Уопсастыба

«Азия оҕолоро» норуоттар икки ардыларынааҕы успуорт оонньуулара 1996 сылтан ыытыллан, тыһыынчанан оҕону, ыччаты хабан, успуорт үрдүк чыпчаалыгар кынаттаан, бииртэн биир үрдүккэ сирдээтэ. Быйылгы VIII Оонньуулар уоттарын таатталар ыаллыы сытар томполортон туттубут. Ытык Күөл киин уулуссатынан Таатта успуордун устуоруйатыгар үйэлэргэ суруллар, төрөөбүт дойдубутун киэҥник сураҕырпыт, сураҕырдар чулууттан-чулуу ыччаттара уоту тутан сүүрдүлэр.

Ол курдук, «Спортивные Якутяне» спартакиада бастыҥа, ууга волейбол бастыҥ оонньооччута, ХИФУ волейболга призера, норуоттар икки ардыларынааҕы турнир чөмпүйүөнэ уо.д.а. ситиһиилээх Егор Окоемов, греко-римскэй тустуу өрөспүүбүлүкэтээҕи күрэхтэһиитин кыайыылааҕа Айдын Аввакумов, Арассыыйа волейболга күрэхтэһиитин кыттыылааҕа, греко-римскай тустууга ХИФУ призера Дьулус Хатылаев, өрөспүүбүлүкэ волейболга чөмпүйүөнэ Айаал Турнин, мас тардыһыытыгар Арассыыйа чөмпүйүөнэ, уо.д.а. күрэхтэһиилэр кыайыылаахтара Мирон Андросов, өрөспүүбүлүкэ гиирэҕэ успуордун чөмпүйүөнэ, призера Ольга Барбасытова мас тардыһыытыгар өрөспүүбүлүкэ чөмпүйүөнэ, III «Азия оҕолорун» призера, хапсаҕайга успуорт маастара, Россия көҥүл тустууга, ох саанан ытыыга Арассыыйа успуордун маастарыгар кандидат Егор Ноенохов, остуол тенниһигэр успуорт маастара, остуол тенниһигэр ХИФУ түөрт төгүллээх чөмпүйүөнэ, өрөспүүбүлүкэ хас да төгүллээх чөмпүйүөнэ, Арассыыйа таһымнаах турнирдар призердара уо.д.а күрэхтэһиилэр кыайыылаахтара Ньургун Сабарайкин уонна “Сыл бастыҥ мецената”, “Успуорт бастыҥ спонсора” аат туһааннааҕа, “Сахаада-спорт” бастыҥ салайааччыта, Таатта улууһун баһылыга Айаал Бурцев тутар чиэскэ тиксэн сүүрдүлэр.

Улуус баһылыга Айаал Бурцев улахан эппиэтинэһи бэйэтигэр сүгэн, уоту тутта уонна туттарда. Кини өбүгэлэрбит түҥ былыргыттан уокка сүгүрүйэллэрин, сиэр-туом оҥоһуллуутун курдук саха үгэһин биир тутаах көрүҥэ буоларын бэлиэтээтэ, Оонньуулар этэҥҥэ ыытыллан, оҕолор кыайыы өрөгөйүн билэллэригэр баҕарда. Салгыы Таатта нэһилиэгин баһылыга Егор Павлов, Оонньуулар уоттарын харайааччы Михаил Ким эҕэрдэлээтилэр.

Уоту көрүү түгэнэ Былатыан Ойуунускай аатынан норуот тыйаатырыгар буолла. Долгутуулаах кэми сурукка тиһэ бүгүҥҥү тэрээһин эппиэтинэстээх дьонуттан Михаил Кимтэн, Михаил Варламовтан туоһуластым.

– Биһиги номнуо 25-с улууска VIII «Азия оҕолоро» норуоттар икки ардыларынааҕы успуорт оонньуутун уотун эстафетатын тэрийдибит. Хоту улуустарга сөмөлүөтүнэн айаннаабыппыт. Онно сүрүннээн алта киһи сылдьыбыта. Билигин суолунан айаҥҥа 14 буолан сылдьабыт. Түөрт уоту харайааччы, үс тэрийээччи, үс фотограф-видеограф, оператордар, суоппардар. Бэҕэһээ Томполор таатталарга туттарыыларын тэрийбиппит. Салгыы Чурапчыга, Уус Алдаҥҥа, Уус Маайаҕа, Аммаҕа, Мэҥэ Хаҥаласка, Нерюнгрига, Алдаҥҥа, Намҥа, Жатайга сылдьан баран, Оонньуулар ыытыллар күннэригэр Дьокуускай куоракка, “Туймаада” стадиоҥҥа түмүктүүбүт. Эстафета иннинэ тэрээһин үлэтэ барбыта. Хас улуус аайы нэһилиэнньэ ахсааныттан таһааран, волонтердары сүүмэрдээһин үлэтин ыыппыппыт. Уоту тутааччылар уонна волонтердар улахан бэрибиэркэни аастылар. Ол аата ситиһиилэринэн эрэ буолбакка, уопсастыбаннай олоххо кыттар, сокуон өттүнэн ыраас буолуохтааҕын көрдүлэр, – диэн кэпсээтилэр Михаил Ким, Михаил Варламов.

Кытара кыыһар, оҕону-ыччаты түмэр ахсыс төгүлүн ыытыллар VIII «Азия оҕолоро» норуоттар икки ардыларынааҕы успуорт оонньууларын уота барыбытын түмэ тардан, өрө көтүтэн, иннин диэки айаннаата.

Яна Винокурова хаартыскаҕа түһэриитэ