Дьүүллүүр сүбэҕэ өрөспүүбүлүкэтээҕи «Оһуокай» түмсүүттэн Дархан этээччилэр Валентин Хорунов, Марта Николаева, Тааттаттан Афанасий Попов, үбүлээр бэйэтэ уонна саха тылын учуутала Оксана Андросова үлэлээтилэр. Күрэхтэһии икки бөлөҕүнэн ыытылынна. Идэтийбит этээччилэргэ «Кылаан чыпчаал» аатын Илья Наумов (Таатта, Дьохсоҕон) ылан, үбүлээр Иван Потапов туруорбут убаһатынан наҕараадаланна, саҥа этэччилэргэ «Кылаан чыпчаал» аатын Валентина Дьячковская (Чурапчы, Болтоҥо) ылла.
Тэрээһин туһунан санаатын Валентин Хорунов маннык эттэ:
-- Күрэхтэһии үрдүк таһымынан ыытылынна, бары бэлэмнэнэн, ис истэриттэн үөрэн-көтөн туран кытыннылар. Мин «Оһуокай» түмсүүттэн Тааттаҕа кураатарынан ананан, араас дьаһаллары тэрийсэбин. Улуустарга тахсан үлэлиир буоламмыт, оһуокай хамсааһына кэҥээтэ. Тааттаҕа оһуокайы сайыннарыан баҕарар дьон элбэх. Ол курдук, Уус Тааттаҕа күрэхтэһии ыыта сылдьан, Иван Иванову таба көрбүтүм, кини билигин улуустааҕы «Оһуокай» түмсүүнү салайар, бэрт хомоҕой тыллаах-өстөөх, «Саха сирин үтүөлээх оһуокайдьыта» буола үүннэ.
Ааспыт нэдиэлэҕэ улуус култууратын салалтатын, «Оһуокай» түмсүү ыҥырыыларынан, Чөркөөхтөөҕү Оһуокай лааҕырыгар Дархан этээччи Марта Николаева, үтүөлээх этээччи Мария Иванова буоламмыт оҕолорго маастар-кылаас ыыттыбыт. Оһуокайдьыт дьону тардар этээччи, имигэс үҥкүүһүт, өйүгэр ойуулаан көрүүтэ күүстээх буолуохтаах. Ол иһин, култуура салалтата оҕолору кыра эрдэхтэриттэн сайыннарарга ылсыбыта хайҕаллаах.
Ити курдук Тааттаҕа оһуокай сайдыытыгар саҕалааһын баар. Дархан этээччи Афанасий Попов эдэрдэри кытары үлэлэспитин түмүгэр, Илья Наумов, Лариса Попова үтүөлээх этээччи буоллулар. Билигин Лариса Попова бэйэтэ оҕолору дьарыктыыр. Өссө оҕолорго ыытыллар күрэхтэргэ ситиһиилэрдээх Айта Васильеваны хайгыыбын. Дьэ, маннык тэрээһиннэр ыытыллар буоланнар, оһуокай өссө сайдыаҕа, силистэнэн-мутуктанан дириҥээн иһиэҕэ. Оһуокай сайдыытыгар күүстээхтик үлэлэһэр дьоммутугар – өрөспүүбүлүкэтээҕи «Оһуокай» түмсүүнү салайар Александр Данилов-Дьулуур Хааҥҥа, кини көмөлөһөөччүтүгэр Александр Тарскайга, солбуйааччытыгар Марта Николаеваҕа махталбын тиэрдэбит.
Хаартыскаҕа: ааптар түһэриитэ
-
0
-
0
-
0
-
0
-
0
-
0
