Бүгүн, бэс ыйын 19 күнүгэр, Муона чараҥар “Күн Дьөһөгөй алгыһа” арт- эбийиэк үөрүүлээх быһыыга-майгыга аһылынна.
Даҕатан эттэххэ, 1985 с. Саха Сирин киин улуустарыгар устуоруйа билимин дуоктара, бэрэпиэссэр, этнолог уонна палеоэтнограф Анатолий Гоголев салалтатынан М.К. Аммосов аатынан Саха судаарыстыбаннай үнүбэрситиэтин археологическай эспэдиисийэтэ үлэлээбитэ. Ол түмүгүнэн, Амма улууһун Болугур нэһилиэгин Сыттык сайылыгар 13-с үйэҕэ туттуллубут төрүт сахалар малларын-салларын булбуттара. Онно олоҕуран Болугур нэһилиэгэ 2016 сылтан “Кулун атах култуурата -- өбүгэ быстыбат ситимэ” диэн бырайыагынан үлэлиир.
Арт-эбийиэк ааптара, Арассыыйа Худуоһунньуктарын сойууһун чилиэнэ, Дьокуускайдааҕы художественнай училище, Аартыкатааҕы култуура ускуустубатын үнүстүүтүн преподователэ Александра Неустроева маннык этэр:
-- “Архитип” диэн айар бөлөхтөөхпүт. Бу арт-эбийиэкпитин Амма ыһыаҕар анаан Одьулуунтан булуллубут туос харысхалтан иэйэн оҥордубут. Арт-эбийиэк ускуустуба аныгы салаата, академическай скульптура, монумент буолбатах. Эбийиэкпит Дьөһөгөй Айыыга ананна.
Бу биһиги маҥнйагы үлэбит буолбатах. Намҥа ыытыллыбыт Олоҥхо ыһыаҕар эко-матырыйааллартан оҥорбуппут. Дьокуускайга “ҺӨҔҮҤ” арт-эбийиэги туруорбуппут, Өксөкү диэн улахан быыстапканы тэрийбиппит. Онон тылга чугас буоламмыт, бу арт-эбийиэкпит икки өттүгэр сахалыы алгыс тылларын суруйдубут. Эбийиэкпит тимир лиистэртэн оҥоһулунна, аллараа өттө саламанан киэркэтилиннэ, онно бетон буолан, өр сылларга олохтоохтору үөрдүө диэн эрэнэбин.
- 3
- 0
- 0
- 0
- 0
- 0