СӨ Бырабыыталыстыбатын Бэрэссэдээтэлин солбуйааччы, тэрийэр кэмитиэт бэрэссэдээтэлэ Сергей Местников мунньах түмүгүнэн тэрээһин уотугар, тыаһыгар-ууһугар, үөрүүлээх аһыллыы быһа эпииригэр, ипподрому бэлэмнээһиҥҥэ сүрүн болҕомтону уурарга соруйда.
Оонньууларга 7 тыһ. кэриҥэ киһи кыттыаҕа. Сүүмэрдиир күрэхтэһиилэр түмүктэринэн, 1662 күрэхтэһээччи кэлэрэ былааннанар. Күрэхтэһиилэр Ытык Күөлгэ Манчаары оонньууларын чэрчитинэн үлэҕэ киирбит саҥа эбийиэктэргэ ыытыллаллар. 19 олорор уонна 13 аһыыр эбийиэктэри бэлэмнээтилэр. Куонкурус сүүмэрдээһинин түмүгүнэн аһынан-үөлүнэн хааччыйыыга сүрүн операторынан «Сэргэлээх» ас-үөл кэмбинээтэ буолла.
Манчаары оонньууларын мэтээллэрин сүрэхтээтилэр. Уопсайа 924 мэтээли бэлэмнээбиттэр, ол иһигэр 620 — улахан, 156 — кыра, 148 — тириэнэрдэргэ.
Спартактиада бырагырааматыгар спорт 11 көрүҥэ киирдэ: хапсаҕай, мас тардыһыы, ыстаҥа, чэпчэки атлетика, саха дэгит күрэһэ, хоту дэгит күрэһэ, остуол оонньуулара, киирэни анньыы, буулдьанан ытыы, төрүт оҕунан ытыы, ат сүүрдүүтэ.
СӨ Бырабыыталыстыбатын Бэрэссэдээтэлин солбуйааччы Сергей Местников, СӨ физичэскэй култуураҕа уонна успуорка миниистирэ Леонид Спиридонов, Манчаары Баһылай аатынан өрөспүүбүлүкэтээҕи успуорт национальнай көрүҥнэрин киинин дириэктэрэ Геннадий Васильев кыттыылаах пресс-кэнпириэнсийэҕэ иһитиннэрбиттэринэн, Оонньуулар кыайыылаахтарыгар мүһэ туттарыллыаҕа. Онтон уопсай түмүккэ кыайыылаах тахсыбыт хамаандалар мүһэ быһыылаах кубогы ылыахтара.
Иһитиннэрии уонна хаартыска: https://t.me/sakhasporttv
-
0
-
0
-
0
-
0
-
0
-
0
