Норуот кэҕүлээһинин өйүүр бырагыраама (ППМИ) – тыа сирин сайыннарыыга эбии үбүлээһини куонкуруһунан ылыыга биир көдьүүстээх мэхэньииһим буолар. Бу тыа сирин олохтоохторо, олохтоох салайыныы уонна эрэгийиэн былаастара бииргэ үлэлээһиннэрин чаҕылхай көстүүтүн биир бастыҥ холобура. Мунньаҕы нэһилиэк баһылыга Сергей Федотов уонна нэһилиэк дьаһалтатын кылаабынай исписэлииһэ Павел Павлов тэрийэн ыыттылар. Түмүк мунньах ыытыллыан иининэ нэһилиэк тэрилтэлэринэн, тутаах тэрилтэлэр кэлэктииптэринэн сүбэ мунньахтар тэриллэн ыытыллыннылар. Тэрээһиннэргэ үгүс дьонтон нэһилиэк тас көстүүтүн тупсарыытын үлэтигэр көҕөрдүү үлэтэ, оҕо былаһааккаларын тутуу уонна Советская-Булгунньахтаах айан суолун өрөмүөннүүр этиилэр киирбиттэр.
Куонкурус туһунан сиһилии суруйдахха, маннык. Бырайыагы көҕүлээччилэр олохтоохтор ордук туохха болҕомтолорун ууралларын куоластааһын түмүгүнэн быһаараллар. Чуолаан оҕо уонна успуорт былаһааккаларын тутуу, бөһүөлэк иһинээҕи уонна таһынааҕы суолу-ииһи оҥоруу, култуура эбийиэктэрин өрөмүөннээһин курдук араас таһымнаах үлэлэр тыа сирин олохтоохторун ордук интэриэһиргэтэллэр.
Нэһилиэк уопсай мунньаҕар киэһэ 18.00 чааска мустубут олохтоохтор Норуот көҕүлээһинэ бырагырааманан 2025 сылга уонна Советская-Булгунньахтаах айан суолун өрөмүөннүүр этиини өйөөтүлэр. Бу сыалга олохтоох дьаһалта бүддьүөтүттэн 2025 сылга дьокутааттар быһаарыыларынан нэһилиэктэн 250 тыһ. солк., убаанньыттартан 300 тыһ. солк. харчыны хомуйары былааннаатылар.
Санаттахха, быйыл нэһилиэккэ оттуур ходуһаларга тиэрдэр Советская-Атырдьах айан суола өрөмүөнэ ыытыллан олохтоохтор үөрүүлэрэ үгүс. «Биһиги бу бырагыраама Саха Сиригэр тэриллиэҕиттэн, 2017 сылтан кыттабыт. Нэһилиэнньэ олус көхтөөх. Үгүс элбэх сайдыы, тупсуу барда. Ылыммыт тэтими ыһыктыбакка, быйыл бу бырагыраамаҕа эмиэ кыттарга быһаарынныбыт. Былырыын олохтоох дьаһалта олохтоох нэһилиэнньэ көҕүлэһиннэрин бырагыраама куонкуруһугар ситиһиилэхтик кыттан субсидия ылары ситиспитэ. Быйыл Советская-Атырдьах айан суола өрөмүөнэ ыытыллан, олохтоохтор оттуур ходуһаларга, ытык сирдэргэ холкутук тиийэллэрэ биллэрдик тубуста. Ону кытта «Үрдүк бэс» диэн кэрэ көстүүлээх сиргэ дьон-сэргэ сынньана айылҕаҕа тахсалларыгар кыах баар буолла. «Норуот күүһэ — көмүөл күүһэ» диэн маны этэн эрдэхтэрэ», - диир нэһилиэк баһылыга Сергей Федотов.
Норуот көҕүлээһинин өйүүр бырагыраама үлэлээбитэ быйыл ахсыс сыла. Бу кэм устата өрөспүүбүлүкэ тыа сирин олохтоохторо куонкуруһунан субсидия ылары ситиһэннэр, нэһилиэктэрин ис-тас көстүүтүн тупсарыыга туһаналлар, нэһилиэк олохтоохторуттан киирбит араас этиилэри олоххо киллэрэллэр.
-
2
-
0
-
0
-
0
-
0
-
0
