Бастакы кыһыл көмүс мэтээл
Таатталар бэйэлэрин кыыстара Сардаана Тарасова аан бастакынан 58 киилэҕэ киирэ анньыытыгар, 24 киилэлээх киирэни 63-тэ анньан, кыһыл көмүс мэтээли ылан биир дойдулаахтарыгар өрөгөй үөрүүтүн бэлэхтээтэ.
Кини кыайыытын туһунан маннык кэпсиир:
-- Федерация куубагын кэннэ хараҕым уоттанан, ааспыт сыл ахсынньытыттан күүстээхтик дьарыктанан саҕалаабытым. Бэйэм дойдубар күрэхтэспитим икки төгүллээх улахан эппиэтинэс. Бастаан наһаа ыарахан этэ, онтон билигин сыалбын-сорукпун ситиһэн, санаам чэпчээтэ, – диир чөмпүйүөн.
Сардаана күһүн Бурятияҕа Сергей Леонов аатынан Бүтүн Арассыыйатааҕы турнирга кыттар, ону тэҥэ успуорт маастарыгар хандьыдаат нуорматын толорор былааннаах.
Ыстаҥаҕа саҥа чыпчаал көрдөрүү
Ыстаҥаҕа кыргыттар ортолоругар Хаҥалас улууһуттан кыттар Валерия Олесова бэс ыйыгар 25 м. 23 см. ыстаммыт көрдөрүүтүн куоһурда уонна 25 м. 30 см. уһуҥҥа диэри ыстанан саҥа стадиоҥҥа саҥа чыпчаал көрдөрүүнү ситистэ.
Валерия 22 саастаах, Хачыкаат нэһилиэгиттэн төрүттээх:
-- Буурдаан ыстаныыга хомуллан, тириэньэрим үөрэтиитин истэн рекорд олохтоотум. Бэлэмнэниибит кытаанах этэ. Сылга иккитэ сбордаммытым. Үчүгэйдик дьарыктанан ситиһиилээх түмүгү көрдөрдүм. Бу Манчаарыга үс рекорду туруоруом дии санаабытым. Кылыыга оруобуна ардах түһэн, чалбах тахсан, халтараан буолан сатаммата. Сэрэхэчийдим уонна бэйэбин харыстанным. Сарсын өссө икки көрүҥҥэ кыттыахтаахпын, 100 миэтирэҕэ сүүрэбин уонна куобахха ойобун. Бу кыайыыбын ийэбэр аныыбын. Сарсын кини төрөөбүт күнэ. Тириэньэрбэр М.Н. Оегостуровка махтанабын, - диэтэ чыпчаал көрдөрүүлээх күрэсчит.
Саамай эдэр чөмпүйүөн
Бүлүү күрэсчитэ Даниил Николаев төрүт оҕунан ытыы муҥутуур кыайыылааҕынан буолла. Кыраҕы харахтаах бэргэн ытааччы СӨ успуордун маастарын нуорматын толордо.
Бөтүҥ орто оскуолатын үөрэчээччитэ 14 саастаах Даниил ккис сылын оҕунан ытыыга дьарыктанар. Кини ардах түһэригэр кыһаллыбакка оҕунан эрэллээхтик ытыалаан, дьиҥнээх кыайыыга дьулууру көрдөрдө. Эдэр чөмпүйүөн долгуйуутун уҕарытарыгар, хомулларыгар тириэньэрэ Клара Дмириевна күүс-көмө буолбут.
Данил Николаевка анал бирииһи - матаһыыкылы СӨ инновацияҕа, цифровой сайдыыга уонна сырдатар коммуникационнай технологияларга миниистирэ, СӨ оҕунан ытыыга федерациятын бэрэсидьиэнэ Василий Ефимов чөмпүйүөннэри чиэстиир үөрүүлээх быһыыга туттарда.
Төрүт оҕунан ытыыга бүлүүлэр утумнаахтык дьарыктаналлар. Бүлүүлэр хамаанданан ытыыга 29 очукуону хомуйан, маҥнайгы миэстэни ыллылар уонна бу көрүҥҥэ бастыҥнарын бигэргэттилэр.
Антонина НЕУСТРОЕВА
Хаартыскалар: ms14.ru уонна Ulus.Media
-
3
-
0
-
0
-
0
-
0
-
0
