Бу дьыл кулун тутарыгар СӨ муниципальнай тэриллиилэрин бэрэстэбиитэллээх уорганнарын дьокутааттарын II сийиэһэ буолуохтаах этэ. Сийиэскэ бэлэмнэнии үлэ чэрчитинэн тэрийэр кэмитиэт түөрт төгүл мунньахтаабыта. Барыта 500 делегат кэлэрэ былааннаммыта. Атын эрэгийиэннэртэн 100 бэрэстэбиитили ыҥырбыттара, ол иһигэр Госдума дьокутааттарын, РФ Федеральнай Мунньаҕын Федерацияҕа Сэбиэтин чилиэннэрин. Ол эрээри дойду үрдүнэн коронавирус пандемията туран, сийиэс буолбакка хаалбыта.

            Олунньу 15-19 күннэригэр дьокутааттар Хаҥалас улууһун 8 уонна Өлүөхүмэ 6 нэһилиэнньэлээх пуунугар сылдьыбыттара, олохтоохтору кытта көрсүбүттэрэ, оҥорон таһаарар, социальнай-култуурунай эбийиэктэри көрбүттэрэ.

            Эмиэ ити ыйга Усуйаанаҕа тиийэн, улуус нэһилиэктэрин бэрэстэбиитэллээх уорганнарын баһылыктарыгар уонна дьокутааттарыгар СӨ муниципальнай тэриллиилэрин сэбиэтэ кыттыылаах улахан сэминээри тэрийбиттэрэ. Сэминээргэ улуус социальнай-экэнэмиичэскэй сайдыытын туһунан кэпсэппиттэрэ, бэйэни салайыныы боппуруостарыгар уопут атастаспыттара.

            Кулун тутарга Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын сэбиэтин ассоциациятын мунньаҕа буолбута. Ол кэнниттэн Ил Түмэн дьокутааттарын кытта көрсүһээри, Владимир Поскачин салалтатынан Үөһээ Бүлүү улууһун делегацията ыалдьыттаабыта. Улуус ситиһиитин, сүрүн кыһалҕаларын туһунан норуот дьокутааттарын кытта аһаҕастык кэпсэппиттэрэ. Нэһилиэнньэни ыраас уунан хааччыйыы бырагырааматын чэрчитинэн ууну ыраастыыр ыстаансыйалары өссө туттарыахтарын баҕаралларын, нэһилиэктэр бүддьүөттэрэ кыратын, граннары ылыы механизма уустугун, агрооскуолалары сайыннарар сорук турарын туһунан эппиттэрэ. Фермердэри чэпчэтиилээх тиэхиньикэнэн хааччыйыы, ракета тобоҕун улуус территориятыгар түһэрии боппуруостарын таарыйбыттара.

            Өрөспүүбүлүкэ үрдүнэн хааччахтааһын эрэсиимэ олохтонон, Ил Түмэн иһинэн тэриллибит муниципальнай тэриллиилэр бэрэстэбиитэллээх уорганнарын сэбиэтин мунньаҕа видео-сибээс көмөтүнэн ыытыллыбыта.