэ норуот хаһаайыстыбатын бары көрүҥнэригэр инники сылдьарбытын өссө төгүл бигэргэппиппитин киэн туттан туран иһитиннэрдэ.

Саха Өрөспүүбүлүкэтин 100 сылыгар анаммыт үбүлүөйдээх анал бэлиэни Чычымахтааҕы врачебнай амбулатория бырааһыгар В.В. Андреевка, “Тааттаавтодор” АО суол учаастагын биригэдьииригэр И.И.Павловка, “Материнская Слава” бэлиэ үһүс степенин Хара Алдан нэһилиэгин олохтооҕо Ю.Д. Турантаеваҕа, Сэбилиинилээх күүстэр анал бэлиэлэрин Г.Н.Алексеевка, А.В.Шестаковка, быстах байыаннай дьайыыга сулууспалыы сылдьар биир дойдулаахтарбытыгар, кинилэр дьиэ кэргэттэригэр тус көмөлөрүн иһин Саха Өрөспүүбүлүкэтин Бырабыытылыстыбатын махтал суругун Г.Г.Вырдылиҥҥа, П.И.Христофороваҕа, М.Е.Бондареваҕа, К.Н.Поповаҕа, А.Е.Никифороваҕа, И.И.Акимоваҕа, Н.А.Поисееваҕа, Н.Л. Кутугутовка, Ю.А. Аржаковка, Е.Е. Поповка уо.д.а., улууска үөрэх, култуура, спорт, тыа хаһаайыстыбатын, доруобуйа харыстабылын сайдыытыгар кылааттарын киллэрсэр А.Н.Канаеваҕа, И.В.Харлампьеваҕа, М.М.Аммосовка, Д.Н.Сабарайкиҥҥа, Н.В.Егасовка, А.П.Никифоровка, Г.С.Кычкиҥҥа, В.Д.Мироноваҕа, М.П.Харайдановаҕа уо.д.а анал бэлиэлэри туттарда.

Улуус дьокутааттарын мунньаҕын бэрэссэдээтэлэ В.А.Охотин урукку кэмнэргэ биир дойдулаахтарбыт өрөспүүбүлүкэни салайбыттарын холобур оҥостон, кинилэргэ тэҥнэһэн эдэр ыччаты патриоттуу иитиигэ болҕомтону уурарга, үлэ киһитэ норуоттан тахсарын бэлиэтээтэ, үүммүт Учуутал уонна Уһуйааччы, Үлэ сылыгар күүрүүлээх үлэ барыаҕа диэн туран А.В.Вырдылинаҕа, Л.В.Васильеваҕа, Ил Түмэн Бочуотунай Грамотатын М.Г.Нестеровка, В.С.Налыяховка, А.Ф. Халыевка, улуус мунньаҕын аатыттан Бочуотунай Грамоталары М.П.Татариноваҕа, Г.В.Товаровка, улууска ат спордун сайдыытыгар кылааттарын иһин Д.И.Гуляевка, Т.И.Габышевка, Л.А.Никифоровка уо.д.а туттарда.

Чиэстээһин биир суолталаах түгэнинэн култуура уонна история эбийиэктэрин харыстыыр департамен салайааччыта Н.А.Макаров кыттыыта буолла. Николай Афанасьевич 2019 с. Ил Дархан Айсен Николаев бэйэтин үбүнэн Үктээһин миэлиҥсэни чөлүгэр түһэртэрбитин холобур оҥостон, өрөспүүбүлүкэҕэ 40-тан тахса мэҥэ тутуу өрөмүөннэммитин, олортон 11 өйдөбүнньүк Тааттаҕа өрө тардыллыбытын билиһиннэрдэ уонна махтал тыллары урбаанньыттарга, улуус тэрилтэлэрин салайааччыларыгар П.Д.Рахлеевка, И.И.Бочониҥҥа, А.М., А.А.Ханиннарга, дьокутааттарга анаата, үлэ инникитин тохтообокко барарыгар туһаайда, итиэннэ улуус баһылыгар М.М.Соровка анал бэлиэни туттарда.

Тыа хаһаайыстыбатын управлениетын салайааччы М.И.Хаптагаев сыл бастыҥнарын холобурдаата. Ол курдук, оттооһуҥҥа Чымнаайы бастаабыт, иккис миэстэни Амма, үһүс миэстэни Октябрьскай нэһилиэктэрэ ылбыттар, элбэх оту чөкөтөн «Дьолуо» кэпэрэтиип (Октябрьскай) бастаабыт, «Баат» кэпэрэтиип (Баайаҕа) иккис, «Кэскил» кэпэрэтип (Октябрьскай) үһүс миэстни ылбыттар. Түмүккэ оттооһун, үүтү туттарыы уо.д.а. хайысхаларынан үрдүк көрдөрүүлэри ситиһэн, I миэстэни Амма нэһилиэгэ (баһылык С.С.Соров), II миэстэни Октябрьскай (А.П.Семенов), III миэстэни Дьохсоҕон (П.Е.Захаров) ылбыттар.

Тэрээһини улуус бастыҥ ырыа, үҥкүү, фольклор бөлөхтөрө киэргэттилэр. Бу курдук таатталар үлэ ситиһиилээх саҥа Үлэ сылын көрсөллөр.