Уопсастыба

Тэрээһин "Дабайыы" бөлөх салама ыйыыр сиэринэн-туомунан саҕаланна. Кыттыылаахтары Орто Амма нэһилиэгин баһылыга Альберт Кулачиков эҕэрдэлээтэ уонна бэтэрээн сэбиэтин бэрэссэдээтэллэригэр Үс Амма Ытык сирин туһунан буклеты бэлэхтээтэ.

Бу Ытык сиргэ биир дойдулаахтарбыт мустан Аҕа дойду Улуу сэриитигэр аттаммыттарын туһунан ахтыылары Орто Амма нэһилиэгин олохтооҕо Блахирова В.В. хомуйан-таҥан оҥордо. Салгыы  бары сандалы тула олорон күрэхтэргэ кытыннылар.

Олбох тигээччилэр күрэхтэригэр 10 иистэнньэҥ  кытынна. 1 миэстэни Табунанова А. Н (Чымнаайы) ылла, 2 миэстэҕэ  Дедюкина Г.П. (Харбалаах) тигистэ, 3 миэстэ Ючюгяева А.Д. (Харбалаах) буолла. Местникова Н.Н., Бродникова В.Н. (харбалаахтар) анал аакка тигистилэр.

Талахтан уран оҥоһуктары сэттэ уран тарбахтаахтар оҥордулар. 1 миэстэ  Арылахов О. И. (Чымнаайы) буолла, 2 миэстэ - Аянитова С. В. (Харбалаах),  3 миэстэ - Терякова Н.С. (Харбалаах), анал ааттары Колотинский Г.П., Теряков В.Д (харбалаахтар),  биһирэбил бириистэри Белолюбская В.С. (Чымнаайы), Васильев Н.С. (Чычымах)  ылан үөрдүлэр-көттүлэр.

Ырыаҕа уон кыттааччы күрэхтэстэ. Түмүккэ иккилии 1 уонна 2 миэстэ быһаарылынна. Ол курдук, кыайыылааҕынан Попова Д.В., Налыяхов С.С. (Чычымах) буоллулар. 2 миэстэҕэ Малышева Л.М., Слепцова М.С. (харбалаахтар) тигистилэр. 3 миэстэни Попова Г.Г. (Чымнаайы) уонна биһирэбил бириистэри Акимов Н.Н., Уваров А.И (харбалаахтар), Афанасьева А.И. (Чычымах),  Рахлеева В.Т. (Харбалаах) ыллылар.

Улуу Кыайыыны уруйдуур 15 бэтэрээн айбыт хоһооннорун долгуйа, ытамньыйа иһиттибит. Кыайыылааҕынан Хантайар Туллук (Харбалаах) буолла. 2 миэстэҕэ Канаева А.Н. (Чычымах) тигистэ уонна тэҥ бааллаах үс 3-с миэстэлэри Слепцова М.С (Харбалаах), Табунанова М.П. (Чычымах), Богдокумова П.К. (Чымнаайы)  ыллылар.

Бу тэрээһиҥҥэ Үс Амма өрөгөйүн ырыатын "Таатта Амматын таптыыбын" уонна "Сэрии буолбатын" ырыаны бары бииргэ ыллаатыбыт,  оһуокайы оройуттан туттубут, эҕэрдэ нүөмэрдэри көрөн дуоһуйдубут. Тэрээһин кэмигэр Аанал байыаннай дьайыыга көмө, үтүө санаа дьаарбаҥката ыытылынна. Атыыттан 15940 солкуобай үп  хомулунна.

Бу курдук Үс Амма бэтэрээннэрэ көрсөн, ирэ-хоро кэпсэтэн, сэргэхсийэн, тэрийээччилэргэ махтанан, “аныгыс көрсүөххэ диэри” дэһэн тарҕастыбыт.

Бары көмөлөспүт, ас астаабыт, бириистэри туруорбут, кыттыыны ылбыт дьоммутугар-сэргэбитигэр барҕа махталбытын ис сүрэхпититтэн тиэрдэбит!

Светлана Винокурова, Харбалаах, Таатта