Уопсастыба

Антонина Григорьева өрөгөйдөөх тэрээһин ыалдьыттарын эҕэрдэлээтэ.

«Убаастабыллаах Валерий Иннокентьевич! Убаастабыллаах агропрофилированнай үөрэхтээһин өрөспүүбүлүкэҕэ төрүттэммитэ 35 сылыгар аналлаах үөрүүлээх тэрээһин кыттыылаахтара! Эһигини барыгытын Ил Түмэн аатыттан итиитик-истиҥник эҕэрдэлиибин!

Эһиги баар буолаҥҥыт, эһиги үчүгэйдик үлэлээҥҥит бүтүн Россия үөрэхтээһин туһунан сокуонугар үлэнэн иитиини күүһүрдүүгэ уларытыылар киирдилэр. Маны таһынан, биһиги өрөспүүбүлүкэбит үөрэхтээһинин сокуона атын эрэгийиэннэр сокуоннарыттан саамай сүрүн уратыта – агротехнологическай үөрэхтээһин бырагыраамаларынан үөрэтэр ураты ыстаатыстаах оскуолалар баар буолбуттара. Оҕону үлэнэн иитиигэ норуот үгэстэригэр тирэҕирэн үгүс ситиһиилэннибит. Онно эһиги бары кылааттаах уонна сыһыаннаах дьоннор олороҕут.

Бүгүн өрөспүүбүлүкэбит Ил Дархана Айсен Сергеевич Николаев дьокутааттарга туһаайыытыгар кэлэр сылларга тыа сирин, тыа хаһаайыстыбатын сайыннарыыга, оҕону үлэнэн иитиигэ сүрүн сыаллары туруорда.

Маны таһынан, биһиэхэ сыһыаннаах аҕыйах түгэҥҥэ тохтоон ааһыам.

Бастатан туран, кэлэр сылтан тыа сиригэр уонна бүтүн өрөспүүбүлүкэҕэ баар 633 оскуоланы, 705-тэн тахса уһуйааны уо.д.а. үрдүк уонна орто анал үөрэх кыһаларын бэйэбит сибиэһэй, хаачыстыбалаах бородууксуйабытынан хааччыйарга Ил Дархан сыал туруорда. Ол курдук, өрөспүүбүлүкэҕэ бэйэбит оҥорон таһаарбыт бородууксуйабыт 25%-тэн, оттон тыа сиригэр 50%-тан итэҕэс буолуо суохтаах .

Иккиһинэн, быйылгыттан оҕо сынньалаҥын уонна үлэтин лааҕырдарын, экологическай, туристическай лааҕырдары тэрийэргэ эттэ уонна онно көмө оҥоһуллуо диэтэ.

Бу кэлэр сыл Россияҕа Дьиэ кэргэн сылынан, оттон өрөспүүбүлүкэбитигэр Оҕо сылынан биллэрилиннэ. Онон барыбытын улахан үлэ күүтэр.

Ону таһынан, ахсынньы 25 күнүгэр Наука уон сылын иккис сыла биллэриллэр. Онно анаммыт бырабыыталыстыба бырагырааматыгар сүгүрүйэр, убаастыыр киһибит Афанасий Васильевичка аналлаах «Чугуновские чтения» диэн тэрээһин 2024 сылтан ыытыллар гына былааннанна.

Боростуойа суох кэмҥэ улахан судаарыстыбаннай садаачалар Эһиэхэ сүктэрилиннилэр. Онон Эһиэхэ бу сыл улахан үлэни эрэйэрин быһыытынан, кытаанах доруобуйаны, киэҥ билиилээх, өркөн өйдөөх, бары өттүнэн сатабыллаах, кыанар, чөл олохтоох, дойдутун таптыыр, кинини көмүскэһэр кыахтаах саҥа көлүөнэни иитиигэ улахан ситиһиилэри баҕарабын!», – диэтэ Антонина Григорьева.

Үөрүүлээх тэрээһиҥҥэ Арктическай судаарыстыбаннай агротехнологическай университет ректора, биологическай наука дуоктара Валерий Федоров, РФ үөрэҕириитин министиэристибэтин иһинэн уопсастыбаннай сэбиэт үлэнэн иитии оробуочай бөлөҕүн чилиэнэ, педагогическай наука дуоктара Феодосия Габышева, «Саха сирин кэнчээри ыччата» өрөспүүбүлүкэтээҕи тирэх киин дириэктэрин солбуйааччыта Александр Брызгалов, биологическай наука дуоктара, Дьокуускайдааҕы тыа хаһаайыстыбатын научнай-чинчийэр институтун дириэктэрин эбээһинэһин толорооччута Михаил Черосов, Саха Өрөспүүбүлүкэтин агрооскуолаларын сойууһун толорооччу дириэктэрэ Петр Дягилев, агропрофилированнай оскуолалар салайааччылара, ону кытта Афанасий Васильевич Чугунов аймах-билэ дьоно Варвара Павловна уонна Саргылаана Афанасьевна кыттыыны ыллылар.