Уопсастыба

Сааскы ириэһин кэмигэр дьэ, бу хаары дьаһайыы нэһилиэнньэлээх пууннар, куораттар дьаһалталарыгар уустуктары үөскэттэ. Хаар кыһын балачча түспүтүгэр астымматах курдук, сааскы өттүгэр эмиэ күүскэ түстэ, бэл, бэҕэһээ инчэҕэй хаарынан кыыдамнаата! Күн-дьыл туругун кэтээн көрөр уонна билгэлиир сулууспалар сөҥүү өссө да түһүө диэн сэрэтэллэр.

Муус устар 19 күнүгэр Бырабыыталыстыба бэрэссэдээтэлин бастакы солбуйааччы Дмитрий Садовниковка ыытыллыбыт сүбэ мунньахха Дьокуускай куорат дьаһалтата хаары ыраастыыр, сааскы ууну дьаһайар үлэ хаамыытын туһунан иһитиннэрдэ. Куорат олоҕун-дьаһаҕын хааччыйар сулууспалар саас ахсын куорат иһиттэн сыллата ортотунан 350 тыһыынча кубометр хаары таһар буоллахтарына, быйыл үлэлэрин кээмэйэ хас да бүк улааппыт.

«Жилкомсервис» муниципальнай унитарнай тэрилтэ бу үлэни кулун тутар 27 күнүттэн саҕалаабыт. Куорат иһиттэн хаары таһыыга 30 массыына туруоруллан, күннэри-түүннэри үлэлииллэр. “Сэбиэскэй Аармыйа 50 сыла” уулуссаҕа баар полигон туолан сабыллыбыт, онон билигин хаары Бүлүүлүүр суолга уонна Хатыҥ Үрэх суолугар баар полигоннарга таһаллар. Хаар уутун (чалбаҕы) оборторууга 47 ассенизация массыыната үлэлии сылдьар, ол иннинэ 21 анал тиэхиньикэ уонна 25 оробуочай туруоруллан, уулуссалар кытыыларыгар баар ууну мунньар  сирдэр (приямоктар, лотуоктар) ыраастаммыттар. Куораттааҕы управалары уонна салайар хампаанньалары кытары түһэрсиллибит дуогабар быһыытынан, кыбаарталларга, элбэх этээстээх дьиэлэр олбуордарыттан уу эмиэ оборторуллар. Онуоха анал массыыналары таһынан, ууну бырахтарар носуостар туһаныллаллар. Күнүс ириэрэ-ириэрэ, түүнүн тоҥорор буолан, лотуоктар тоҥон хаалаллар, ону уу түһэригэр анаан сарсыарда саҥаттан ириэрэргэ тиийэллэр, лотуоктар уонна носуостар бары үлэлээтэхтэринэ, уу барыыта түргэтиэхтээх. Үлэ кээмэйэ улаханын, оттон бириэмэ ыгымын быһыытынан, хаары да таһыыга, ууну да оборторууга биирдэм урбаанньыттары кытары кэпсэтии ыытыллан, эбии тиэхиньикэ уонна үлэһит илии тардыллыбыт, ол үрдүнэн көмө син-биир ирдэнэр эбит.

Муус устар 20 күнүнээҕи туругунан, киин куорат иһиттэн 800 тыһ. кубометр хаар таһыллыбыт, 8 тыһ. кубометр  уу оборторуллубут.

-- Куорат дьаһалтата үлэни мөлтөхтүк тэрийэр диир сыыһа буолуоҕа, быйыл чахчы хаһааҥҥытааҕар да элбэх сөҥүү түстэ, -- диэтэ Дмитрий Садовников.

Мунньах түмүгүнэн, киин куорат уокуруктарын управаларыгар өрөспүүбүлүкэ биэдэмистибэлэрин, тэрилтэлэрин көмөҕө сыһыарарга быһаарыы ылылынна. Онон, Автодорожнай уокурукка Физическэй култуура уонна спорт министристибэтэ, Гагаринскайга уокурукка Инновация, цифровой сайдыы уонна инфокоммуникационнай технологияларга министиэристибэлэрэ, Губинскайга Тутуу министиэристибэтэ уо.д.а. сыһыарылыннылар. Куорат таһынааҕы бөһүөлэктэр умнуллубатылар: холобур Тулагы Киллэмҥэ Үлэ уонна социальнай сайдыы министиристибэтэ. Хатаска Тыа хаһаайыстыбатын министиэристибэтэ көмөлөһөр буоллулар.

Дьаһал толорулларынан күүстээх. Инновация, цифровой сайдыы уонна инфокоммуникационнай технологияларга министиэристибэтэ бэҕэһээ онлайн киэбинэн суһал мунньаҕы тэрийэн, бэйэтин иһинэн үлэлиир тэрилтэлэр салайааччыларын кытары көмөнү хайдах оҥорор туһунан сүбэлэстэ. Сүбэ мунньах кыттыылаахтарыгар Гагаринскай уокурук управатын бэрэстэбиитэлэ Евгений Сидоренко үлэ кээмэйин билиһиннэрдэ. Тэрилтэлэр үгүстэрэ харчынан, оттон Сибээс техникумун салалтата субуотунньугунан көмөлөһөргө быһаарыммыттарын иһитиннэрдилэр.

Хаартыскалар: Мария Васильева (ЯСИА) түһэриилэрэ уонна «Дьокуускай куорат» куораттааҕы уокурук сайтыттан ылылынна.